Read berom Yɛshaya 37 Bible Online

Yɛshaya 37 - berom bible

Yɛshaya 37

¹Sede Gbɔng Gwɔ̀m Hɛzɛkiya a wok neha nane, a vɛ̌ hama gworugu mɛ yaga lashê yey, a tɛ̀ rugû sesin, ko a kyè wɔ̀ yel e Gbɔng Duk Re Fongôl Dagwi Darwey.

²A hwo tomo Ɛliyakim, mwât bɛrɛng lɔ gwɔ̀m, na Shɛbna mwat-jɛk, tanga begbɔng o vê bepiris wɔ na Yɛshaya Amotsi, zarap Dagwi. Ba tɛ̀sɛ berugû sesin.

³Bē ha a yɛ neha Hɛzɛkiya nemo ngan: “Yunung a sé tûk reyɔm, tûk tabak tanga tûk sɔ̂ rekyen. Wot a ga tɛ́ ot sede hwā de a ga vey bagât tɔ, ko vit a gâp tɔ̂ hwey o.

⁴Di, Da vwel Asirya a ga tomo mwât nuyel mɛ, na a vey dusa Dagwi wo neken. Ka Dagwi Darwey, Dagwi mō a yâng wok neha dusa de a ga ye, ka a yang tabak hɛ e ra pyɛ́ de a ha mo! Gabɔk ra a wot vemo de wot a rɔngɔl won na Dagwi Darwey.”

⁵Bemât nuyel o ba wɔ̀ há a Yɛshaya ha hane.

⁶Yɛ kwong a toyo a yɛn na ha de Dagwi Darwey a ha a gbɔng gwɔ̀m hemo ngan: “Hwo kwon wok bengyip yaga tabâs nengyas betom Da vwel Asirya vane e ra me wɛt.

⁷Ma rɔda lashe a yɛ yey na rehâ pyɛ́ de yê té e vwel mɛ. A rɔda toyo hɛ, ko e hwomo ma rɔda tɛ̀ be mɔrɔ hɛ.”

⁸E ji jeng yane, mwât nuyêl comô Asirya a wok, Da Vwel mɛ a ga tik repomô Lakish, ko a sé tó como na Libna. A vɛ̌ kyè vɔk e Libna mo.

⁹E jeng ano, Da vwel Asirya a wok, Gbɔng Gwɔ̀m Tirhaka wo Kush a sé kyè vey hwo e ra yɛ. Ano kwong, a tomo betom behak na bwok-rwang vɔk na Hɛzɛkiya, a jɛk ngan:

¹⁰“Hwo kwon tɛ̀ gap e ra Dagwi mō wɛt! Hwo tik ɛ, a kwɛlɛng hwo wɔgɔ, a rɔda dul Yɛrusalɛm yi na me wɛt!

¹¹Hwà tɔk pyɛ de Beda vwel Asirya ba ga ra na bwang bavwel wɛt a? Ba wey na vɛ hywiri. Ko hwo, hwó bare hwô hywit o a?

¹²Jeng de Beda vwel Asirya de bá sè e nuyel hom bá wey na bapomô Gozan, na Haran, na Rɛzɛf, tanga BeEden de ba sangal e Telasar, cī mɛn ya tɔk sey ɛn wɛt.

¹³Ko begbɔng begwɔ̀m Hamat, na Arpat, na Sɛfarvayim, na Hena tanga Iva mwa hɛn ba ga ye bit vit.”

¹⁴Hɛzɛkiya a sey bwok-rwang o. E bama de a ga basa gwɛ, a vɛ̌ jut gwɛ vɔk e Gbɔng Duk Re Fongol, a wɔ̀ wunta gwɛ e nuyêl Dagwi Darwey.

¹⁵A ra won, a ye,

¹⁶“À Dagwi Darwey, Dagwî Israyɛl, hwo de kwɔ̂n sangal mō ha sé e ra bekɛrup. Hwo wɛ nju mo zɔng, à Dagwi, hwó re negwɔm e ra negwɔm jey mwa. Hwà yong lagwi tanga jey mwa arɔng.

¹⁷Ko di, pyɛ de ye té na wot! Wok neha Senakerip de a sɛ dùsa hwo, hwo de hwà sé Dagwi de hwà sé kwen!

¹⁸“Ey, mwin à Dagwi Darwey, Beda vwel Asirya ba ga doyo bavwêl mwa yére bemat o be tɛ́ ɛn barin.

¹⁹Ba ga wey na pyɛ̂ sekwit de ba yong na cɔ́gɔt tanga yê beta, yemo de bemât bavwel vane ba yong, na be re a yɛ fongol.

²⁰Ko hwo, à Dagwi Darwey, Dagwi mot, wot a sé rangal na hwo sey ot yi e vwɔ̂ Da vwel Asirya! Ano kwong, kawɛ mwat e kahɛ segwɔm e jey a rɔda tɔk, e hwo nju mo zɔng de hwà sé Dagwi!”

²¹Yɛshaya Amotsi a tomo na ha, na be wɔ̀ ha a Hɛzɛkiya pyɛ de Dagwi Darwey, Dagwi Israyɛl a ha, a ye, “Ma ga wok won mō e ra Da Vwel Senakerip wo Asirya.

²²Di pyɛ de ma sé ha a Da Vwel wane mo: “Bemât Yɛrusalɛm ba byɛs o, ba sé shɛgɛsh e bama mō.

²³E wǎ de hwà dusa hɛ ɛ? E wǎ de hwà tabas a yɛ nengyas ɛ? E wǎ a wane de hwà mok e ra yɛ ano ɛ? E wǎ de hwà paa a yɛ bayis ano ɛ? E me Dagwi Wo Jɛrɛ wo Israyɛl!

²⁴Hwà dusa me, Dagwi Darwey yi e nû betom mō. Hwà ye, ‘Me, Senakerip, na bekyɛkyɛ̂ bedwâ como hom pyak, ma ga tut vɔk e ra beraku, vɔk e ratɛ̂t berakû Lɛbanɔn. Ma tow batîn cɔ́gɔt sida de ba dal na nelis mwa, ma tow batîn cɔ́gɔt fir de ba dal na nerat mwa.

²⁵Me, ma ga cing hes, ma ga sɔ nshi e bavwel baduk. Ma ga tɛ̀ bol hom e ra nerɔt Misra, ko nà hworok mwa.’ ”

²⁶“Di, à hwo Senakerip, hwà tɔk pyɛ cak a? Ma ga ros e de tɛ̂ pyɛ́ yemo, ma ga yong yɛ yimo. A remo ma sé tɛ̀ yɛ ye té. E me de ma tik o na hwo gangas bagbɔng bapomo de ba dul na jwâ-pomo.

²⁷Bemat mɛn ba tɛ́ ɛn gbɛrɛk, a sé a yɛn kpɔrɔk, rekyen ra kyiri hɛn. Ba tɛ́ ɛn sede bejamuk, sede sɔng bwot de gwa tá e ragyip duk gwo hworok yi na gûl rak de gwa pɛl.

²⁸Ma tɔk o mwa jeng de hwó sogo kɛ hwó sangal, jeng de hwó nusu kɛ hwó yel, ko ma tɔk o jeng de hwà puu o me.

²⁹Ey, hwà puu o me, ma wok rehâ paà kwas mō. A remo, mê tɛ̀ rwey e wol mō na nerwěy e nu mō, ko mê hwɔtɔ hwo mɛ vɔk e kwɔn de hwà kana yi ɛ.”

³⁰Yɛshaya a yâng Hɛzɛkiya, “Ma rɔda ha a hwo pyɛ de ye kyè wɔ̀ té. Di, e shey hemo, yin a rɔda re jirî pyɛ́. E nak, yin ê to ba re jiri de ya tabas e kwɔn o. Ko e shey hê tat, yin ê bere pyɛ̂ yeneng, na yin bǒ bwal o, yin ê tus cɔ́gɔt anap, na yin re nèy o.

³¹Bemat de ba dalas e vwêl Yuda ba rɔda se sede cɔgɔ̂t anap de ya tɛ̀ berinîs yɛ e ji vwel yikyik, ko ya tɔs nèy.

³²Ey, bemat de ba dalas o bê shara hɛn yi e Raku Siyɔn e Yɛrusalɛm, bê to sangal e vwel o. Dagwi Darwey, Dâ Jey Mwa a rɔda tɛ̀ pyɛ́ mo ye té ano, yaga a tɛ̀ yey na bemat mɛ ding-ding.”

³³Ko Yɛshaya a to ye: “Mê to ha a hwo pyɛ de yê té na Da vwel Asirya. A rɔda yel e Yɛrusalɛm wɛt, ê ka ta kwet gwining e ji repomo mo yi e jey wɛt. Ê ka rɔnɔ rɛ, na a yong ɛ na a bin hwo e ra rɛ wɛt.

³⁴A rɔda toyo hɛ e gwong de a kana vey ɛ, ko a rɔda yel e Yɛrusalɛm wɛt. Me Dagwi Darwey, ma ha ano.

³⁵Ma rɔda dul rɛ yaga nerey hom, ko yaga tɛ̂ yey na mwât fwom hom Davit arɔng.”

³⁶E ji turuk hane, tom-lagwi Dagwi Darwey a vey e bǔk comô BeAsirya, ko a mɔbɔs bemat gu naga na gu kuru rwit na vɛ batungun (185,000) e ji mɛn. E nusû gasi, bǔk o ba vɛ̌ sila na bavin.

³⁷Bamâ hane, Da Vwel Senakerip a toyo vɔk e Asirya, a wɔ sangal e gbɔng repomô Nineve.

³⁸Tuhak, á sè e duk re a ci mɛ Nisrɔk fongol. E jeng o, nèy mɛ Adaramɛlɛk tanga Sharɛzɛr ba mɔrɔ hɛ na bewal. Ba tele, ba wɔ̀ dalas e sevwêl Ararat, ko sɔ mɛ Asarhadon a re negwɔm e to mɛ.