Read berom Yɛshaya 62 Bible Online

Yɛshaya 62 - berom bible

Yɛshaya 62

¹Yaga Siyɔn, mê sǎ yuu wɛt, ko yaga Yɛrusalɛm mê pɔnglɔ wɛt, sɛ̌ necik hɛ na lolo sede zang-gwi gasi, ko sêy hɛ sede kyâ semwol.

²Yére bemat jey yê di necik mo, ko begbɔng begwɔ̀m mwa bê di gbɔng nerat mo. Bê yila hwo na za pas de Dagwi Darwey ê nɔng.

³Hwô sè pyɛ ryat sede kpîn dyam shinang e vwɔ̂ Dagwi Darwey, sede bong negwɔm e vwɔ̂ Dagwi mo.

⁴Bê to yila hwo à Ba-kyini-hɛ wɛt, bê to yila vwel o à Gbingiring wɛt, ko bê yila hwo a Wo-yey-hom, ko vwel o à Gwel-pwas. Yaga Dagwi Darwey ê vɔk yey pyɛng na hwo, ko vwel mo hê sè tyang sede gwel pwas.

⁵Sede remo de wen e ra wenêng hwong, ano Dagwi de a lɔk o ê ra weneng mo. Ko sede remo de rwâs gwel e vɔk yey pyɛng na gwel mɛ, ano de Dagwi mo ê vɔk yey pyɛng na hwo.

⁶E ra bejwâ-pomo mo à Yɛrusalɛm, ma ga tɛ̀sɛ bemât nekanang, mwa gwi na mwa turuk, yɛn ê sang sǎ yuu wɛt. Yin vê báre a Dagwi Darwey vonu mɛ, yin kwon jut pɔngɔ wɛt,

⁷ko yin ê nɔng ɛ́ pɔngɔ wɛt sɛ̌ a yâng Yɛrusalɛm cik, na a tɛ̀ be somo wɛ e yɛnɛ̂ jey mwa.

⁸Dagwi Darwey a ga sira na vwɔ yege mɛ, na vwɔ mɛ gwô gap. “Mê to nɔng pyɛ̂ yeneng min ye sè pyɛ̂ rê vê repugu min wɛt, ko yére dyuk yê sɔ nshî anap de yin a ga yɔ́m in ɛ wɛt.

⁹Ko vê bwâl yɛ bê re yɛ, bê somo Dagwi Darwey, ko vemo de ba vos nèy anap o bê sɔ nshi mo e nelalâ Gbɔng Duk Re Fongol hom wo jɛrɛ.”

¹⁰Kwey in, kwey in e ruhup o! Yong in a bemat gwong o. Lɔk in, lɔk in gbɔng gwong o! Paa in beta mo. Nára hin tuta e rak o na bemat o be vey.

¹¹Dagwi Darwey a ga shara vɔk e yɛnɛ̂ jey: Yang in hwông Siyɔn, “Di, sêy neken mo ha ga pom, a sé vey na vemo de a ga sey ɛn.”

¹²Bê yishi hɛn à “Bemât Jɛrɛ, vemo de Dagwi Darwey a ga viri hɛn”. Ko bê yishi hwo à, “Gbɔng repomô yêy Dagwi, gbɔng repomo de ba kyini rɛ wɛt.”