Read berom Yɛshaya 5 Bible Online

Yɛshaya 5 - berom bible

Yɛshaya 5

¹Wet in betong na me ra lwɛlɛ hom, lwɛlɛ̂ sâ yey hom na bwî anap mɛ: “Sa hom a vɔk bwî anap e rahwol de wa siri tyɔng wɛt.

²A tow bwi mo ko a paa ɛ̀ beta, a tus ɛ̀ batîn anap de ba dal mwa na nerat. A lɔk tyɔ̌n bɛrɛng bwi mo, a kas revɔng farâng nèy anap o. E bama mo a de gyeng vêl nèy anap o, ko kahɛ hwêy anap o ha de sé jwaatat!

³À yin bemât Yɛrusalɛm na BeYuda, ra in shɔt e tē hom na bwî anap hom.

⁴Pyɛ cak ya sé de ma tik nà ra a gwɛ a? Ko yaga sɛ́ de gwa mara nèy de na sé jwaatat e tô nèy nerat de ma tɛ̀ yey mê sɛ̀ ɛ?

⁵Di in pyɛ de mê ra a bwî anap hom o: Mê tow yép de ma gwɔrɔ mɛ gwɛ, me gangas jwa de ma dul gwɛ na wɛ, na me tik ngyāma ye re nèy o, na ye pigis gwɛ na bol yɛ.

⁶Mê tik bèsɔng be vo gwɛ. Mê yong batîn anap o wɛt, kɛ me pwigis gwɛ wɛt. Mê tik shik na serɔgɔ be bang gwɛ. Mê tusa bale nà tik rwak wo rop e ra gwɛ.

⁷Bwî anâp Dagwi Darwey, Dâ Jey Mwa gwɛ à BeIsrayɛl, BeYuda vɛ à batin anap de a tus o. A jama gas e tē, ko a sɛ̀ lashê yey; A jama râ necik ko a sɛ̀ begbik.”

⁸Gawey e ra yin! Yin e gwɛsɛ lɔ na lɔ; hwiri na hwiri. E bamâ jeng bê sɛ̀ kwɔ̂n sangal wɛt, sɛ̌ yin nju min e vwel o.

⁹Ma ga wok de Dagwi Darwey, Dâ Jey Mwa a ye, “Pyak e ji bègbɔng belɔ berat vemo bê sè hal vit à mwat.

¹⁰Bwî anap gwô begàng cap betungun bê nɔng nshî anap tsung gwining zɔng. Gwoshit yére pyɛ́ gwining gwô nɔng yenêng pyɛ́ dap gwining zɔng.”

¹¹Gawey e ra yin! Yin e sogso bop nagasi na yin hwo jama siring, ko yin e rɔ̌ simo nshi anap pere vɔk e nawiri.

¹²E jeng nzem min, yin e ra lwɛ̄lɛ na yom kwo, na yom shi, na kebing na ju tanga nshî anap. Ko yin e di nerât fwôm Dagwi Darwey wɛt.

¹³Yaga ano, netɔ̌n bemat hom na ga tɛ̀ be tɛ́ ɛn besam. Vyong ye vos bemât nuyel min, ko yêy hwɔshɔ ye wey na bwang bemat min arɔng.

¹⁴Jêy bevuvwel ya sé gyéng ɛn zii, ko ya ga wunta nû yɛ tɔɔng ye gyeng ɛn mɛ. Yé wɔlsɔk Yɛrusalɛm mwa — bemât nuyel, na bwang bemat, na gbɔng regyɛng de ra shusha jɔngɔl, na vemo de be ra nzem.

¹⁵Ba rɔda tɛ̀ a kawɛ e ji mɛn rekyen, — begbɔng bemat tanga bwang o, ko mwa vemo de be dak kaa bê tɛ̀ yɛn a dyɛng bato mɛn.

¹⁶Ko Dagwi Darwey, Dâ Jey Mwa, e dura gbɔng nerey mɛ yi na gas e tē mɛ, ko Dagwi Wo Jɛrɛ e dura nejɛrɛ mɛ yi na necik mɛ.

¹⁷Bemat hom sede tyimit bê to re sehwey e kwɔn rat, ko nèy vyēl nê sɛ̀ pyɛ́ e nekwɔn de berɔndɔng de ba mɔsɔ ba ga kana wey mɛ.

¹⁸Gawey e ra yin! Yin e ra fwom na gap min na yin a ra banɛn sede yin a sé hwɔlɔ vɛ na rǐk.

¹⁹Yin e tē, “Tik na Dagwi Darwey a ra dey na a ra pyɛ de a ye ê ra, na wot a bin di yɛ. Tik na Dagwi WoJɛrɛ, wo Israyɛl a ra yɛ ziri!”

²⁰Gawey e ra yin! Yin e yila pyɛ́ vyes à ryat, ko pyɛ́ ryat à vyes. Yin e doyo lwil gwo sè negbey ko negbey ne sè lwil. Yin e tɛ̀ pyɛ̂ jwaatat ye ta, ko yê ta yɛ sè jwaatat.

²¹Gawey e ra yin! Yin e bare, yin a vɔk netsitsɛng, yin a vɔk tɔk tyɔng wɛt.

²²Gawey e ra yin! Yin a sé besugâ sɔ̂ nshî anap! Yin a vɔk yey tîng purû siring!

²³Yin e yila mwat vwes à mwat de a sé cik yaga dyâm bâng nu, ko yin e kyɛ́ in nà di necik mwat de a sé cik.

²⁴Sede remo de cugul na sɔng hwogot gwo gunus hɛ jeng de kya ha sé re gwɛ, ano arɔng bê wey na yin. Yin ê sè sede cɔgɔt de berinis o bê bɔsɔ, ko cúyu mo yê hworok ye gabsa. Ê sè ano yaga yin a ga kyɛ́ in basâ Dagwi Darwey, Dâ Jey Mwa, yin a ga byɛs hâ WoJɛrɛ, wo Israyɛl.

²⁵Dagwi Darwey a vɔk shom na bemat mɛ, ko a ga nára vwɔ mɛ na a tabak hɛn mɛ. Beraku bê digis, ko bê hala bavîn vemo de ba ga kushu e nehyok sede serwik. Mwa ano, shôm Dagwi Darwey yê ye rɔ̀s wɛt, ko vwɔ mɛ gwô sè e nára na gwo tabak hɛn.

²⁶Dagwi Darwey ê nára tuta na a yila yerê bemat jey yè yikyik. A ga pɛl durum na yɛn a vey yi e yɛnɛ̂ jey. Di, yɛn à vemo ba sé pomos ziriziri!

²⁷Vit a hwak de a ruru. Vit a hwak de a tiri bwol. Vit a hwak de ê vos nevwa, kɛ ê wɔ̂ nɛ wɛt. Gyindî hwak wa viri hɛ wɛt. Retsɛ̂p kpatâk hwak ra tut ɛ́ wɛt.

²⁸Ket mɛn ba sé myóm-myom, ko begbang mɛn ba sé gyat. Bèkwok bol bedwa mɛn ba sé gbarak sede besūlùp, ko bol bekyɛkyɛ̂ bedwa mɛn be tele hyiw sede wúla.

²⁹Bemât como mɛn be lulum sede begukum de ba ga mɔrɔ ngyama ko ba sé kyè mɛ vɔk e fwara, vit à mwât sêy yɛ.

³⁰E jeng o, yɛn ê lulum e ra Israyɛl sede wûs gworep. Bɛrɛng hin vwel hemo! Lwil na rezot! Negbey na ga tɛ́ ɛn lwil na bale.