Read berom Yɛshaya 61 Bible Online

Yɛshaya 61 - berom bible

Yɛshaya 61

¹Gabik Darwey Dagwi Darwey ha sé e ra me, yaga Dagwi Darwey a ga shushu me na něy, a ga tomo me na me vey a bepɛng na yɛgɛt yat na me wɔrɔk vê vôs yey, na me shara a vemo de ba ga rɔgɔs hɛn rehâ sangal washak, na rehâ vibis vemo de ba sé e lɔ̂ ngyang.

²Na me shara rehâ shêy nerât Dagwi Darwey, na tûk talâ neves yi na Dagwi mot, na a wɔrɔk vê sesin.

³Na me vey e Siyɔn, na me nɔ̂ng vê sesin bèlɛlɛ jamuk vè nzem e tô fongol pwɛng, na něy mɔmɔ ne yey pyɛng e tô sesin, na gworugû somo e tô yêy fɛgɛt. Bê yila hɛn à vê cik sede cɔgɔ̂t ouk, pyɛ́ de Dagwi Darwey a tus yaga gbɔng nerat mɛ.

⁴Yɛn ê lɔk barin baroso, yɛn ê ye cik a pyɛ́ de bá wey mɛ raane. Yɛn ê to yong barîn bapomo, pyɛ́ de bá wey mɛ bezamang pyak.

⁵Bemat beduk bê vey gyeng vyēl min, yére dyuk yê how cāp min, ko yê yong batîn anap min.

⁶Ko bê yila hin à bepiris Darwey, bê yang in à bemât fwôm Dagwi mot. Yin ê wok netâ pyɛ̂ nedanerêy yére bemat jey, ko yin ê dak kaa e negbɔng nerat mɛn.

⁷E tô rekyen min, yin ê sɛ̀ nerat zang ba, e tô byɛs, yin ê mok na yey pyɛng. Ey, yin ê vɔk bebak beba e vwel min o, ko yin ê vɔk yey pyɛng sana yɛnɛ.

⁸Yaga me Dagwi Darwey me tɛ̀ yey na gâs badu e tē, me ye zak à séy ɛ̀ pyɛ́ na retek tanga râ pyɛ́ na buru. Ko mê tala hɛn pyɔlɔ mɛn na tsak o, mê wuna me na sira na yɛn neshey gbak-gbak.

⁹Bê tɔk yére mɛn e ji yére bemat jey, ko nèy mɛn e ji bemat o. Mwa vemo de ba di ɛn bê tɔk, yɛn à bemat de Dagwi Darwey a tɛ̀ a yɛn nerat.

¹⁰Mê vɔk yey pyɛng sizɔng na Dagwi Darwey, gabik hom mwa hê somo Dagwi hom. Yaga a ga tɛ̀ a me sêy neken sede rugu, a ga bang me na necik sede rugu lwis, sede rwâs gwel a tɛ̀ bèlɛlɛ jamuk, na sede gwel a tɔrɔ hɛ na bèlɛlɛ dyéngere ryat.

¹¹Sede remo de vwel he ta pyɛ́, na sede bwi de gwo tɛ̀ pyɛ́ de ba tus ye tulu, ano Darwey Dagwi Darwey ê tɛ̀ necik ná somo, be tabas e nuyêl yére bemat jey mwa.