Read berom Yɛshaya 46 Bible Online

Yɛshaya 46 - berom bible

Yɛshaya 46

¹Cī mɛn ye tē gyèndéng e ra bemadung na berɔndɔng Bɛl wa ye guduruk, ko Neba wa ye det. Cī mo ya sé dirik e ra yas de ya sé gbɛrɛk.

²Yé tē det, ko ye tē guduruk mwa yɛ, ko ye tɔk sey pyɛ́ de ya yang gyep yɛ wɛt, yɛ̄ pyɛ yɛ̄ yé kyè wɔ̂ sesam.

³Wet in betong na me, à yin yerê Yakɔp, yin mwa bwang yerê Israyɛl. Ma ga vɔk in naka yi e tɔ́ min, ma kyě kyè na yin yi e nusu min e jim.

⁴Vɔk e jeng kwopa min, mê sè Dagwi, sɛ̌ jeng shɔlɔ min, mê gyeng in. Ma yong in, ko mê gyep in, me pyɛ hom mê vɔk in, ko mê sey in.

⁵Yin ê wuna me na wà na wot sè tyɛng, na yin tyɛngrɛ hot sede wot a sé tyɛng ɛ?

⁶Vemo de be zugut dyam shinang yi e berabak, na be masa dyam pyɛng na pyɛ masâ nedirik, yɛn e jut zu dyam pyɛng e byɛ na a yong a yɛn mɛ dagwi, na yɛn a ye guduruk be re a yɛ fongol!

⁷Yɛn e jut yɛ̄ e rasanat na be kyè mɛ, yɛn e tik yɛ e kwɔ̂n yɛ, ko ye tumal e hwomo, ye tɔk ye ngyaram yi e dem o wɛt. Ka mwat a tosho á yɛ̄, ko ye toyo na pyɛ, kɛ ye sey mwat o yi e reyɔm wɛt.

⁸Bare hin na pyɛ yemo na yin a tumal ting, yin vê sogô nehywɛ, bɛrɛng hin yemo:

⁹Bare hin na pyɛ́ de yá té yimo raane, yaga ma sé Dagwi, vit à hwak, ma sé Dagwi, ko vit à hwak sede me.

¹⁰Yi e susu mo, ma dura pyɛ́ de yê té, ko yi e raane, ma ha pyɛ́ de ya rɔ́ɔ nà té, ma ye, “Pyɛ de ma tɛ̀ e yey, yê sè ano, ko mê sila pyɛ de ya sé e yey hom.”

¹¹Mê yila mwat sede gwonon rê banama yi e rwa rak, mwat de ma vɔk e yey, yi e vwêl yikyik. Pyɛ de ma ga ye, mê tɛ̀ ye té, pyɛ de ma ga yong, mê ra yɛ.

¹²Wet in betong na me, yin vê neyey kashalang, yin de yin a sé yikyik yi e tɔ̂k nerat hom.

¹³Mê vey bagat na yin na me sey in, ma sé yikyik wɛt, mê rɛn me wɛt. Mê tɛ̀ Siyɔn wo sè kwɔ̂n sêy neken, mê tɛ̀ Israyɛl a sè yere ye gbɔng nerat hom.