Read berom Yɛshaya 58 Bible Online

Yɛshaya 58 - berom bible

Yɛshaya 58

¹Dagwi Darwey a ye: Mok in ngyat-ngyat, na gap min mwa! Gbɔ in sede fwɔ̂ durum! Há in a bemat hom rehâ sogô nehywɛ mɛn, na lɔ Yakɔp banɛn mɛn!

²Yɛn e jama me kahɛ tuk, yɛn a vɔk yêy hwɔshɔ̂ tɔ̂k begwong hom. Ka sede yɛn a yâng sé yerê bemat de ye ra pyɛ́ cik, ka yɛn a yâng hala badu Dagwi mɛn wɛt. Yɛn e rangal me badu de ba sé cik, yɛn e simo be sè bagat na Dagwi.

³“Yaga sɛ́ de wot e tik rê pyɛ́ ko hwà di wɛt ɛ? Yaga sɛ́ de wot e dyɛng bato mot ko hwà tɛ̀ tong wɛt ɛ?” Di, e tûk tik rê pyɛ́ mó yin e ra pyɛ́ de yin e simo ko yin e mɔt mwa bemât fwom min.

⁴Di, yin e tik rê pyɛ́ na yin a ra nu na yin a ra yol zɔng, na yin a dak bemin na vɔ neves. Yerê tik rê pyɛ́ de yin e ra yunung hê tɛ̀ me wok fwɔ min e lagwi wɛt.

⁵E yerê tik rê pyɛ́ de ma kasa, tuk de yin e dyɛng bato min a? Ha vey a me na yin a yâng bato det sede bwɛshɛ̂ yara, na yin a dyɛng na berugû sesin e fongol pwɛng a? Yin ê yila ra ano, à tik rê pyɛ́, tuk de ha sé pyɛ ryat e bayîs Dagwi Darwey a?

⁶Yerê tik rê pyɛ́ de ma kasa a hemo wɛt a? Ha sé na be kwɔrɔs ngyâng neves, na be pat gûk swesêk vɔk berɔndɔng, na be hala washak vemo de be mɔt ɛn, na be pat kayɛ swesêk vɔk berɔndɔng.

⁷Ha sé na be gas kpam-tuk na vê vyong, na be vey na bepɛng sana lɔ e nelɔ min, sede yin a di vê warap ko yin bang ɛn, ko yin lɛrɛ hin yi e cáng min wɛt.

⁸Ano negbey min nê sè sede zang-gwi gasi, ko baram min bê vel dey-dey, necik min nê kyè e nuyel min, ko gbɔng nerêy Dagwi Darwey nê bang a yin ma.

⁹Yi ano yin ê yila, ko Dagwi Darwey ê toyo mɛ, yin ê tosho e de jamâ sɛlɛ, ko ê ye, “Me à womo.” Ka sede yin a tik tak a bemin, na nára vwɔ̂ yol, na hâ ha ves,

¹⁰ka yin a nɔngɔ̂s vê vyong pyɛ́ de ya vey a yɛn, na yin a nɔngɔ̂s vê reyɔm pyɛ́ de be simo, ano negbey min nê nusu e ji lwil, ko lashê yey min hê tɛ́ ɛ sede tê-gwi.

¹¹Dagwi Darwey ê kyè na hwo kayɛ jeng, e hêy gbingiring ê nɔng o pyɛ de yê vey a hwo, ê tɛ̀ bekup mo gbarak, ko hwô sè sede bwi de gwa vɔk nshi polos, sede jɔt nshi de ye ye jɔng wɛt.

¹²Barin min vê raane bê to lɔk vɛ, yin ê to ye cik à batîs bezamang pyak, bê yila hwo a wò yông nekwɔn de ba wey na nɛ, wò toyo na nehyok de bê sangal ɛ.

¹³Dagwi Darwey a ye: Ka sede yin a tik nà lashe Tuk Shábat, yi na râ pyɛ́ de yin e simo tuk wusal hom, ka sede yin a yila Tuk Shábat à tûk yey pyɛng, na yin a nɔ̂ng tûk jɛrɛ̂ Dagwi Darwey nerey, ka sede yin a nɔ̂ng hɛ nerey, sana kyě kyè e begwong min, e de jamâ pyɛ̂ yey min, kɛ yin kyě ha hâ tó min,

¹⁴ano yin ê vɔk tsak yey pyɛng e ji Dagwi Darwey, ko mê tɛ̀ yin a kyè e ra rak jey o mwa. Mê shɔk in na pyɛ̂ nedanerêy dâ beda min Yakɔp. Me Dagwi Darwey ma ha ano.