Read berom Yɛshaya 55 Bible Online

Yɛshaya 55 - berom bible

Yɛshaya 55

¹Óoo, mwa yin vê yey hwɔshɔ! Vey in e dem nshi! Ko yin de yin a vɔk dyām wɛt, vey, sey in na yin re! Vey, sey in nshî anap, na nevasal, sana dyām, sana byɛ!

²Yaga sɛ́ de yin e wey na dyām min e ra pyɛ de ya sé kpam-tuk wɛt, na dyâm fwom min e ra pyɛ de ye vey á yin wɛt ɛ? Wet in betong hywɛ na me, na yin a re pyɛ́ de ya sé ryat, na yin a wok netâ pyɛ́ ryat.

³Tɛ̀ in betong, na yin a vey na me, wet in betong, na yin a sè beken. Mê wuna me na sira na yin neshey gbak-gbak, na be sila mɛ̀ tsak tɛ̂ yey hom na Davit.

⁴Di, ma tɛ̀ ɛ́ wò nuha na yére bemat, gwɔ̀m na wo nuyêl como yaga yére bemat o.

⁵Di, yin ê yila yére bemat jey de yin a tɔk wɛt, ko yére bemat jey de ya tɔk in wɛt yê tele vey na yin, yaga Dagwi Darwey, Dagwi min, Wo Jɛrɛ wo Israyɛl, e yɛ̀ de a ga nɔ́ng in nerat.

⁶Jama hin Dagwi Darwey e jeng de bê tɔk sɛ̀ ɛ, yila hin hɛ a remo de a sé bagat.

⁷Tik bemat beves be hala begwong mɛn, vemo de ba sé cik wɛt be hala báre mɛn. Tik na yɛn a toyo vey na Dagwi Darwey, yaga na a wok nemwishish mɛn. Tik na yɛn a toyo vɔk na Dagwi arɔng, yaga e hala banɛn dey-dey.

⁸Yaga bare hom ha sé sede min wɛt, kɛ begwong min ba sé sede benang wɛt. Hâ Dagwi Darwey à hemo.

⁹Sede remo de lagwi wà dal jey e rak o, ano begwong hom ba dal bemin, ko bare hom ha dal min arɔng.

¹⁰Sede remo de rwak na fwala be gyirik yi e lagwi, ko be to ɛn wɛt sɛ̌ ba ga nɔ̂ng vwel nshi, be tɛ̀ he ye rùk, ko pyɛ́ ye tē gbuk, ye nɔng pyɛ̂ yeneng de be tus, na kpam-tuk de bê re.

¹¹A sé ano na ha de he nunus e nu hom. Hê toyo vey na me hal wɛt, ko hê sila pyɛ de ma tɛ̀ e yey, na he di wɛng e ra pyɛ de ma tomo mɛ hɛ.

¹²Ey, yin ê nusu na yey pyɛng, ko bê kyè na yin na yêy dyɛngɛ. Beraku na berahwol e nuyel min bê takla lwɛ̄lɛ, ko mwa cɔ́gɔt yê dak vɔ.

¹³E tô tin-á-rɔ́gɔ, ko cɔgɔ̂t sayprɛs yê ras, e tô shik, ko cɔgɔ̂t gbirin yê ras, ko yê sè pyɛ bare, na Dagwi Darwey, pyɛ dura gbak-gbak de bê tɔk pat yɛ wɛt.