Read berom Yɛshaya 4 Bible Online

Yɛshaya 4 - berom bible

Yɛshaya 4

¹Jeng ye kyè vey de beha betaama bê vo rwas gwining, be yang ɛ, “Wot ê re pyɛ́ mot, wot jama berugu mot, ko jut ot sede beha mo zɔng, na hwo pat a wot rekyên nevît beras.”

²Jeng ye kyè vey de lâng Dagwi Darwey, wɔgɔ, bemat mo, hê sila na nerat tanga nerey, ko nèy vwel o nê sè pyɛ kaà BeIsrayɛl de ba dal.

³Vemo de ba dal e Yɛrusalɛm, vemo de Dagwi Darwey a ga kana kasa, bê di ɛn sede bemat de ba sé jaram.

⁴Darwey ê jut gas e tē mɛ tanga kya mɛ na a kus mɛ beving behâ Yɛrusalɛm tanga nemi de ba lusha e hwomo.

⁵Ano arɔng, e ra Raku Siyɔn tanga e ra mwa bemat de ba tula hɛn e hwomo, Dagwi Darwey ê tɛ̀ rele nagwi, tanga relê kya naturuk. Gbɔng nerât Dagwi nê bang, ko nê gyep gbɔng repomo mo mwa.

⁶Gbɔng nerat o nê sè sede buk de gwô tɛ̀ a rɛ necam yi e jey de ya fes nagwi, na ne tɛ̀ rɛ re sè kwɔn de bê sangal ɛ tyang, e jeng rwak tanga yè sombabos.