Read berom Yɛshaya 59 Bible Online

Yɛshaya 59 - berom bible

Yɛshaya 59

¹Di in, vwɔ̂ Dagwi Darwey gwa radɛ bwit nà sey in wɛt, kɛ betong mɛ ba sé rip nà wok.

²Neburu min na dul tē min na Dagwi min e negya, ko banɛn min ba ga bang bayis mɛ yi na yin, ano a tɔk wok in wɛt.

³Yaga vɔ min ba sé ligis na nemi, ko nekɛn vɔ min ná buru. Bèbɛrɛ̂k nu min be ha bɔs, ko balem min be ha há ves.

⁴Vit a mwat de e tɛ̀ kun cik, vit a wò wɔ̂ shɔt na tsak o. Mwa hɛn be tɛ̀ gap mɛn e ra neha yapyi, yɛn e vɛ́sɛ bɔs, be sey jîm gawey ko be tɔ neves.

⁵Yɛn e kwɛk bagyi gwɔ̄m-rwey, yɛn e lɔk rugu na shwêy nàrang. Kawɛ de a re bagyi vɛ ê ku, regyi de ra mɔrɔ hɛ re kwɛk gàbak.

⁶Be tɔk lɔk rugu na benarang mɛn wɛt, yɛn e tɔk báng ɛn na pyɛ de ba lɔk wɛt. Tom mɛn ba sé ve banɛn, ko tomông yol ba sé e vɔ mɛn.

⁷Bol mɛn be tele vɔk e de neves, ko yɛn e tē kyùk e de lushâ nemî bemat sana nɛn. Barê yey mɛn ha sé hê buru, kahɛ kwɔn de yɛn a wɔ́ he sè shɛ́rɛk-shɛrɛk na gawêy wey mɛn.

⁸Yɛn a tɔk gwông netyang na yêy dyɛngɛ wɛt, ko vit à shɔt tsak o e gwòng mɛn. Yɛn a ga yong gwòng mɛn de ba tē rɛ̌t, ko vit à mwat de e raa vɛ de e sɛ̀ netyang.

⁹Yi ano, gâs badu e tē ha sé yikyik na wot, ko wot e sɛ̀ necik e kwɔn hak wɛt. Wot e gyeng negbey, ko mwa a sé mwangalang, newɛshɛrɛk, ko wot e kyè e lwil.

¹⁰Wot e mɔgɔm sede bebók e varâ duk, wot e ra kìkap sede vê bayis wɛt. Wot e tiris bol tê-gwi sede e nèwil, e ji vê gap, wot a sé sede bavin o.

¹¹Mwa hot wot e lulum sede bebeyar, sede begumurus wot e kùnus. Wot e gyeng gâs badu e tē, ko wís, yaga sêy neken, ko na sé yikyik na wot.

¹²Yaga neburu mot e nuyel mo na sé hyɔt, ko banɛn mot be nɔng nuha e ra wot. Mwin neburu mot na sé na wot, ko wot a tɔk banɛn mot,

¹³na neburu mot, na tono na Dagwi Darwey, na doyo yi e raà Dagwi mot, na hâ neha mɔt, na sogô nehywɛ, na gwɔrɔ̂ng neha bɔs, na hâ nɛ e yey mot.

¹⁴Ba ga gang gâs badu e tē e bama, necik na tumal yikyik, tsak o wa ga tiri bwol e dúra, ko hâ mwin he tɔk yel e hwomo wɛt.

¹⁵Vit à tsak o, ko be tak a vemo de ba kyɛ́ ɛn nà ra neves. Dagwi Darwey a di pyɛ́ mo mwa, ko ya lashe a yɛ yey, de vit a gâs badu e tē.

¹⁶A di vit a mwat, a lashe yey de vit a wo tɛ̂ nu, ano vwɔ mɛ pyɛ mɛ gwa nɔng ɛ wɛng, ko a ra fwom na necik mɛ.

¹⁷A jut necik sede dyam pamâ bâng ragey, na sêy neken sede bong dyam gyêp rato. A jut rugû talâ pyɔ̌n sede rugu lwis, ko a hanas rebek mɛ na shom sede gworugu.

¹⁸Ê tala kawɛ mwat tyɛng na tomong mɛ, shom yaga vê repugu mɛ, talâ pyɔ̌n na vê sogô nehywɛ. Vɔk na vê bakwogom mwa, ê tala hɛn pyɔ̌n tomong mɛn.

¹⁹Ano vê rwa ta bê wok bengyip rezâ Dagwi Darwey, ko vê rwa rak, vê gbɔng nerat mɛ. Yaga ê vey sede rɔt de ha ga sila na nshi de gûl Dagwi Darwey gwo gangas.

²⁰Ko ê vey e Siyɔn sede wo viri hɛn, na vê Yakɔp de ba doyo yi e buru. Hâ Dagwi Darwey à hemo.

²¹Ko di me Dagwi Darwey ma ha, wuna-na-sira hom na bemat hom: Gabik hom de ha sé e ra yin, na neha hom de ma ga tɛ̀ e nenu min, nê nu ɛn yi e nenu min, kɛ nenu nèy min, kɛ nenu nèy nèy min wɛt, yi e remo vɔk e nesheneshey. Hâ Dagwi Darwey a hemo.