Read berom Yɛshaya 38 Bible Online

Yɛshaya 38 - berom bible

Yɛshaya 38

¹E jeng yane, Hɛzɛkiya a hwo serɔ, a vey bagât ku. Yɛshaya Amotsi, zarap Dagwi a wɔ̀ ha a yɛ, a yang ɛ, “Dagwi Darwey a ye, ‘Yong lɔ mō, yaga hwô dal yi e rɔ hemo wɛt. Hwó kyè wɔ ku.’ ”

²Hɛzɛkiya a hwo doyo vɔk e vwarâ duk, ko a ra won, a ye,

³“Gabɔk wɛt, à Da, hwà tɔk, ma ga raa hwo sana tô yey. Ma ga ra pyɛ́ de hwo simo na mwa yey hom. Ma to ra kayɛ pyɛ de hwà ye, ya sé ryat.” Ko a hwo tosho sizɔng.

⁴Ano Dagwi Darwey a nɔ̂ng Yɛshaya nu, a ye,

⁵“Toyo na hwo wɔ̀ yang Hɛzɛkiya ngan: Ma sé Dagwi Darwey, Dagwi de dâ beda mō Davit á re a yɛ fongol. Ma wok won mō, ko ma to di nemwishil mō. Mê gwɛ a hwo neshey kuru na nɛ netungun.

⁶Ko mê sey o tanga gbɔng repomo remo yi na Da vwel Asirya. Mê gyep gbɔng repomo mó arɔng.

⁷“Pyɛ dura á hwo à yemo yi na Dagwi Darwey wɔgɔ, yɛ̀ ê ra pyɛ de a vo nu e ra yɛ.

⁸Pyɛ dura de ê nɔng o à yemo: Ê tɛ̀ necam gwi ne hwɔtɔ hɛn e nekwɔn bɔrɔs kuru e ra Kwɔ̂n Turus hê Ahas. Ano necam gwi na toyo na bama e nekwɔn bɔrɔs kuru mo.”

⁹Bama de Hɛzɛkiya a ga tɛ̀ tyang yi e serɔ mo, ko a jɛk lwɛlɛ̂ somo gwomo:

¹⁰“Ma bare e jeng neras hom naka mê kyè, bê kaba me e ruhûp kwɔ̂n bevuvwel, e bwang neshey hom.

¹¹Ma bare, mê to di Dagwi Darwey e vwêl vê neken wɛt, mê to bɛrɛng bemat beken e tê bemat jey wɛt.

¹²Ba ga lut rebêk sangal hom, be sey ɛ hɛ e me, sede bûk lwêk vyēl. Dagwi Darwey a ga gunus me sede mwât lɔ̂k rugu na pyɛ de a ga yɛnɛ yɛ, nagwi na naturuk, hwó tak a me.

¹³Me tosho yaga sɛlɛ sɛ̌ nagasi, sede gukum, e kwɔrɔs mwa bekup hom, nagwi na naturuk, hwó tak a me.

¹⁴Me tosho yuu sede shwɛl, me kùnus sede wǔtut. Bayis hom ba ga ruru na bɛrɛng e rak o. À Darwey, bé tak a me, vey sɛlɛ me!

¹⁵Ko mê ye ala ɛ? A ga ha na me, ko a ra ano arɔng. Mwa nevwa hom na ga tele, yaga yey hom de ye lashe hɛ.

¹⁶À Darwey bemat be vɔk neken yi na tomong mo me pyɛ hom me vɔk neken yi e vɛ̀ arɔng. Áaa, toyo a me na netyang, na hwo tik me sè kwen!

¹⁷Rezot hom ra ga tɛ́ ɛ a me nerat, ko hwà ga gyep neken hom yi e vɔng gawey. Hwà ga gangas mwa banɛn hom e bama mō.

¹⁸Yaga kwɔ̂n bevuvwel hê tɔk feng a hwo wɛt, reku rê tɔk somo hwo wɛt. Vemo de ba ga gyirik vɔk e revɔng bê tɔk sɛt yey e ra tsak o mo wɛt.

¹⁹Vê neken, ey vê neken bé feng a hwo, sede remo de me ra yunung, beda be dura á nèy mɛn tsak o mo.

²⁰Dagwi Darwey ê sey me, ko wot ê ra lwɛ̄lɛ na yōm, mwa nepɔlɔ̂ neken mot, e Gbɔng Duk Dagwi Darwey.”

²¹Hɛzɛkiya a ra lwɛlɛ mo e bama de Yɛshaya a ga kana yang ɛn, “Tɛ̀ in regat nèy regwi, e ra gwonot o, yaga na a tɛ̀ tyang”,

²²ko Hɛzɛkiya arɔng a ga kana ye, “Pyɛ dura ma yɛ̀ wɔgɔ, mê to wɔ́ e Gbɔng Duk Re Fongol wo Dagwi Darwey ɛ?”