Read berom Yɛshaya 53 Bible Online

Yɛshaya 53 - berom bible

Yɛshaya 53

¹E wa ê yâng sey tsak o na pyɛ de wot a wok ɛ? Na beva de ba ga yâng di vwɔ̂ Dagwi Darwey e pyɛ́ yemo ɛ?

²A ras e nuyel mɛ sede kecɔgɔt, sede shɛshɛ e vwel hwogot. A vɔk nerey nehak kɛ nerat de nê tɛ̀ wot bɛrɛng hɛ wɛt. Vit a pyɛ cak e bɛrɛng mɛ de yê tɛ̀ wot simo di ɛ.

³Ba byɛnɛng hɛ ko behak ba ye zak à hɛ, mwât rezot, a ga tɔ́k ɛ na nerɔ, sede hwak de be doyo bayis yi na yɛ, ba byɛnɛng hɛ, ko wot a jut ɛ a sé pyɛ cak wɛt.

⁴Mwin a ga hashe nerɔ mot e rato mɛ, ko a ga jut nedirîk reyɔm mot. Wot a bare e Dagwi de a tabak hɛ, e Dagwi de a dak ɛ, a tak a yɛ reyɔm zìgit.

⁵Ko nerɔ mɛ na sé yaga sogô nehywɛ mot, ba tɛ̀ a yɛ rezot yaga banɛn mot, a sé yi na tak a yɛ de wot a sé gyat, ko yi na baram mɛ de wot a ga tɛ̀ tyang.

⁶Wot mwa sede tyīmit wot a ga vuru gwong, kawɛ e ji mot a ga doyo e gwong mɛ, ko Dagwi Darwey a ga tɛ̀ banɛn mot mwa e ra yɛ.

⁷Ba ngyɔ hɛ, ko ba tak a yɛ, mwa ano a tùt nu wɛt. Sede byot tyīmit de be kyè wɔ̀ yɛrɛ, na sede tyimit e nuyêl bemat yɛ̂t tôt yɛ, ya nàra yuu, ano a tùt nu mɛ wɛt.

⁸Yi na shɔt bɔs ba kyè na yɛ. Wǎ e ji bezamang mɛ à tɛ̀ tong ɛ? Ba tùt ɛ yi e vwêl beken, ba dak ɛ yaga burû bemat hom.

⁹Ba yong sak me tanga vê neves, ko ba lɛrɛ hɛ na bedaberey, mwa ano de a kana ra yol wɛt, ko a kana ha bɔs wɛt.

¹⁰Mwa ano, a sé simô Dagwi Darwey na a sɔ rezot na nerɔ. A nɔng neken mɛ na nè se pyɛ nɔrɔ yaga banɛn. A rɔda di nèy mɛ, ko nepɔlɔ mɛ nê gwɛ hɛn, ko simô Dagwi Darwey hê karak e vwɔ mɛ.

¹¹Ê di pyɔlɔ̂ ririm mɛ ko yê jam a yɛ. Wo cik, mwât fwom hom, ê tɛ̀ bemat pyak be sè cik yi na tɔk ɛ, ko ê jut nedirîk banɛn mɛn.

¹²Yaga ano, mê nɔng ɛ nu mó mɛ na bedaberey, ko ê gas pyɛ̂ jugu na vê gap. Yaga a shushu neken mɛ vɔk e reku, ko ba jut ɛ sede hwak e ji vê sogô nehywɛ, ko mwin a jut banɛ̂n bemat pyak, ko a ra won yaga vê sogô nehywɛ.