Read berom Yɛshaya 57 Bible Online

Yɛshaya 57 - berom bible

Yɛshaya 57

¹Mwat de a sé cik e wey, ko vit a mwat de e tɛ̀ tong. Be kyè na vê tsak o, ko vit à mwat de e bare mɛ. Be hashe vê cik yi e neves,

²ko yey mɛn ye dyɛng, yɛn de be kyè cik, bê pɔng e ra gat mɛn.

³Ko di yin kē, vey in e ngamo, yin nèy bemât vyoshon, yin yerê vê nejwang na nedeneves.

⁴Yin e tabas a beva nengyas ɛ? Yin e wuma nenu tɔɔng e ra beva na yin a nása balem e jey ɛ? Yin a sé nèy neburu, na yere ye bɔs wɛt a?

⁵Yin de cwey pyɛ́ vyes ye re in sede kya e tê cɔ́gɔt ouk, e nɛ̂n kayɛ cɔgɔ̂t berang pyak. Yin de yin e mɔbɔs nèy min e benɛk, e nɛ̂n nesarâng beta.

⁶Basulup bèvwɛngɛ ba sé bak o mwin, ey, e vɛ de ba sé nu mo min. E ra vɛ de yin a shusha ɛ̀ nu mo hê beda min. Yin a ga vey na nɔrɔ̂ pyɛ̂ yeneng. Pyɛ́ yemo yê dyɛng a me yey a?

⁷E ra beraku belis e ra rak o, yin a ga shara beput min, ko e hwomo yin a tút wɔ̀ nára nɔrɔ̂ rangas.

⁸E bamâ rwi na swesek rwi mó yin a tɛ̀ pyɛ durâ ci min. Yi na hála hom, yin a hywɛrɛm hin, yin a tút e ra gwat twes mɛn. Yin a ra byɛ na vemo de yin a tɛ̀ yey na yɛn, na yin a bɛrɛng nekpimit mɛn, na yin a ragas pyɛ́ vyes na yɛn.

⁹Yin a kyese a Molek na nèy, ko yin a tē shɛrɛk na pyɛ̂ nesang hyɔɔlɔl min, yin a tomo betom min yikyik, vɔk e kwɔ̂n bevuvwel pyɛ hɛ.

¹⁰Yin a tɛ́ in gbɛrɛk yi e kyé gǎ min, ko mwa ano yin a ye, “Ha sé yapyi”, wɛt. Yin a sɛ̀ pyɛ́ de yin e simo tyɔng wɛt, ko a nɔng in gap pas.

¹¹E yɛ̌ ci de yin e tele hin, yin e wok bengyip yɛ, ano yin e vɛ́sɛ a me bɔs, ko yin e bare na me kɛ yin e tɔrɔng na me wɛt ɛ? Ma ga ban-yuu jeng pyak wɛt a? Ano yin e wok bengyip hom wɛt.

¹²Ka ma ka dura necik min na tomong min, ko yê sɛlɛ hin wɛt.

¹³Jeng de yin ê dak sekun, tik na nezap cī min ye sey in! Gul gwô kyè na yɛ, ko nesong nê gangas yɛ e jey. Ko kawɛ de a lɛrɛ hɛ e ji hom ê vɔk vwel o, ko ê re nedanelɔ raku hom wo jɛrɛ.

¹⁴E jeng o Dagwi ê ye: “Lɔk in, lɔk in gwong o, paa in mwa pyɛ̂ té nàgarak e gwông bemat hom!”

¹⁵Yaga wo lagwi, wo rak o, de a sé gbak-gbak, reza mɛ à Wo Jɛrɛ a ye: Me sangal e lagwi e kwɔ̂n jɛrɛ, tanga mwa vemo de ba dyɛng bato mɛn, na be wok rekyên banɛn mɛn, na me sene gabîk vê dyɛ̂ng to, na me sene neyey vemo de ba wok rekyên banɛn mɛn.

¹⁶Yaga mê sǎ e de tɛ́sɛ kun kɛ e de shom wɛt, ka ano wɛt ko gabik min de ma yong hê tɛ́ ɛ gbɛrɛk, mwa na neken min de ma yong arɔng.

¹⁷Yaga nevês marâ yis mɛn, ma vo shom, ma fala hɛn, ma lɛrɛ me, ko ma vo shom, ko mwa ano yɛn a sǎ e de doyo vɔk e begwong mɛn.

¹⁸Ma ga di begwong beves mɛn, ko mwa ano mê tɛ̀ ɛn tyang, mê kyè na yɛn, ko mê tala hɛn na wɔ́rɔk, yɛn na mwa vemo de be tosho, mê tɛ̀ yɛn a ra lɛlɛ̂ yey pyɛng.

¹⁹Dagwi Darwey a ye: Netyang na yêy dyɛngɛ nê sè na vê yikyik tanga vê bagat, ko mê tɛ̀ ɛn tyang.

²⁰Ko vê neves ba sé sede gworep de gwó kyě ra gògólóm gwó tɔk sǎ tiing wɛt, nshî gwɛ ne vɛ̀sɛ na yɛ̀mɛl tanga bwɔrɔk.

²¹Dagwi Darwey a ye, “Vit a yêy dyɛngɛ na vê ragas neves!”