Read berom Yɛshaya 56 Bible Online

Yɛshaya 56 - berom bible

Yɛshaya 56

¹Dagwi Darwey a ye: Gas in badu e tē, na yin a ra necik. Yaga sey hom hê vey bagat, ko bê dura viri min wɛshɛrɛk.

²Wo wɛng à mwasi de e ra ano, womo de e kaba há mo gak, womo de e gyeng Tuk Shábat, e tɛ̀ hɛ ligis wɛt, ko e kyɛ́ ɛ nà ra pyɛ vyes.

³Wo yere dyuk de a man ɛ na Dagwi Darwey ê sang to ye wɛt wɔgɔ, “Mwin Dagwi Darwey ê kang me na bemat mɛ.” Ano arɔng, hwo kwon tik rɛmɛt a ye: “Di, ma sé sede cɔgɔt sana yére zɔng.”

⁴Yaga Dagwi Darwey a ye: Vɔk na berɛmɛt de be gyeng Negasi Shábat hom, yɛn de be kasa pyɛ́ de yé pɛngɛ a me yey, ko yɛn de be gyeng wuna-na-sira hom,

⁵mê nɔng ɛn, e lɔ hom, na e jwâ Gbɔng Duk Re Fongol hom mwa, pyɛ bare, na reza de ya dal nèy bewen na behwong. Mê nɔng ɛn reza rê gbak-gbak, de bê tɔk pat rɛ wɛt.

⁶Ko yére dyuk de ya man ɛn na Dagwi Darwey, de ye ra a yɛ fwom, de ye tɛ̀ yey na rezâ Dagwi Darwey, de ye sè yê fwom mɛ, na mwa vemo de be gyeng Tuk Shábat, ko be tɛ̀ hɛ ligis wɛt, ko be gyeng wuna-na-sira hom,

⁷e yɛn vɛ de mê vey mɛ̀ e rakû jɛrɛ hom, ko mê nɔng ɛn yey pyɛng e duk won hom. Nɔrɔ̂ pyɛ̂ rangas mɛn na nenɔrɔ mɛn, bê sey yɛ e gàgbang rangas yas hom, yaga bê yila lɔ hom à lɔ̂ won yaga yére bemat mwa.

⁸Dagwi Darwey de e tula BeIsrayɛl de ba shara hɛn, a ye, “Behak ba sé de mê tula hɛn e ra vemo de ma ga kana tula.”

⁹Vey re in, à yin ngyāma, mwa yin ngyāma rehwot!

¹⁰Vê bɛrɛng nekanâng Israyɛl ba sé bebók, mwâ hɛn vit à tɔ́k, mwâ hɛn sede bevû gyeng yuu-yuu, be tɔk bǔ wɛt, be ranas negwi, be dyɛngɛs, be tɛ̀ yey na nevwa.

¹¹Bevu de ba kat serwéy, pyɛ́ ye vey a yɛn wɛt. Belek o arɔng ba vɔk tɔk wɛt, mwa ba ga doyo e begwông vɛ, kawɛ e de jamâ pyɔlɔ mɛ.

¹²Yɛn e tē, “Vey in na wot a jama nshî anap, tik wot a sila hot na siring. Nahwol wô ba sè pyɛ langat sede yunung, wô ba dal mwa!”