Read berom Yɛshaya 40 Bible Online

Yɛshaya 40 - berom bible

Yɛshaya 40

¹Dagwi min a ye: “Wɔrɔk bemat hom, wɔrɔk hɛn.

²Há in a bemât Yɛrusalɛm neha gwɛ̂ gap, mok in a yɛn, jeng reyɔm mɛn ya ga yɛnɛ hɛ, ba ga tala buru mɛn, yɛn a ga sey yi e vwɔ̂ Dagwi Darwey tabak zang ba yaga mwa banɛn mɛn.”

³Fwɔ gwa moklo, gwa ye, “Yong in a Dagwi Darwey gwong e hey, tɛ̀ in yaga Dagwi mot gbɔng gwong cik e hêy gbingiring.

⁴Bê sila kawɛ nɛk, ko bê gangas kawɛ raku na rahwol, vwel de ha vɔk bagwɔ̀s bê tɛ̀ hɛ tas, ko nekwɔn de na kyě turus be tɛ̀ nɛ tɛ̀l.

⁵Ano Dagwi Darwey ê dura gbɔng nedyɛt mɛ, ko mwa bemat bê di nɛ̀ e dem o. E Dagwi Darwey de a ha ano.”

⁶Fwɔ hwak gwó tē, “Mok!” Ko ma ye, “Me mok sɛ́ ɛ?” Yē, “Mwa bemasi ba sé sede sɔng, rós mɛn ha sé sede hê bejamuk e hey.

⁷Sɔng o gwó hworok, ko bejamuk o bé ye jwɛ̀k jeng de nesong Dagwi Darwey ne pɛsɛl gwɛ, mwin bemat o ba sé sede sɔng zɔng.

⁸Sɔng o gwó hworok, ko bejamuk o bé ye jwɛ̀k, ko hâ Dagwi mot hê nàra gbak-gbak.”

⁹À Siyɔn wo sharâ yɛgɛt yat, tut e ra raku lwis o! À Yɛrusalɛm wo sharâ yɛgɛt yat, mok ngyat-ngyat! Mok, hwo wok bengyip wɛt! Yâng bapomô Yuda, “Dagwi min à womo!”

¹⁰Di, Darwey Dagwi Darwey ê vey na gbɔng reto, vwɔ mɛ gwô re a yɛ negwɔm, a sé kyè na pyɛ̂ jugu mɛ.

¹¹Ê gyeng vyēl me naka sede lwek rwat, ê tula nèy vyēl o e vɔ mɛ, ko a hashe nɛ e ragey mɛ, ê kyè na beneng o hywɛ.

¹²Wà e tɔk mara mwa nshi e tas vwɔ mɛ, na e mara jey na netês vwɔ, na e tɔk mara mwa bûm jey, na beraku, tanga berahwol e pyɛ marâ nedirik ɛ?

¹³Wà e tɔk ha a gabik Dagwi Darwey pyɛ de hê ra ɛ? Wɛ̌ mwât vo redu ê tɔk misang hɛ pyɛ de ê ra ɛ?

¹⁴A ga rangâl wà a tɛ̀ a yɛ negbey e ra pyɛ cak, kɛ wà a ga basa a yɛ gwông gas badu e tē ɛ? Wà a masa a yɛ gwông tɔ́k ɛ?

¹⁵Yére bemât jey ya sé sede tɔngtɔ̂ nshi e shǐ, ya sé sede búm e ra pyɛ masa. Di, nedirîk bazik, nà sé sede nemuk e bayis mɛ.

¹⁶Mwa ngyāma Lɛbanɔn ya ka vey nára a yɛ̀ nɔrɔ̂ rangas wɛt, ko mwa bahwot wɛ ba ka vey cɔ́gɔt kya mo wɛt.

¹⁷Mwa yére bemât jey ya sé pyɛ cak e nuyel mɛ wɛt, na yɛ̀, ya ka vey be bara yɛ̄ wɛt, vit à pyɛ.

¹⁸Hwô tyɛngrɛ Dagwi na wà, kɛ a sé sede wà ɛ?

¹⁹A sé sede cit a? — E mwât fwom vwɔ de a yong, ko zu dyam shinang a de lolom yɛ, ko a turu á yɛ bèlɛlɛ dyam pyɛng.

²⁰Mwat pwɛng e nɔng nɔrɔ̂ cɔgɔt de ye bɔsɔ wɛt — ko e de jama mwât sekwɛl na a yong a yɛ ci de yê tē gyèndéng wɛt.

²¹Hwà ga tɔk wɛt a? Hwà ga wok wɛt a? Ba ga ha a hwo yi e susu mo wɛt a? Hwà ga tɔk pɛrɛ̂ jey wɛt a?

²²E Dagwi Darwey de e sangsal e ra rak jey mwa, ko vê sangal e yɛ̄ ba sé sede yɔ́rɔ e bayis mɛ, e viri lagwi sede rugû bánga, ko e lásha yɛ̄ sede buk de be sangal ɛ.

²³E weres na nèy gwɔ̀m, ko e tɛ̀ vê rê negwɔm jey be sè pyɛ wɛt.

²⁴Yɛn a sé sede pyɛ́ de ba mɛsɛng tus, ba mɛsɛng zep, Dagwi e pɛl gul e ra yɛ̄, ko ye hworok, ko wula gwo kyè na yɛ sede byɛmɛ.

²⁵Wo Jɛrɛ a ye, “Hwô tyɛngrɛ me na wà, kɛ ma sé sede wà ɛ?

²⁶Yē in ganga à lagwi na yin a di, E wà de a yong pyɛ́ mo ɛ? Yɛ̀ de a vey na nezap yɛ̄ a yila yɛ̄ mwa na baza. Vit a jining de ya vuru hɛ, yaga yɛ̀ a vɔk gap hyiw, na gbɔng reto arɔng.”

²⁷À BeIsrayɛl yaga sɛ́ de yin e gwɔrɔng ɛ? À BeYakɔp, yaga sɛ́ de yin e tē: “Dagwi Darwey e di pyɛ́ de ye té na me wɛt, Dagwi hom e to bare na me wɛt” ɛ?

²⁸Yin a tɔk wɛt a? Yin a ga wok wɛt a? Dagwi Darwey a sé Dagwi sana susu kɛ yɛnɛ. A yong yɛnɛ̂ jey mwa. E yang ɛ gbɛrɛk wɛt, e ruru wɛt, be tɔk ngyɛgɛt netsitsɛng mɛ vɔk e yɛnɛ mo wɛt.

²⁹E nɔngɔ̂s vê gbɛrɛk reto, ko e gwɛsɛ a vê mɛrɛk gap.

³⁰Bewen mwa e yang ɛn jwɛɛnɛn, ko be ruru, ko beras arɔng be gaba na negbɛrɛk.

³¹Ka a ka té ano, ko vemo de be tɛ̀ gap mɛn e ra Dagwi Darwey, bê turu gap mɛn, bê turus na gap sede kim na bafabak mɛ, yɛn ê tele, ko ê tang ɛn jwɛɛnɛn wɛt, yɛn ê kyè, ko ê sè a yɛn gbɛrɛk wɛt.