Read berom Yɛshaya 41 Bible Online

Yɛshaya 41 - berom bible

Yɛshaya 41

¹Dagwi Darwey a ye: Sǎ hin yuu, na yin wet betong na me, à yin bemât bakwogôm bavwel! Tik na yin a yong in, vey in bagat, na yin a hanat, tik na wot mwa wot a vey bagat yaga shɔt.

²E wà de a ga yila wo wɛng yi e rak, na a vey ra a yɛ fwom ɛ? E nɔngɔs yére bemât jey e vwɔ mɛ, ko e bɔrɔs begwɔ̀m na bol mɛ. E tɛ̀ ɛn sede bum na wal mɛ, sede byɛmɛ de gbang mɛ wo gangas.

³E ro ɛn ko e kweres ziri tyang, e mâk ra gwong o na bol mɛ wɛt.

⁴E wà de a ga yong na a ra pyɛ yemo, a yong a bezamang gwong yi e susu mo ɛ? A sé me, Dagwi Darwey à wo pɛrɛ mo, ko mê sè wo yɛnɛ mo.

⁵Bemât bakwogom mwa ba ga di ko ba ga vo bengyip. Neyɛnɛ̂ bavwel ne di ko ne vow, ko yɛn a ga vey bagat na be tɔk pyɛ de ma ra.

⁶Kawɛ e sɛlɛ mumwɛ, be tâng bemɛn: “Tɛ̀ yey ting!”

⁷Mwât fwôm cɔ́gɔt e gwɛ̌ a zu dyam shinang gap, womo de e yong na tsɛ̀k, e gwɛ̌ a mwât remos gap, e tâng mwât sól o: “Yà sé naka!” ko yɛn e manas cī mo na bekpɛk, na yē kwon digis wɛt.

⁸Ko hwo, lɔ̂ Israyɛl, mwât fwom hom, hwo lɔ̂ Yakɔp womo de ma kasa, hwo yerê Abraham, sa hom.

⁹Hwo de ma jut yi e neyɛnɛ̂ jey, ko ma yila hwo yi e rǎ gul naas. Ma yang o: “Hwà sé mwât fwom hom, ma ga kasa hwo, ko mê ró o wɛt.”

¹⁰Hwo vo yey wɛt, yaga ma sé tanga hwo, hwo vɔk bengyip wɛt, yaga ma sé Dagwi mo. Mê gwɛ a hwo gap, mê sɛlɛ hwo, mê kaba hwo na vwɔ yege hom gwô wɛng.

¹¹Di, mwa vemo de be bɛɛ hwo ves, bê vo rekyen, bê sè pyɛ byɛs. Vemo de be ra repugu mo, bê sè sede pyɛ cak wɛt, bê wey.

¹²Vemo de be kyɛ́ ɛn hwo, ko hwô to di ɛn wɛt. Vemo de be tó como na hwo, bê sè sede pyɛ ko tyɔng wɛt.

¹³Yaga me, Dagwi Darwey, Dagwi mo, ma kaba vwɔ mo. E me de ma yang o, “Hwo wok bengyip wɛt, mê sɛlɛ hwo.”

¹⁴Hwo vo bengyip wɛt, à hwo Yakɔp gbɛrɛk sede pyongol, à hwo Israyɛl buruk sede kǔt! Mê sɛlɛ hwo, me Dagwi Darwey ma ye ano, mwât viri mo, yɛ̀ à Wo Jɛrɛ wo Israyɛl.

¹⁵Di, mê tɛ̀ hwo sè sede gwelê dâk pyɛ́ pwaso, de gwa sé rwat. Hwô dak beraku ko hwo bunut vɛ, ko hwo tɛ̀ berahwol sede byɛmɛ.

¹⁶Hwô wolom vɛ ko gul gwô tele na vɛ, ko gûl rwak gwô shara vɛ. Ano hwô vɔk yey pyɛng na Dagwi Darwey, hwô dak kaa na Wo Jɛrɛ wo Israyɛl.

¹⁷Jeng de bepɛng na vê tak reyɔm bê jama nshi, bê jama nshi, ko vit à nɛ, ko balem mɛn ba ga hworos na yêy hwɔshɔ. Me Dagwi Darwey mê wok ɛn, me Dagwi wo Israyɛl mê ye waa a hɛn wɛt.

¹⁸Mê wuma nerɔt e ra berahwôl gbingiring, na lel nshi e tê benɛk. Mê tɛ̀ hêy gbingiring he vɔk dideng, ko vwel hwogot, jɔ̂t nshi.

¹⁹Mê tus cɔ́gɔt sida, na batîn rɔgɔ, na fɔ̀ tanga pat e hêy gbingiring, mê zep cɔ́gɔt fir na plen tanga sayprɛs e hey o arɔng,

²⁰Yaga na mwa bemat be bin di, na be tɔk, mwa be bɛrɛng, na be ye ey, e vwɔ̂ Dagwi Darwey de gwa ra ano, Wo Jɛrɛ wo Israyɛl de a yong yɛ̄.

²¹Dagwi Darwey, Gbɔng Gwɔ̀m Yakɔp a ye: Tɛ̀ in kun min ó vey in na pyɛ̂ dura min.

²²Tik na yin a vey na cī min, na ye ha a wot pyɛ́ de yê té. Tik na yē há a wot pyɛ̂ raane, ya sé sɛ́ ɛ? Yaga na wot a tɔk pyɛ́ de yê té.

²³Ha in a wot pyɛ de yê vey e ngamo-nuyel, ano wot ê tɔk, yin a sé bedagwi! Ra in pyɛ cak, ryat kɛ vyes, na wot a bin ye lot, wot a bin vɔk bengyip!

²⁴Mwin, yin a sé pyɛ wɛt, ko fwom min gwa sé yapyi zɔng. Kawɛ mwat de a kasa hin, a sé pyɛ byɛm-byɛm.

²⁵Ma kasa mwat hwak e vwêl rwa rak, ko be yila hɛ na reza hom, ma yila hɛ na a vey yi e rwa bato, ko a ga pom. Ê bɔrɔs begwɔ̀m sede sebwos, sede mwât lɔk nerwey e bɔrɔs secwem.

²⁶E wa e ji min de à dura ano e susu mo, yaga na wot a tɔk, kɛ à dura gyam, na wot a bin ye, “A ra tyɛng” ɛ? Vit à hwak de à dura ano, vit à wo sharâ ha mo, vit à womo de à wok neha min.

²⁷Ma tanga dura ano e Siyɔn, ko ma nɔ̂ng Yɛrusalɛm mwât sharâ yɛgɛt yat.

²⁸Ko jeng de me bɛrɛng, ko vit a mwât vô redu. Ko jeng de me rangal, ko vit a wò toyo mɛ.

²⁹Wěy, mwa hɛn ba sé vê bɔs, tom mɛn ba sé pyɛ̂ bɔs arɔng. Cī mɛn ya sé hal sede gul.