Read berom Yɛshaya 43 Bible Online

Yɛshaya 43 - berom bible

Yɛshaya 43

¹Ko di, Dagwi Darwey, yɛ de a yong o, à Yakɔp yɛ de a tɛ̀ hwo sè pyɛ, à Israyɛl, a ye: “Hwo vo bengyip wɛt, yaga ma ga viri hwo, ma ga yila hwo na za mo, hwà sé nwang.

²Jeng de hwô kwey e nshi, mê sè na hwo, na e nerɔt, nê re o wɛt, jeng de hwô kwey e kya, hê re o wɛt, ko balêm kya mo bê wey na hwo wɛt.

³Yaga e me wɛ à Dagwi Darwey, Dagwi mo, Wo Jɛrɛ wo Israyɛl, mwât sey o. Ma nára Misra na me viri hwo, Etiyopya na Seba e to mo.

⁴Remo de hwà sé rwat e bayis hom, wo nerey, ko me tɛ̀ yey na hwo, me nɔng bemat e to mo, yére bemât jey e tô neken mo.

⁵Hwo vo bengyip wɛt, yaga ma sé na hwo. Mê vey a hwo na yére mo, yi e rwa rak, ko yi e rwa ta mê tula hin.

⁶Mê yang rwa bato, ‘Hala hɛn!’ ko rwa batin, ‘Ro na yɛn wɛt!’ Vey na nèy bewen hom ne yikyik na behwóng hom vê yɛnɛ̂ jey —

⁷kawɛ de be yila hɛ na reza hom, womo de ma yong yaga gbɔng nerat hom, womo de ma tɛ̀ a sé pyɛ, ko ma yong ɛ́.

⁸Vey in na bemat hom de ba vɔk bayis, ko yɛn a sé bebók, yɛn a vɔk betong, ko yɛn a sé bekpey!

⁹Tik na yére bemât jey ye tula hɛ, ko bemat mwa be man. E yɛ̌ e ji cī mɛn ya dura pyɛ́ yemo ko ya ha a wot pyɛ́ gyam ye té ɛ? Tik na ye vey na vê nuha yɛ, na be ha tyɛng ano, ko tik na bemat be vey na be ye, ‘A sé mwin.’ ”

¹⁰Dagwi Darwey a ye: “Yin a sé vê nuha hom, na bemât fwom hom de ma kasa, yaga na yin a tɔk, na yin a sey tsak o na me, na yin a tɔk tsɛng-tsɛng e me à yɛ̀. Ba tanga yong dagwi hwak e ra me, kɛ bê sɛ̀ hwak e bama hom wɛt.

¹¹Me, me wɛ̀ à Dagwi Darwey, vit a mwât sey hwak sɛ̌ me.

¹²Me pyɛ hom ma dura wɛshɛrɛk, ma sey, ko ma shara ha mó, jeng de yin á vɔk dagwi duk e tē min wɛt, yin a sé vê nuha hom.” Dagwi Darwey a ye ano.

¹³“Ma sé Dagwi, ko e ngamo-nuyel ma sé yɛ̀, vit à hwak de ê tɔk sey hwak yi e vwɔ hom. Me ra fwom ko wa ê dul ɛ?”

¹⁴Dagwi Darwey de a viri hin, Wo Jɛrɛ wo Israyɛl a ye: “Yaga yin, mê tomo vɔk e Babilɔn ko mê kwɔrɔs mwa bewɔ́rɔ lɔ̂ ngyang, ko lwɛ́lɛ̂ shɛgɛsh BeBabilɔn gwô tɛ́ ɛ sesin.

¹⁵Me wɛ Dagwi Darwey, Wo Jɛrɛ min, Wo yông yerê BeIsrayɛl, Gbɔng Gwɔ̀m min.”

¹⁶Dagwi Darwey, de à yong gwong e gworep, na kwɔ̂n kwey e bagung nshi,

¹⁷yɛ̀ a hwɔtɔ bekyɛkyɛ bedwa na bedwa mo, na bemat como de yɛn a kasa, yɛn a gabsa, ba sang to sogo wɛt, ba ga rimi hɛn, sede kyâ kywa-kya.

¹⁸Yin bare na pyɛ́ de ya ga kwey zɔng, kɛ yin tɔrɔng e ra pyɛ́ ryoso zɔng wɛt.

¹⁹Di, me kyè wɔ̀ ra pyɛ́ pyas, a remo ya ga nusu, hwà sé di yɛ wɛt a? Mê tɛ̀ gwong e hey, na nerɔt e hêy gbingiring.

²⁰Ngyāma yê nɔ́ng me nerey, nevu-hey na bengyuwa, yaga mê nɔng nshi e hey, na nerɔt e hêy gbingiring, ko mê nɔ̂ng bemat de ma kasa nshi,

²¹yɛn bemat de ma yong yaga tó hom, yaga na yɛn a dura wɛshɛrɛk somo hom!

²²Dagwi Darwey a ye: “Mwa ano, à BeYakɔp, yin a re a me fongol wɛt, à BeIsrayɛl, yin a ga ruru na me!

²³Yin a ga vey nɔng me tyīmit min yaga nɔrɔ̂ rangas, kɛ yin a nɔng me nerey na nenɔrɔ min wɛt. Ma tɛ̀ a yin nedirik na pyɛ̂ nɔrɔ, kɛ ma tɛ̀ in gbɛrɛk na jamâ nɔrɔ̂ pyɛ̂ nesang hyɔɔlɔl wɛt.

²⁴Yin a ga sey a me mapâk nesang hyɔɔlɔl na dyām, kɛ yin dyɛng a me yey na sebwêp nenɔrɔ min wɛt. Ko yin a ga yɛklɛ me na banɛn min, yin a ga tɛ̀ me gbɛrɛk na neburu min.

²⁵Me, a sé me de me fugut neburu min yaga nerey hom, ko mê to bare na banɛn min wɛt.

²⁶Tɛ̀ in sekun hom, tik na wot wɔ̂ shɔt, ha in pyɛ kun o, yaga na yin dura yin a ra tyɛng.

²⁷Dâ beda min wo susu mo à ra banɛn, ko bezarap min ba sogo a me nehywɛ.

²⁸Yaga ano ma tɛ̀ bemât nuyel kwɔ̂n jɛrɛ hom ligis, ma nára Yakɔp na be wey na yɛ, ko Israyɛl a sè pyɛ dúsa.”