Read berom Yɛshaya 60 Bible Online

Yɛshaya 60 - berom bible

Yɛshaya 60

¹À Yɛrusalɛm, sogo, lòlo, yaga negbey mo na ga vey, ko gbɔng nerât Dagwi Darwey na ga nusu sede gwi!

²Di, lwil gwô bang jey, ko lwil kyibit gwô bang yére bemat jey. Ko di hwo à, Dagwi Darwey ê vey sede negbey e ra hwo, ko gbɔng nerat mɛ nê sè e ra hwo.

³Yére bemat jey yê vey e negbey mo, ko begbɔng begwɔ̀m bê vey e nedyɛt bop nagasi mo.

⁴Di na hwo kyě bɛrɛng, yɛn a tula hɛn mwa, yɛn e kyè vey na hwo, nèy bewen mo nê yi yikyik, ko nèy behwong mo nê vey e ra vɔ belek mɛn.

⁵Ano hwô di ko hwô vɔk yey pyɛng, yey mo yê dak, ko yê feng, yaga bê vey a hwo na nepyak pyɛ̂ gworep, ko pyɛ̂ nedanerêy yére bemat jey yê vey na hwo.

⁶Regyɛng bemaryat rê bang o, bebôt bemaryat Midyan na Ɛfa, mwa vɛ vê Sheba bê vey. Bê vey na dyam shinang na pyɛ̂ nesang hyɔɔlɔl, ko bê shara yɛgɛ̂t somô Dagwi Darwey.

⁷Bê tula a hwo mwa vyêl Kedar, beturuk Nabayɔt bê sè nenɔrɔ̂ yas mo, mê sey vɛ e gàgbang rangâs yas hom, ko mê gwɛ̌ gbɔng nerêy lɔ hom.

⁸E beva à vemo de be tele e gwi sede bale, na sede bèbɔp vɔk e bapɔk vɛ̀ ɛ?

⁹Yaga vê bakwogom mwa bê gyeng me, bedwa-nshî Tarshish bê sè vê mɛsɛng na be vey na nèy mo yi e yikyik, na dyam pyɛng tanga dyam shinang mɛn, yaga rezâ Dagwi Darwey, Dagwi min, na yaga Wo Jɛrɛ wo Israyɛl, de a ga nɔng o gbɔng nerat.

¹⁰Yére dyuk yê to lɔk bejwâ-pomo mō, ko begbɔng begwɔ̀m mɛn bê ra a hwo fwom, yaga a sé yi na shom hom de ma tabak hwo, ko a remo ma wok nemwishish mo yi na tɛ̂ yey hom.

¹¹Ri ruhup mo bê sè e wuma kayɛ jeng, nagwi na turuk bê bang vɛ wɛt, yaga yére bemat jey yê vey a hwo na pyɛ̂ nedanerey mɛn, ko begbɔng begwɔ̀m mɛn bê sey yel.

¹²Yerê bemat jey na segwɔm de yê ra a hwo fwom wɛt yê wey, bê wey na yére jey sevwel o vit.

¹³Gbɔng nerât cɔ́gɔt Lɛbanɔn nê to ɛn na hwo, ne cɔ́gɔt sayprɛs, na plen tanga fir, na be tɔrɔ mɛ Gbɔng Duk Re Fongol hom ko mê nɔ̂ng kwɔ̂n pɔngɔ̂ bol hom gbɔng nerat.

¹⁴Yére vemo de ba tak a hwo yê vey tɛ̄ ngyuk e nuyel mo, na mwa vemo de bá byɛs o bê ye guduruk e bol mo. Yɛn ê yila hwo à gbɔng repomô Dagwi Darwey, Siyɔn wo Wo Jɛrɛ wo Israyɛl.

¹⁵Mwa ano de ba kyini hwo, ba ye zak a hwo, vit a mwat de á kwey e ji mo, ko mê tɛ̀ hwo vɔk nedyɛt nerat gbak-gbak, mê tɛ̀ hwo sè pyɛ yey pyɛng nesheneshey.

¹⁶Hwô sɛ̀ nerât begbɔng begwɔ̀m yére bemat jey, sede hwey he ngas neng hɛ. Ko hwô tɔk me Dagwi Darwey à wò sey mo, na wo viri mo, Wo Reto Mwa wo Yakɔp.

¹⁷E tô dyam pama mê vey na dyam shinang, e tô dyam zɔng mê vey na dyam pyɛng, e tô cɔgɔt, mê vey na dyam pama, e tô beta, mê vey na dyam. Mê tɛ̀ Yêy-dyɛngɛ ye sè mwât kyé na hwo, na Necik ne sè mwât bɛrɛng fwom mo.

¹⁸Bê to wok yol e vwel mo wɛt, búgut kɛ wey e yɛnɛ̂ vwel mo wɛt. Hwô yila bejwâ-pomo mo à Sey-neken, ko rùhup mo à Sómo.

¹⁹Gwi gwô to nɔng o negbey nagwi wɛt, ko pwɛl gwô sè negbey mo naturuk wɛt, yaga Dagwi Darwey ê sè negbey mo sana yɛnɛ, ko Dagwi pyɛ mɛ ê sè gbɔng nerat mo.

²⁰Hwô to tɔk gabâ gwi wɛt, kɛ yé tsîk pwɛl ayi, yaga Dagwi Darwey ê sè negbey min sana yɛnɛ, ko nepɔlɔ̂ sesin min nê tɛ̀ kwɔk.

²¹Bemat min mwa bê sè cik, ko bê vɔk vwel o gbak-gbak. Yɛn a sé túlu pyɛ́ de ma tus, fwôm vɔ hom, yaga gbɔng nerat hom.

²²Vemo de ba dal mwa na nesɛl bê tɛ́ ɛn ruhup rwey, ko vemo de ba dal mwa na negbɛrɛk bê tɛ́ ɛn yerê bemat jey, sede jeng o ya vey, me Dagwi Darwey mê tɛ̀ pyɛ́ yemo ye té dey-dey!