Read berom Yɛshaya 44 Bible Online

Yɛshaya 44 - berom bible

Yɛshaya 44

¹À hwo mwât fwom hom Yakɔp, wet betong! À hwo Israyɛl de ma kasa!

²Dagwi Darwey de a yong o, de a tɛ̀ be sey jim mo, de ê sɛlɛ hwo, a ye: “Hwo vo bengyip wɛt, à Yakɔp mwât fwom hom, à yerê yey hom de ma kasa.

³Mê shushu nshi pyak e ra cap cogot, na nerɔt e ra vwel hwogot. Mê shushu gabik hom e ra nèy min, tanga nerat hom e ra yére min.

⁴Yɛn ê tulu wɛ́kwɛk sede sɔ̂ng gwim-gwim, sede cɔ́gɔt babɔnɔng e hagât nerɔt de ne tele nshi.

⁵Womo ê ye: Ma sé wo Dagwi Darwey, bê yila woro na rezâ Yakɔp, ko womo gbak ê jɛk e ra vwɔ mɛ, ‘Wo Dagwi Darwey’, ko woro ê raa yere mɛ yi e Israyɛl.”

⁶Dagwi Darwey, Gbɔng Gwɔ̀m Israyɛl, na mwât viri hɛ, Dagwi Darwey, Dâ Jey Mwa a ye: “Ma sé wo susu na wo yɛnɛ mo, vit à dagwi hwak sɛ̌ me.

⁷Wa a sé sede me ɛ? Tik na a ha ano, tik na a dura, na a nɔng nuha mɛ e nuyel hom. E wà á ha na bes yi e raane pyɛ́ de yê té ɛ? Tik na yɛn a ha a wot pyɛ́ de ya rɔngɔl nà té.

⁸Hwo vo bengyip, kɛ hwo sap wɛt. Ma ga kana ha a yin yimo wɛshɛrɛk wɛt a? Yin a sé vê nuha hom! Dagwi hwak a sé sana me a? Vit a gwofwa gwohwak, ma tɔk gwohwak wɛt.”

⁹Mwa vemo de be yong cī ba sé yapyi, ko pyɛ́ de yɛn a vɔk yey pyɛng na yɛ ya vɔk pyɔlɔ wɛt. Vê sâp yɛ be bɛrɛng kɛ be tɔk wɛt, ko yaga ano bê vo rekyen.

¹⁰Yaga sɛ́ de bê yong dagwi kɛ bê turu ci de yê tɔk ra pyɛ cak wɛt ɛ?

¹¹Di, bê nɔ̂ng mwa bemât raa yɛ̄ rekyen, bemât yong pyɛ́ mo ba sé bemasi arɔng. Tik na mwa hɛn be tula hɛn, tik na yɛn a tumal, yɛn ê vo bengyip, mwa hɛn bê vo rekyen.

¹²Zu e yong yɛ̄, e turu yɛ na kyâ hwalang, e kyě dak yɛ na bamos ko e yong yɛ na gâp vwɔ mɛ, e wok vyong ko gap mɛ he tɛ́t ɛ, e sɔ nshi wɛt ko e yang ɛ gbɛrɛk.

¹³Mwât fwom cɔ́gɔt e mara cɔgɔt, e wɔrɔ yɛ na kwet, e tsep yɛ na tsɛ̀k, e masa bagap o, e yong yɛ sede mwasi na nerât mwasi sizɔng, na a bin wɔ̀ tik e dem rê fongol mɛ.

¹⁴E tow cɔgɔ̂t sida kɛ e kasa yè mátàng, kɛ ouk de ya ras naka na gap e ji cɔ́gɔt rehwot. E tus cɔgɔ̂t cɔ̀m ko rwak wo tɛ̀ ye ras naka.

¹⁵E bama mo e vɛ cɔ́gɔt na yɛ, e wok mɛ kya mɔɔ, e kyé mɛ kpam-tuk, ko e jut cak a yong mɛ dagwi, e re a yɛ fongol, e tsep ci na cak ko e tē á yɛ guduruk.

¹⁶E lolo kya na rebit o, e rangas mɛ nama, e re hɛ, a sirik. E wok kya mo mɔɔ ko e ye: “Ey yàa, ma ga wok mɔɔ, me wok nefɔɔ kya mo!”

¹⁷Bwang cɔgɔt o e yong mɛ dagwi, ci mɛ, e tē a yɛ guduruk na a re a yɛ fongol, e ra a yɛ won, e tē, “Séy me, e hwo à dagwi hom!”

¹⁸Yɛn a tɔk wɛt, yɛn e bare yɛɛlɛl wɛt, yaga bayis mɛn ba sé e banga, ko barê yey mɛn ha sé ano arɔng, yɛn a tɔk tɔk pyɛ cak wɛt.

¹⁹Vit a hwak de e bare, vit à wo tɔk na bɛ́rɛng pyɛ́ yɛɛlɛl de ê ye, “Ma pɛl kya na rebit o, ma halang kpam-tuk e ra hwalang o, ma rangas nama de ma ga re. A remo a sé naka na me jut bwang o na me yong mɛ pyɛ byɛm-byɛm a? A sé naka na me gaba e nuyêl kpɔk cɔgɔt a?”

²⁰Rê fongol mɛn ha sé sede rê fongol-pwɛ̀ng, yey mɛn ya ga kwɛlɛng hɛn na be ye rɛng yi e gwong, ko yɛn ê tɔk sey bato mɛn wɛt, kɛ be ye, “Pyɛ yemo e vwɔ yege hom ya sé bɔs zɔng wɛt a?”

²¹Dagwi Darwey a ye: “Bare pyɛ́ yemo à Yakɔp, na Israyɛl, yaga hwà sé mwât fwom hom. Ma yong o, hwà sé mwât fwom hom, À Israyɛl mê ye bam à hwo wɛt.

²²Ma ga gang neburu min sede rele, ko banɛn min sede wút. Toyo hin vey na me, yaga ma ga viri hin.”

²³“À lagwi, ra in a Dagwi Darwey lwɛlɛ, a ga ra ano. À nɛ̂n vwel, gbɔ in ngyat-ngyat! Ra in pee, à yin beraku, na yin bahwot, tanga mwa batîn cɔ́gɔt! Yaga Dagwi Darwey a ga viri Yakɔp, ko ê dura gbɔng nerat mɛ e Israyɛl.”

²⁴Dagwi Darwey, Wo viri mo, de a yong o e ji jim, a ye: “Me, Dagwi Darwey, ma yong pyɛ̂ mwa, me nju hom ma lasha lagwi. Jeng de ma yong jey, wà a sé tanga me ɛ?

²⁵Me buru neha bemât bɛ́rɛng, ko me tɛ̀ bevwoshon be sè betɔn, me dɔnɔ vê netsitsɛng, ko me tɛ̀ tɔ́k mɛn yapyi.

²⁶Me ye ey à neha mwat fwom hom, ko me tɛ̀ pyɛ de zarap hom a ha ye sila gyat. Mê yang Yɛrusalɛm, ‘Bemat bê to sangal e ji mo.’ Ko bapomô Yuda, ‘Bê to lɔk in, ko mê to ye cik à barin min.’

²⁷Mê yang gworep ciwil, na nerɔt mwa — ‘Ye in jɔng!’

²⁸Mê yang Sairus, ‘Hwà sé lwek hom, ko hwô ra mwa pyɛ de ma ga yong.’ Mê yang Yɛrusalɛm, ‘Bê to lɔk o,’ ko Gbɔng Duk Re Fongol, ‘Bê to bomo retis mo.’ ”