Read berom Yɛshaya 50 Bible Online

Yɛshaya 50 - berom bible

Yɛshaya 50

¹Dagwi Darwey a ye: “À nèy hom, bwok-rwang gâs wenêng neng-gwɔ mo a gwɛ̀, de ma tɛ̀ ɛ e gwong na gwɛ ɛ? Kɛ na wɛ̌ mwat de e rangal me dyām de ma row in ɛ? Wey, a sé yaga banɛn min de ba row in, ko a sé yaga neburu min de ba tɛ̀ neng min e gwong.

²Yaga sɛ́ de vit à mwat e hane jeng de má vey ɛ? Yaga sɛ́ de vit a mwat de á toyo mɛ̀ jeng de ma yila ɛ? Vwɔ hom gwa sé bwit de gwô tɔk viri wɛt a? Kɛ ma vɔk gâp sey in wɛt a? Di, na gyong zɔng me tɔk tɛ̀ gworep gwo hworok, me tɛ̀ nerɔt gbingiring. Betɔk mɛn be bɔsɔ yaga nevît nshi, be kushu na yêy hwɔshɔ.

³Ma tɛ̀ a jey nesi sede rugu, ko ma bang ɛn na rugû sesin.”

⁴Darwey Dagwi Darwey a nɔng me lêm mwât basa na me tɔk wɔrɔk vê gbɛrɛk. Nagasi na nagasi e sensa me na me wok, na me wet betong sede nèy basa a yɛn.

⁵Darwey Dagwi Darwey a ga yong me na me wok ha mɛ, ko ma sogo nehywɛ wɛt, ma doyo na bama wɛt.

⁶Ma hala mā hom na vê dak me, ko ranang hom na vê luyû negyɛk hom. Ma lɛrɛ bayis hom yi e vê dusa me wɛt, ko ma hala vê tulus me na netey.

⁷Darwey Dagwi Darwey e sɛlsɛ me, yaga ano ma ga tɛ́ me pyɛ byɛs wɛt. Ano ma ga sɛt bayis hom sede sulup, ko ma tɔk bê nɔng me rekyen wɛt.

⁸Yɛ̀ womo de e ye ma sé cik, a sé bagat! Wa ê tɛ̀ kun hom ɛ? Tik na wot a tumal na yɛ! Beva à bemât repugu hom ɛ? Tik na yɛn a vey sɛ̀ me!

⁹A sé e Darwey Dagwi Darwey de e sɛlsɛ me, e wa de ê dura, ma vɔk nɛn ɛ? Mwa hɛn bê wey sede rugu, tangapurus wô ré ɛn vit.

¹⁰Wɛ e ji min e wok bengyip Dagwi Darwey, na a gyeng fwɔ̂ mwât fwom mɛ ɛ? Wɛ e ji min e kyè e lwil, sana di negbey ɛ? Tik na a tɛ̀ gap mɛ e ji rezâ Dagwi Darwey, na a ye yɛndɛng e ra Dagwi mɛ!

¹¹Di, mwa yin de yin e pɛl kya, ko yin tɛ̀sɛ kya de he tabas, kyè in e negbêy kya min o, na e tê hê tabas de yin a pɛl o! Pyɛ de yin ê sey e vwɔ hom à: Rezot zɔng!