Read berom Yɛshaya 6 Bible Online

Yɛshaya 6 - berom bible

Yɛshaya 6

¹E shey de Gbɔng Gwɔ̀m Uziya a ku, ma di Darwey. A sé sangal e ra gwofwa negwɔm mɛ e rak o, ko gwogbɔng gworugu mɛ gwa sila Gbɔng Duk Re Fongol.

²Pyɛ́ cen cak de ye lolo kya ya gwɔrɔ hɛ, kayɛ mo ya vɔk bafabak batyiimin. Ya bang bwang bayis yɛ̀ na bafabak baba, rebêk yɛ na bafabak baba, ko baba mo ba sé yaga tele e gwi.

³Pyɛ́ cen o mo ye yila bemɛn, ye tē: “WoJɛrɛ, WoJɛrɛ, WoJɛrɛ! Dagwi Darwey, Dâ Jey Mwa! Gbɔng nerat mɛ na sila jey mwa!”

⁴Wûs yila mɛn ha tɛ̀ retîs Gbɔng Duk Re Fongol re digis, ko wa sila na sekyeng.

⁵Ma hwo ye, “Gawey ha ga hwo e ra me! Ma ga tala mɛ! Yaga kahɛ ha de he nunus yi e nu hom ha sé ligis, ko ma sé sangal e tê bemat de kahɛ hâ nu mɛn ha sé ligis arɔng. Ko mwa ano, ma ga di Gbɔng Gwɔ̀m, Dagwi Darwey, Dâ Jey Mwa bayis na bayis.”

⁶Ko cak e ji pyɛ́ cen o ya tele vey na me, ya vɔk cilâ kya de ya ga jut na kabra yi e ra gàgbang rangâs yas.

⁷Ya ra nu hom na yɛ ko ya ye, “Yemo ya ga ra nu mo, ano buru mo ha ga ye vit, ko ba ga hala banɛn mo.”

⁸Ko ma wok fwɔ̂ Darwey gwa ye, “Wa de mê tomo ɛ? E wa de ê sè tom mot ɛ?” Ma toyo a yɛ, ma ye, “Me à womo, tomo me!”

⁹Ano kwong a yang me, me kyè na me wɔ̀ nɔ̂ng bemat o tomo hemo ngan: “Yin ê tɛ̀ betong sana wok. Yin ê bɛrɛng sana di!”

¹⁰Tɛ̀ barê yêy bemat o he sè kpɛɛ, betong mɛn be sè rip, ko bayis mɛn be sè mwangalang, yaga ka sede ba tɛ̀ betong kɛ ba bɛrɛng ko bê di na be doyo wɛt na me tɛ̀ ɛn tyang.

¹¹Ma rangal, ma ye, “À Darwey, ê sè ano vɔk e yɛ̌ jeng arɛt?” A toyo a me, a ye, “Sɛ̌ bapomo mɛn ba ga tɛ́ ɛn barin, vit a mwat, sɛ̌ nelɔ mɛn nà tɛ́ ɛn vit à mwât sangal e ji mo, tanga sɛ̌ vwel o pyɛ hɛ ha tɛ́ ɛ hal.

¹²Sɛ̌ me Dagwi Darwey ma tomo na bemat o yikyik, ko me tɛ̀ vwel o mwa he sè hal vit.

¹³Ka bak gwining e ji kuru a nàra e vwel o, ko bê dak ɛ kya, ê sè sede gwokpɔ̀k retîn cɔgɔ̂t ouk.” Gwokpɔk o gwa sé e tô bwang bemât Dagwi de a tik jaram na be to ba turuk.