Read berom Yɛshaya 49 Bible Online

Yɛshaya 49 - berom bible

Yɛshaya 49

¹Wet in betong na me, à yin bemât bakwogom mwa! Tɛ̀ in nehywɛ, à yin bemât yikyik! Dagwi Darwey á yila me gyam tɔ́ hom, á vo a me reza, jeng de ma sè rɔngɔl e jim neng hom.

²A yong nu hom hywɛ sede wâl vootot, a lɛrɛ me e necam vwɔ mɛ. A yong me hywɛ sede kwet de ba turu gyat, a lɛrɛ me sede e zing ket mɛ.

³Ko a yang me, “Hwà sé mwât fwom hom, Israyɛl, de e tɛ̀ a me gbɔng nerat.”

⁴Ko ma ye, “Ma yɔ́m me e de fwom, ma ga wey na gap hom e ra yapyi. Mwa ano, hâ dûl to hom hê yi na Dagwi Darwey, ko pyɔlɔ hom yê yi na Dagwi hom.”

⁵Dagwi Darwey de a yong me e jim na me sè mwât fwom mɛ, na me toyo na yére Yakɔp na yɛ, na be to wuna BeIsrayɛl na yɛ, yaga ma vɔk nerey e bayîs Dagwi Darwey ko Dagwi hom a ga tɛ́ ɛ gap hom,

⁶e tē: “À mwât fwom hom, a sé pyɛ begelek de hwô ye cik a yerê Yakɔp zɔng na hwo to toyo na bwang BeIsrayɛl. Mê nɔng o sede negbey na yére bemât jey mwa, na sêy neken hom he wul neyɛnɛ̂ jey.”

⁷Dagwi Darwey, wo virî Israyɛl, na Wo Jɛrɛ mɛ a yâng vemo de ba sé besam begwɔ̀m de ba byɛnɛng hɛn, vemo de ba kyɛ́ ɛn hɛn. “Begbɔng begwɔ̀m bê di, pyɛ de yin a tɛ́ in, ko bê sogo e tumal, begwɔ̀m tanga yɛn bê ye guduruk, yaga Dagwi Darwey de a sé tsak o, Wo Jɛrɛ wo Israyɛl, de a kasa hin.”

⁸Dagwi Darwey a ye: E jeng de yê jám a me, mê wok won min, e tûk sêy neken mê sɛlɛ hin, mê gyeng in, mê nɔng in vɔk na bemat o sede pyɛ durâ wuna-na-sira hom, na yin a to yong vwel o, na yin a to toyo na benap de ba ga lashe vɛ,

⁹na yin a yâng bemât ngyang, “Nusu hin.” vemo de ba sé e ji lwil, “Vey in na wot a di in.” Yɛn ê kyě re pyɛ́ e bahagât begwong sede tyīmit, ko nedem sehwey mɛn nê sè berahwol mwa.

¹⁰Yɛn ê wok vyong kɛ yêy hwɔshɔ wɛt, ko nevɛ̌t gwi kɛ gul nê mǎ hɛn wɛt, yaga yɛ de e wok nemwishish mɛn ê kyè na yɛn, ko ê gyep yɛ vɔk e lel nshi.

¹¹Ko mê doyo mwa beraku be sè gwong, ko mê yong gbɔng gwong hom e rak o.

¹²Di! Yɛn à vemo vey pom yi e nedem yikyik, ko di, vemo yi e rwa rak na rwa ta, na vemo yi e vwêl Sinim.

¹³Ra in lwɛlɛ̂ yey pyɛng, à belagwi, na yin somo hɛ, à jey. Takla hin lwɛlɛ̂ feng, à beraku! Yaga Dagwi Darwey ê wɔrɔk bemat mɛ, ko ê tosho reyɔ̂m bemat mɛ de be tak a yɛn.

¹⁴Ko bemât Siyɔn be tē, “Dagwi Darwey a ga ye waa à hot, Darwey mot a ga ye bam à hot.”

¹⁵Bare hin na hwā, ê tɔk ye bam a hwey de e ngas, kɛ a tik nà tosho reyɔ̂m hwêy jim mɛ a? Ko ka hwā a ye bam à hwey mɛ, ko mê ye bam à hin wɛt.

¹⁶Di, ma ga jining hin e tas vɔ hom, bejwâ-pomo mo ba sé e bare hom kayɛ jeng.

¹⁷Bemât lɔk mo bê kwey vê gangas o, vê wey na hwo bê kwɔ̂k kyè.

¹⁸Jut bayis e rak o na hwo gwɔrɔ na bɛrɛng, bemat min ba sé tula hɛn mwa, be kyè vey na hwo. Dagwi Darwey a ye: Ma sira na tó hom, hwô vɔk yey pyɛng na yɛn mwa sede dyéngere ryat, sede gwel, hwô tɔrɔ hwo na yɛ̄.

¹⁹Mwin, nekwɔn min de ba ga lashe, na barin min, na vwel min de ba ga wey na hɛ, a remo kwɔn o hê radɛ yaga bemat min de bê sangal ɛ, ko vemo de bá wey na yin bê wɛrɛn yikyik.

²⁰Nèy de ba tɔ e jeng sesam, nê ba yang o, “Kwɔn o ha ga radɛ a wot, nɔng ot kwɔn na wot a sangal ɛ.”

²¹Ko hwô ye e yey mo, “E wa de a tɔs a me nèy nemo ɛ? Nèy hom na weres, ko ma tɛ́ me sang-gwon. Ba pat me yi e lɔ hom, vɔk e de sesam, ko e wa de a ras nèy nemo ɛ? Bá hala me gbɔ́rɛy, ko nèy nemo na yi e gwa ɛ?”

²²Darwey Dagwi Darwey a ye: “Di, mê nára vwɔ hom e rak o na me yila yére bemât jey, mê pɛl durum hom vɔk na bemat, ko yɛn ê vey na nèy bewen min e beragey mɛn, ko bê jut nèy behwong min e ra sanat mɛn.

²³Begbɔng begwɔ̀m bê sè a hwo beda mo, ko beha-berêy begwɔ̀m, beneng mo. Na bato det yɛn ê ye guduruk e nuyel mo, na be lɛlɛ fongôl bol mo. Ano de yin ê tɔk, me wɛ à Dagwi Darwey, ko vemo de ba sɛt bayis e ra me bê vo rekyen wɛt.

²⁴“Bê tɔk sey ɛ̀ pyɛ̂ jugu yi na mwât como, kɛ sam como yi e vwɔ̂ suga a?”

²⁵Ko Dagwi Darwey a ye: “Ey, bê sey ɛ̀ pyɛ̂ jugû mwât como, na sam como yi e vwɔ̂ suga. Me pyɛ hom mê ra yol na bemât yol min, ko mê sey nèy min.

²⁶Mê tɛ̀ vê tak a yin be re banamâ rebek mɛn pyɛ mɛn, ko nemi mɛn nê vo ɛn sede nshî anap. Ano kawɛ mwat ê tɔk, me wɛ à Dagwi Darwey, wo sey in, na wo viri hin, Wo Reto Mwa wo Yakɔp.”