Read berom Yɛshaya 48 Bible Online

Yɛshaya 48 - berom bible

Yɛshaya 48

¹Wet in betong na ha hemo, à yin belɔ Yakɔp, de bé yila hin na rezâ Israyɛl, ko yin a raa yere min yi e Yuda, Yin e sisa na rezâ Dagwi Darwey, ko yin e ra won na Dagwî Israyɛl, mwa ano de yin e ra ano na tsak o, kɛ necik wɛt.

²Yaga yɛn e tâng bato mɛn à bemât gbɔng pomô jɛrɛ, ko be tē yɛndɛng e ra Dagwi wo Israyɛl, Dagwi Darwey, Dâ Jey Mwa à reza mɛ.

³Pyɛ́ de ya ga kwey a remo, ma dura yɛ wɛshɛrɛk raane, yá nusu yi e nu hom, ko ma tɛ̀ be tɔk yɛ, ma ra yɛ ziri, ko ya ga kwey.

⁴A remo de ma tɔk yin a sé gbàrak, ko tɔ min ba sé sede rwinîs dyam, ko batili min sede dyam pama.

⁵Ma dura a yin yɛ raane, gyam na ye té, ma ha a yin yɛ, yaga na yin a bin ye wɛt wɔgɔ, “E ci hom de ya ra yɛ̄, pyɛ de ma tsep, na yemo de ma turu ya nɔng nu e ra yɛ̄.”

⁶Yin a ga wok, na yin a ga di pyɛ́ yemo mwa, ko yin ê dura yɛ̄ wɛt a? E ngamo nuyel, mê tɛ̀ yin wok pyɛ́ pyas, pyɛ̂ lɛrɛ de yin a kana tɔk wɛt.

⁷Bá yong yɛ raane wɛt, a sé mɛsɛng yong yɛ a remo, Gyam yunung yin a ga sang wok yɛ wɛt, ano yin ê tɔk ye wɛt wɔgɔ, “Ma kana tɔk yɛ.”

⁸Yin a ga sang wok, kɛ yin a ga sang tɔk wɛt, yimo raane betong min bá sè pyot wɛt. Yaga ma tɔk yerê kwɛlɛng mo, ko bá yila hwo à wo sogô nehywɛ yimo tɔ mo.

⁹Yaga reza hom ma ka tik shom hom, yaga nerey hom mê niri na yin, yaga na me kyini hin wɛt.

¹⁰Di, ma ga rugut hin, ko sede dyam pyɛng wɛt, ma ga mara hin e kyâ ju, e kyâ ju hê reyɔm.

¹¹Yaga me, me pyɛ hom me ra ano, yaga sɛ́ de bê tɛ̀ reza hom ligis ɛ? Mê nɔ̂ng hwak gbɔng nerat hom wɛt.

¹²Wet in betong na me, à yerê Yakɔp, na BeIsrayɛl de ma yila! Ma sé Dagwi, ma sé wo susu mo, ko ma sé wo yɛnɛ mo.

¹³Vwɔ hom gwa bomo retîs jey, ko vwɔ yege hom gwa lasha lagwi, sede ma yila hɛn, yɛn e tumal ting.

¹⁴Tula hin mwa hin, wok in! Wa e ji mɛn de a dura pyɛ́ yemo ɛ? Dagwi Darwey a tɛ̀ yey na mwât fwom mɛ. Yɛ̀ ê ra pyɛ de a simo e ra Babilɔn, ko vwɔ mɛ gwô gawey gwô sè e ra BeBabilɔn.

¹⁵Ey, e me, e me de ma hanat, ma yila hɛ, ma ga vey na yɛ, ê di wɛng e begwong mɛ.

¹⁶Vey in bagat, wok in! Yi e susu mo, ma ga ha e lɛrɛ wɛt, jeng de pyɛ́ mo yá té, má sè e hwomo, ko a remo, Darwey Dagwi Darwey, a ga tomo me tanga Gabik mɛ.

¹⁷Dagwi Darwey wo viri hin, Wo Jɛrɛ wo Israyɛl a ye: Ma sé Dagwi Darwey, Dagwi min, womo de e basa a yin, yaga nerat min, womo de e kyè na yin e gwong de yin ê kwey ɛ.

¹⁸Káa, ka yin a wet betong na badu hom! Ka nerey min nà yang sila sede rɔt, ko wɛng min ha yang hwo na gap sede bagun nshî gworep.

¹⁹Nèy min na yâng sè pyak sede bazɛk, ko yére min ye sè bɛɛrɛ sede yenêng bazɛk o. Bê sang fugut, kɛ be wey na reza mɛn e nuyel hom wɛt.

²⁰Nusu hin yi e Babilɔn, tele hin yi e Babilɔnya. Dura hin ano na môk yey pyɛng, shara hin ha mo mwa. Tomo hin hɛ vɔk e neyɛnɛ̂ jey, yē in, “Dagwi Darwey a ga viri Yakɔp mwât fwom mɛ.”

²¹Yɛn á wok yêy hwɔshɔ jeng de ma kyè na yɛn e hêy gbingiring wɛt. Á tɛ̀ nshi ne tele a yɛn yi e gwofwa, á vugu gwofwa mo, ko nshi ná dɔng.

²²Dagwi Darwey a ye, “Vit à yêy dyɛngɛ na vê ragas neves!”