Read berom Yɛshaya 39 Bible Online

Yɛshaya 39 - berom bible

Yɛshaya 39

¹Jeng de Mɛrɔdak Baladan, Da vwel Babilɔn a wok, Hɛzɛkiya a kana ro ɛ, ko a ga tɛ̀ tyang, a hwo tomo betom na bwok-rwang tanga nenɔrɔ vɔk na yɛ.

²Hɛzɛkiya a sey betom o na yey pyɛng, ko a dúsa a yɛn mwa pyɛ̂ nedanerey mɛ, yɛ̄ à dyam pyɛng, na dyam shinang, na pyɛ̂ nesang hyɔɔlɔl tanga něy nesang nerat de ya sé e gban mɛ. A to gwɛ dura a yɛn pyɛ̂ como mɛ, na mwa bwang pyɛ́ de a vɔk e begban mɛ. Vit a pyɛ de a tik nà dura a yɛn e lɔ gwɔ̀m, na e segwɔm mɛ mwa.

³Ko Yɛshaya a vey na Hɛzɛkiya, a rangal hɛ, a ye, “Bemat vemo ba yi e gwa rɛt? E sɛ́ de yɛn e simo ɛ?” Hɛzɛkiya a toyo na ha, a ye, “Yɛn a vey yi e hwomo yikyik, yi e Babilɔn.”

⁴Yɛshaya a to rangal hɛ, a ye, “E sɛ́ na sɛ́ de yɛn a di e lɔ mō ɛ?” Hɛzɛkiya a toyo a yɛ, a ye, “Yɛn a di kayɛ pyɛ. Vit a pyɛ e begban hom de ma tik nà dura a yɛn.”

⁵Ano kwong, Yɛshaya a yang ɛ, “Ma vɔk a hwo ha yi na Dagwi Darwey:

⁶Tuhak, ba rɔda ba hashe pyɛ̂ mwa de hwo na bedabeda mō ba kana bang, vɔk e Babilɔn. Ey, Dagwi Darwey a ye, vit a pyɛ jining de ba rɔda tɛt ɛ.

⁷Ba rɔda ba hashe nèy mō nehak vɔk e Babilɔn arɔng. E hwomo, bê byɛs nɛ, bê tɛ̀ nɛ, ne ra fwom e lɔ gwɔ̀m.”

⁸Hɛzɛkiya a yâng Yɛshaya, “Ha de hwà vey a me mɛ yi na Dagwi Darwey ha sé naka.” A to yâng to mɛ, “Ko sangâl netyang hê sè e jeng hom.”