Read berom Yɛshaya 45 Bible Online

Yɛshaya 45 - berom bible

Yɛshaya 45

¹Hâ Dagwi Darwey à hemo vɔk na Sairus, gbɔng gwɔ̀m de a kasa, ko a shushu hɛ na něy: “Ma ga nɔ̂ng vwɔ yege mo gap, na hwo re yére bemat jey yê nuyel mo, na hwo sey ɛ̀ negwɔm o, mê wuma ri bavwel o gyam hwo wul, ano bê to bang rùhup o e nuyel mo wɛt.

²Mê kyè e nuyel mo, ko mê tɛ̀ beraku mó tas. Mê bunut ri dyam pama ko me kpɔgɔm bewɔ́rɔ dyam o.

³Mê nɔng o yas de ya sé e lɛrɛ mwangalang, na pyɛ̂ nedanerey de ba lɛrɛ e nekwɔn yaang, yaga na hwo tɔk, e me Dagwi Darwey pyɛ hom, Dagwi wo Israyɛl de ma yila hwo na reza mo.

⁴A sé yaga mwât fwom hom Yakɔp na Israyɛl de ma kasa, Ma yila hwo na reza mo, ko ma jut o na hwo sè hwey hom, mwa ano de hwà tɔk me wɛt.

⁵Ma sé Dagwi Darwey, ko vit a hwak hom, vit a dagwi hwak sɛ̌ me. Ma nɔng o pyɛ̂ como, mwa ano de hwà tɔk me wɛt,

⁶yaga na yɛn a tɔk, yi e nusû gwi, na yi e rwa ta, vit a hwak sede me, me wɛ à Dagwi Darwey, ko vit à hwak.

⁷Ma tɛ̀ negbey ko ma yong lwil, me nɔng nerat, ko me yong gawey, me Dagwi Darwey me ra pyɛ́ yemo mwa.

⁸Tik vwel he sila na necik sede rwak. Tik jey ye wunta hɛ, na ye sey neken. Tik sêy neken he wunta hɛ sede jamuk. Tik necik ne karak arɔng. Me Dagwi Darwey ma yong mwa yɛ.”

⁹Gawey e ra womo de e tó cuna na womo de a yong ɛ́, nerwèy secwem na mwât yông nɛ! Cwem hê yâng mwât râ fwom na hɛ̄: Hwà sé yong sɛ́ ɛ? kɛ: Pyɛ de hwà yong ya sé ryat wɛt a?

¹⁰Gawey e ra womo de e yâng da hwak: Hwà tɛ̀ sɛ́ e ji hwā mó ɛ? Kɛ a yâng hwā hwak: Yaga sɛ́ de hwà sé rus tɔ́ ɛ?

¹¹Dagwi Darwey, Wo Jɛrɛ wo Israyɛl, na wo yong ɛ́, a ye, “Hwô rangal me e ra nèy hom, kɛ hwô nɔng me nu e ra fwôm vɔ hom ɛ?

¹²Ma tɛ̀ jey, ko ma yong mwasi e ra yɛ. A sé vɔ hom de ba lasha lagwi, ko ma nɔ̂ng mwa bagyɛng yɛ nu.

¹³Ma dukta Sairus e ra gwông necik, ko mê tɛ̀ begwong mɛ be sè tɛ̀l, yɛ ê lɔk gbɔng repomo hom, na a hala bemat hom besam washak, ê ra ano yaga byɛ kɛ pyɔlɔ wɛt.” Dagwi Darwey, Dâ Jey Mwa a ye ano.

¹⁴Dagwi Darwey a ye: “À BeIsrayɛl, Yas Misra na pyɛ̂ byɛ̂ Etiyopya, na yê BeSeba de ba sé belis, bê vey na yin na be sè bemin, bê raa hin, bê vey na ngyang na be ye á yin guduruk. Yɛn ê ra won na yin, be ye: ‘Dagwi a sé na hwo nju mo, ko vit à dagwi hwak sɛ̌ yɛ.’

¹⁵Mwin, hwà sé Dagwi de e lɛsɛ tó mɛ, à hwo Dagwî Israyɛl, wo sêy bemat.

¹⁶Yɛn a ga vo rekyen, ko yɛn a ga tɛ́ ɛn pyɛ byɛs, mwa vê yông cī a sé a yɛn kpɛɛ.

¹⁷Ko BeIsrayɛl à, Dagwi Darwey a ga sey ɛn na a vɔk ɛn sana yɛnɛ. Yɛn ê vo rekyen, ko yɛn ê sè pyɛ byɛs neshey gbak-gbak wɛt.

¹⁸Yaga Dagwi Darwey, wo yông lagwi, yɛ a sé Dagwi, yɛ a tɛ̀ jey, ko a yong yɛ, a tɛ̀ yɛ gak, a yong yɛ na ye suk ɛ́ kpɛɛ wɛt, a yong yɛ na be sangal tyang e ji mo. Ma sé Dagwi Darwey, vit à hwak.

¹⁹Ma ha e neyaang, e vwêl mwangalang wɛt. Ma yâng yerê Yakɔp wɛt wɔgɔ, ‘Jama me hin e nekpɛɛ wɛt. Me Dagwi Darwey, me ha tsak o, me ha wɛshɛrɛk pyɛ de ya sé tyɛng.’ ”

²⁰“Tula hin, na yin a wuna hin, vey in bagat, yin bwang yére bemat jey! Yɛn a vɔk tɔk wɛt, yɛn de be kyě kyè na cī mɛn yê cɔ́gɔt, ko be kyě ra won na dagwi de e tɔk sey ɛn wɛt.

²¹Há in, tɛ̀ in kûn ha min, tik na be vo badu na bemɛn! E wà á kana ha ano raane ɛ? E wà à dura wɛshɛrɛk ano e bèkūk ɛ? E me Dagwi Darwey wɛt a? Vit a dagwi hwak sɛ̌ me. Dagwi wo cik, wo sêy bemat, vit a hwak sɛ̌ me.

²²Doyo hin vey na me na me sey in à mwa bemât yɛnɛ̂ jey! Yaga e me wɛ a Dagwi, ko vit a hwak.

²³Ma sira na tó hom, ma ha na necik ha de be sege hɛ wɛt wɔgɔ: Kawɛ mwat ê ye guduruk e nuyel hom, karɛ relem rê sira na reza hom zɔng.”

²⁴Kawɛ ê ye: “E ji Dagwi Darwey zɔng de be sɛ̀ wɛng na gap, sɛ̌ mwa vemo de bá kana ye zak à me ba vey na me na rekyen.

²⁵E ji Dagwi Darwey de yerê Israyɛl yê sɛ̀ wɛng na dâk kaa.”