Read berom Yɛshaya 54 Bible Online

Yɛshaya 54 - berom bible

Yɛshaya 54

¹À Yɛrusalɛm, à hwo sang-gwon, ra lwɛlɛ̂ yey pyɛng, takla lwɛlɛ na hwo mok, hwo de hwà ga rus tɔ wɛt! Nèy hwā de ba kyini nê dal ne hwâ weneng na nepyak. Hâ Dagwi Darwey à hemo.

²Gwɛ̌ kwɔ̂n buk mo, gwɛ̌ rugû bâng kwɔ̂n sangal mo, hwo tɛt kwɔn o wɛt, gwɛ̌ nelîs rǐk o, na hwo gwɛ̌ tɛs bekwagam o.

³Yaga hwô shara hwo vɔk e yege na mwɛlɛng, ko yére mo yê vɔk yére bemat jey o, ko yê sangal e bapomo de ba ga kana hala.

⁴Hwo vo bengyip wɛt, yaga hwô vo rekyen wɛt. Hwo ye waa wɛt, yaga bê byɛs o wɛt. Yaga hwô ye bam a rekyên nehwong mo, ko hwô to bare na byɛ̂s nekuma mo wɛt.

⁵Yaga wo yong mo ê sè a hwo sede rwas mo, Dagwi Darwey, Dâ Jey Mwa à reza mɛ. Wo Jɛrɛ wo Israyɛl à wo viri mo, be yila hɛ à Dagwi wo jey mwa.

⁶Yaga Dagwi Darwey a ga yila hwo, sede hwā de ba ga hala hɛ na lashê yey. Sede hwā de rwas o a ró ɛ a sè rɔngɔl pwas. Dagwi mo a ye ano.

⁷Ma kyini hwo kejeng tyɔng, ko yi na gbɔng tosho reyɔm mê to jut o.

⁸Na shom ding-ding yaga kejeng, ma lɛrɛ bayis hom yi na hwo, ko yi na tɛ̂ yey gbak-gbak mê tosho reyɔm mo. Hâ Dagwi Darwey, wo viri mo a hemo.

⁹Mê ra sede e nagasî Nɔwa: Tyɛng sede mà sira wɔgɔ, nshî Nɔwa nê sang to bang jey wɛt. Ano ma ga sira mê to vo shom na hwo wɛt, ko mê to gyong o wɛt.

¹⁰Ka beraku ba yang tɔk sè vit, ko ba yang gangas berahwol arɔng, ko tsak tɛ̂ yey hom hê gas ɛ na hwo wɛt, ko wuna-na-sira hom hê sangal tyang hê sè vit wɛt. Hâ Dagwi Darwey, wo toshô reyɔm mo a hemo.

¹¹À Yɛrusalɛm wo reyɔm, de tɛmɛ-nshi na gangas, vit à wo wɔrɔk, di, me kyè wɔ̀ tɛ̀ beta mo e ra dyengerê agat, ko me bomo retis mo e ra dyengerê safir.

¹²Mê tɛ̀ búshu mo na dyengerê rubi, rùhup mo na dyéngere de ye lolo, ko jwâ-pomo mo na beta berat.

¹³Dagwi Darwey ê basa a mwa nèy mo, ko nèy mo nê sangal e ji netyang.

¹⁴Hwô tumal ting e ra necik, vit a mɔt, hwô tele hwo pyɛ cak wɛt, vit à bengyip, bê vey bagat na hwo wɛt.

¹⁵Ka sede mwat hwak a hwo e ra hwo, ko ê sè yi na me wɛt, ka sede mwat hwak a hwo o na yol, ko ê gaba, mê gyep o.

¹⁶Di e me de ma yong zu, womo de e ruk kyâ hwalang, na a yong pyɛ̂ como, ko e me de ma yong mwât como, na a wey na pyɛ́ mo arɔng.

¹⁷Vit a pyɛ como de ba yong yaga hwo de yê mǎ hwo, hwô gang kahɛ ha e ra hwo e duk shɔt. Vonu à hemo e ra bemât fwom Dagwi Darwey, ko wɛng mɛn hê yi na me. Hâ Dagwi Darwey à hemo.