Read berom Yɛshaya 52 Bible Online

Yɛshaya 52 - berom bible

Yɛshaya 52

¹Sene, sene! Tɔrɔ hwo na gap à Siyɔn! Tɛ̀ berugu mo de ba dal na nerat, à Yɛrusalɛm, gbɔng pomô jɛrɛ, yaga bemandul na vê ligis bê to yel e ji mō wɛt.

²Pagat búm mo, sogo, à Yɛrusalɛm de ba ga vo e sesam! Viri ngyang yi e fwɔ mo, à hwông Siyɔn de ba ga vo e sesam!

³Dagwi Darwey a ye, “Ba row in e ra dyām wɛt, ko bê viri hin na dyām arɔng wɛt.”

⁴Darwey Dagwi Darwey a ye, “Raane bemat hom bá wɔ̀ sangal e vwêl Misra sede bekɛnɛt, ko BeAsirya arɔng bá tak a yɛn reyɔm sana tin.”

⁵Dagwi Darwey a ye, “À bemat hom, yin a sé ra sɛ́ e ngamo à remo de ba ga hashe hin sana tin ɛ? Bemât nuyel min be dak kaa, ko be wusal e de byɛ̂s reza hom kahɛ tuk.

⁶Yaga ano, e jeng de ye kyè vey, mê tik na bemat hom be tɔk reza hom. E jeng o, yɛn ê tɔk, e me de me ha: Me à womo!”

⁷Sɛ́ ya dal na nerat na be di tom de e kyè vey e beraku, tom yɛgɛt yat, e ha hâ yêy dyɛngɛ, tom yɛgɛt yat e ha hâ sêy neken, e tâng Siyɔn: “Dagwi mo e re negwɔm.”

⁸Wet betong! Bemât gyeng mo be gbɔ, mwa hɛn be ra lwɛlɛ̂ yey pyɛng, yaga yɛn e bɛrɛng wɛshɛrɛk tóyo Dagwi Darwey vey e Siyɔn.

⁹Takla hin mwa na lwɛlɛ, à yin barîn Yɛrusalɛm! Yaga Dagwi Darwey a ga wɔrɔk bemat mɛ, a ga viri Yɛrusalɛm!

¹⁰Dagwi Darwey a ga dura wɛshɛrɛk vwɔ mɛ gwô jɛrɛ e bayîs yére bemat jey mwa. Ko neyɛnɛ̂ jey mwa nê di sêy nekên Dagwi mot.

¹¹Kyè in, kyè in, nusu hin yi e vwêl Babilɔn! Ra in pyɛ ligis cak wɛt. Nu in yi e tê yɛ̄, fung in bato min, yin de yin e hashe pyɛ̂ Gbɔng Duk Re Fongôl Dagwi Darwey.

¹²Ko yin nu in na nefufǔl wɛt, yin nu in na tele wɛt, yaga Dagwi Darwey ê kyè e nuyel min, ko Dagwî Israyɛl ê bang a yin ma.

¹³Di, mwât fwom hom ê vɔk wɛng, bê nɔng ɛ nerey, bê jut ɛ tɛ́rɛ̄, ko ê sè e rak o sizɔng.

¹⁴Sede remo de á sè a bemat kpɔrɔk na yɛ, bá mǎ hɛ sizɔng, bá tɔk tɔk ɛ wɛt, á to sè sede mwasi wɛt.

¹⁵Ano yére bemat jey pyak yê langat hɛn hɛ, begwɔ̀m bê ban yuu e nuyêl mɛ, yaga yɛn a ga di pyɛ de ba kana ha a yɛn gyam wɛt, ko yɛn ê tɔk retin pyɛ de yɛn a ga kana wok wɛt.