Read berom Yɛshaya 42 Bible Online

Yɛshaya 42 - berom bible

Yɛshaya 42

¹Dagwi Darwey a ye: Mwât fwom hom à womo, de ma gwɛ̌ a yɛ gap, womo de ma kasa, ko yey hom ya pɛngɛ na yɛ. Ma ga tɛ̀ gabik hom e ji mɛ, yɛ̀ ê gas a yére bemat jey badu e tē.

²A rɔda tā lwɛ́lɛ, kɛ a gbɔ, kɛ a ha ngyat-ngyat e nehyok wɛt.

³Ê kwɔrɔ mapak de ba ga bugut wɛ, kɛ ê rimi kekyǎ de ka vey bagat ku wɛt, ko ê gas badu e tē na tsak o,

⁴Ê yang ɛ sha kɛ a ye waa wɛt, sɛ̌ a tɛ̀ retîs gâs badu e tē e jey, ko bemât bakwogom yikyik bê gyeng badu mɛ.

⁵Dagwi, Dagwi Darwey a ye, Yɛ de a yong lagwi ko a lasha wɛ, yɛ de a lasha jey, na pyɛ de ya sé e yɛ̄. Yɛ de e nɔngɔ̂s bemât yɛ nesong, na gabik vɔk na vemo de be kyè e yɛ̄.

⁶“Ma sé Dagwi Darwey, ma yila hin e ji necik, ma ga kaba hin na vwɔ ko ma gyeng in. Ma ga tɛ̀ yin sè gwông wuna-na-sira hom vɔk na bemat mwa, sede negbey vɔk na yére bemat jey,

⁷yaga wumâ bayis bebók, na yaga paà bemat de ba sangal hywiinin, yi e nelɔ ngyang,

⁸Me wɛ à Dagwi Darwey, reza hom à rane, me nɔ̂ng mwat hwak gbɔng nerat hom, kɛ somo hom vɔk na cī wɛt.

⁹Di, pyɛ̂ raane ya ga kwey, ko ma sé dura pyas o, gyam na ye nusu, ma sé há a yin e ra yɛ̄.”

¹⁰Ra in a Dagwi Darwey lwɛlɛ pwas, be somo hɛ yi e yɛnɛ̂ jey! Tik gworep na kayɛ pyɛ e ji gwɛ ye wus, bakwogôm yikyik na bemât vɛ mwa.

¹¹Tik na bemât hêy gbingiring na vê bapomô hɛ be somo Dagwi na tɔ mɛn, na bemat mwa vê nebapomô Kedar. Tik bemât Sela be ra lwɛlɛ̂ yey pyɛng, na yɛn a gbɔ yi e ra rak beraku.

¹²Tik na yɛn a nɔ̂ng Dagwi Darwey gbɔng nerat, na yɛn a dura somo mɛ e bakwogom yikyik.

¹³Dagwi Darwey e bɔrɔs sede suga, sede mwât como de a sé yong ɛ yaga yɛ. E mok como, e gbɔ ngyat-ngyat, e dura tó mɛ na gap e ra vê repugu mɛ.

¹⁴Dagwi Darwey a ye, “Ma ga sǎ yuu, ma ga bān yuu, ma tumal tiing. Ko a remo ma sé pɛl kun sede hwâ tɔ, ma sé rus ko ma sé vos yey.

¹⁵Mê gangas beraku na berahwol, ko mê tɛ̀ pyɛ́ mɛn mwa ye hworok, mê tɛ̀ nerɔt ne tɛ́ ɛn begwong, ko mê tɛ̀ bedideng be hworos.

¹⁶Mê hwɔlɔ bebók e gwong de ba tɔk wɛt, mê gyép ɛn e nekwɔn de yɛn a tɔk wɛt. Mê doyo lwil gwo tɛ́ ɛ negbey, nedem bagwɔ̀s ne sè tɛ́l. Pyɛ́ de mê ra à yemo, ko mê ye waa a hɛn wɛt.

¹⁷Vemo de ba tɛ̀ gap mɛn e ra cī bê toyo na bama. Vemo de be tâng cī yê dyam à bedagwi mɛn, bê vo rekyen sedesi.”

¹⁸À yin bekpey, wet in betong. À yin bebók, bɛrɛng hin na yin a di!

¹⁹E wa de a sé bwok sede mwât fwom hom, de ma kasa kɛ kpey sede tom hom, mwât fwôm Dagwi Darwey ɛ?

²⁰E bɛrɛng pyɛ́ pyak, ko e di pyɛ cak wɛt, e wet betong ko e wok pyɛ cak wɛt.

²¹A jam a Dagwi Darwey ano, yaga nerât vê cik mɛ, na a gwɛ̌ nerât badu mɛ, na be vɔk gbɔng nerat.

²²Ko mwa ano ba ga hashe pyɛ̂ bemat mɛ na retek, ba ga jugu hɛn arɔng. Bemat mɛ ba ga báng ɛn e bavɔng, ko ba ga lɛrɛ hɛn e nelɔ ngyang, Ko yɛn a ga tɛ́ ɛn pyɛ̂ jugu de vit a mwât sey ɛn, besam begbik de vit a mwat de e yē, “Toyo hin na yɛn!”

²³E wa e ji min de ê wok ɛ, wa ê tɛ̀ nehywɛ na a wet betong e ngamo nuyel ɛ?

²⁴Wa a nára BeYakɔp na vê jugu, ko BeIsrayɛl na begbik ɛ? A sé e Dagwi Darwey, de wot a ra a yɛ banɛn wɛt a? Ba kyɛ́ ɛn nà raa begwong mɛ, ko ba kyɛ́ ɛn nà gyeng badu mɛ wɛt a?

²⁵Yaga ano, a shushu a yɛn nepêp shom mɛ, na nevês como, nà rɔnɔ hɛn na kya mwa, ko yɛn a ka tɔk wɛt, ha rangas hɛn, ko yɛn a masa ɛ pyɛ wɛt.