Read berom Yɛshaya 51 Bible Online

Yɛshaya 51 - berom bible

Yɛshaya 51

¹Wet in betong na me, yin de yin e tē ngyɛ́k e necik, yin de yin e jama Dagwi Darwey. Bare hin gwofwa de ba tow in yi e gwɛ, na kwɔ̂n dâk beta de ba cing in ɛ.

²Bare hin na Abraham da min, na Sara de a tɔ in. Jeng de ma yila hɛ, á sè yɛ nju mɛ, ma tɛ̀ a yɛ nerat, ko ma tɛ̀ a karak.

³Mwin, Dagwi Darwey ê wɔrɔk Siyɔn, ê wɔrɔk bemât barîn hɛ. Ko ê tɛ̀ hêy hɛ he sè sede bwî Ɛdɛn, hêy gbingirîng hɛ sede bwî Dagwi Darwey. Bê sɛ̀ yey pyɛng na shɛgɛsh e ji hɛ, feng na fwɔ̂ lwɛ̄lɛ arɔng.

⁴Tɛ̀ in nehywɛ na me, à bemat hom, na yin a wet betong na me, à yerê bemat hom yaga redu rê nusu yi na me, ko gâs badu hom e tē hê sè negbêy bemat.

⁵Gâs badu hom ha ga vey lɛs, sêy neken min ha ga nusu wɛshɛrɛk, ko vwɔ hom gwô vey na shɔt e ra bemat. Bemât bakwogom mwa bé gyeng me, ko yɛn e sɛt yey mɛn e ra vwɔ hom.

⁶Jut in bayis min vɔk e lagwi, na yin a bɛrɛng jey e nɛn o arɔng. Yaga lagwi wô ye bit sede kyeng, jey yê hama hɛ sede rugu, vemo de ba sé e ji yɛ bê kushu sede ngyána. Sêy neken hom hê sè gbak-gbak, ko viri hom hê sang yɛnɛ hɛ wɛt.

⁷Wet in betong na me, yin de yin a tɔk necik, yin bemat de yin a vɔk basa hom e neyey min, yin wok bengyip gyông bemat wɛt, ko yin langat hin yol behak wɛt.

⁸Yaga tangapurus wô re ɛn sede rugu, ko kǔt gwô re ɛn sede shwey, Víri hom hê sè nesheneshey, ko sêy neken hom vɔk na bezamang pyak.

⁹Sene, sene, tɛ̀ gap, à Dagwi Darwey! Sene sede jeng raane, bezamâng raane! E hwo de hwà yɛt Gwalwêl Nshi cɛk o cɛk o, hwà luga gwalwel wɛt a?

¹⁰E hwo de hwà tɛ̀ gworep gwo hworok, nshi de na sé ciwil. Hwà tɛ̀ retîs gworep re tɛ́ ɛ gwong, na vemo de hwà kana viri be ye dɔ.

¹¹Ano vemo de Dagwi Darwey a viri bê toyo, ko bê vey e Siyɔn na lwɛlɛ, bê vɔk yey pyɛng sana yɛnɛ, yɛn ê sɛ̀ yey pyɛng na seshɛgɛsh, ko lashê yey na vôs yey yê tele e jey.

¹²Dagwi Darwey a ye: “Me, e me wɛ me wɔrɔk hin, yaga sɛ́ kwong de yin e wok bengyip mwasi zɔng de ê ku, mwasi de ê wey sede sɔng ɛ?

¹³Yin a ga ye bam à Dagwi Darwey, de a yong in, yɛ de a shara lagwi, ko a bomo retîs jey. Yin e sǎ e de bengyip pere wɔ̀ bomo gwi, yaga shôm wò tak a yin, womo de a tɛ̀ to mɛ e de wey na yin. Ko shôm wò tak a yin o á yɛ ɛ?

¹⁴Bê viri vê reyɔm dey-dey, yɛn ê kushu na be kyè vɔk e revɔng wɛt, ko yɛn ê bidɛ kpam-tuk wɛt.

¹⁵Me wɛ à Dagwi Darwey, Dagwi min, de e suk nshî gworep na bagung o be lulum — Dagwi Darwey, Dâ Jey Mwa à reza hom.

¹⁶Ma ga tɛ̀ neha hom e nenu min, ko ma lɛrɛ hin e necam vwɔ hom. Ma shara lagwi, ma bomo retîs jey, ko ma yâng bemât Siyɔn, ‘Yin à bemat hom.’ ”

¹⁷Sene, sene! Sogo e tumal, à hwông Yɛrusalɛm, hwo de hwà ga sɔ keshi shom e vwɔ̂ Dagwi Darwey, hwà ga sɔ vɔk e cet o, shǐ té dèndes.

¹⁸Vit à hak de hê gyeng ɛ́, e ji mwa nèy de a tɔs. Vit à hak de hê kaba a yɛ vwɔ, e ji nèy de nà ras e vwɔ mɛ.

¹⁹Pyɛ́ bya yemo ya ga hwo e ra hwo: Gawey na lashê vwel mo, vyong na wal, wa ê wok nemwishish mo, kɛ wà ê wɔrɔk hwo ɛ?

²⁰A ga yâng nèy mo cwɛ̀ɛ, yɛn a dyɛngɛs e tô kahɛ hyok sede vow e segun. Yɛn a sila na shôm Dagwi Darwey, na gyông Dagwi mo.

²¹Yaga ano, wet in betong, yin de ba ga mǎ hin, de yin e feng, ko na nshi anap wɛt.

²²Ano Darwey min, Dagwi Darwey, Dagwi min de a tumal a bemat mɛ e ra ha mɛn, a ye: “Di ma ga sey yi e vwɔ min keshi té dèndes. Yin ê to sɔ ko tyɔng wɛt, yi e shǐ shom hom.

²³Ko mê tɛ̀ shǐ shom hom o e vɔ vê tak a yin reyɔm, yɛn de ba yang in, ‘Ye in ngyuk, na wot a kyè e ra yin.’ Ko yin a tɛ̀ nèma min sede vwel, tanga sede hyok de yɛn ê kyè ɛ.”