Read berom Yɛshaya 47 Bible Online

Yɛshaya 47 - berom bible

Yɛshaya 47

¹Dagwi Darwey a ye: Gyirik na hwo sangal e fongol, à zing-hwông Babilɔn! Sangal e vwel sana gwofwa negwɔm, à zing-hwông BeBabilɔn! Yaga bê to sang ye hwà sé hywɛ na mɛrɛk wɛt.

²Jut vwɔ̂ fwa na hwo hwongo mɛ pyɛ́, pat kerugû bâng to mo, hywɛrɛm hwo, hala bol mo pyot, ye dɔ à nerɔt o.

³Bê bɛrɛng nekpimit mo, ko bê di rekyen mo, mê tala hwo neves mo, ko mê tik hwak e ji mo wɛt.

⁴Wo viri mot — Dagwi Darwey, Dâ Jey Mwa, à reza mɛ — yɛ à Wo Jɛrɛ, wo Israyɛl.

⁵Sǎ yuu, na hwo lɛrɛ tó mo e lwil, hwo hwông BeBabilɔn! Yaga bê to yila hwo à gbɔng gwɔ̀m hwâ segwɔm wɛt.

⁶Ma tɛ̀ shom na bemat hom, ma kyini vê nedanelɔ hom, ma nára hɛn e vɔ mo, hwà wok nemwishish mɛn wɛt. E ra vemo de ba ga kwopos, hwà tɛ̀ pyɛ̂ nedirik e ra yɛn.

⁷Hwà ye, “Mê sè gbɔng gwɔ̀m hwā nesheneshey, ano hwá tɛ̀ pyɛ́ de yê vey e yey mo kɛ hwá bare yɛnɛ̂ yɛ wɛt.

⁸“A remo, wok, hwo de hwà kat simô neta, hwó sangal gyat, hwó tē e yey mo, ‘E me wɛ, ko vit a hwak sede me. Mê sè kuma kɛ mê tɔk rekû nèy wɛt.’

⁹Pyɛ́ bya yemo yê hwo e ra hwo, e kejeng tyɔng, e tuk hining: Rekû nèy na nekuma yê hwo e ra hwo kyip, mwa na yerê bes mo na gbɔng retô vyoshon mo.

¹⁰“Á sè a hwo gyat e de neves mo, hwá ye, ‘Vit à mwat de e bɛɛ me.’ Netsitsɛng mo ná tɔ́k mo ná tɛ̀ hwo ye rɛng, ko hwá ye e yey mo, ‘E me wɛ, ko vit a hwak sede me.’

¹¹Sana tɔk neves nê hwo e ra hwo nemo de hwô tɔk ra hwâl nɛ̀ wɛt. Gawey hê hwo e ra hwo, hemo de hwô tɔk gang e jey wɛt, ko reyɔm rê hwo e ra hwo hák, de hwà tɔk pyɛ cak e ra rɛ wɛt.

¹²“Ci na tô bes mo, na nepyak balów mo, de hwá pɛngɛ hwo e ra yɛ yi e newen mo, gyeng hwô kyɛm hwo di wɛng, gyeng hwô shisa hɛn mɛ.

¹³A sé a hwo gbɛrɛk na nepyak vôs badu mo, tik vemo de be ngyɛgɛt lagwi be sogo na be sey o, vemo de be bɛrɛng netangacɛn, ko e kagwɛ pwɛl pwas be ha pyɛ de yê té na hwo.

¹⁴“Di, yɛn a sé de cugul, kya he re ɛn, be tɔk sey bato mɛn yi e retô balêm kya mo wɛt. Ha sé kyâ wôk nemɔɔ wɛt, e kyâ sangal bagat na hɛ wɛt!

¹⁵Ano de bevwoshon o bê sè a hwo, yɛn de yin á pɛngɛ hîn fwom na yɛn yimo newen min, kawɛ a ga kaba gwong mɛ, vit a winde ê sey o.”