Read berom Yɛshaya 63 Bible Online

Yɛshaya 63 - berom bible

Yɛshaya 63

¹E wà à womo de a nusu yi e Ɛdɔm, yi e Bɔsra na berugu besinang zoyong ɛ? E wà a womo de a tɛ̀ berugu belis yɔ̀kyɔk, e kyè na gbɔng reto ɛ? “E me wɛ me ha rehâ necik, na reto de re sey bemat.”

²Yaga sɛ́ de berugu belis mo ba senge, ko berugu mo sede ve mwât farang nèy anap e kwɔ̂n piri mo ɛ?

³“Ma ga farang nèy anap e kwɔn o nju hom, ko e ji bemat o mwa, vit à winde á sè na me. Ma farang nɛ e ji shom hom, ko ma bɔrɔs nɛ na lashê yey hom. Nshi mo na tabas e ra berugu hom, ko na liring mwa berugu belis hom.

⁴Yaga tûk talâ neves há sè e yey hom, ko shêy fwôm viri hom ha ga pom.

⁵Ma bɛrɛng, ko vit à mwât sɛ́lɛ, ma lòlo bayis, ko vit à wo raa me, ano vwɔ hom gwa nɔng me wɛng, ko shom hom ya raa me.

⁶Ma bɔrɔs bemat e ji shom hom, ma bugut hɛn e ji lashê yey hom, ko ma shushu nemi mɛn e vwel.”

⁷Mê ha reha tsak tɛ̂ yey Dagwi Darwey, ko mê somo hɛ, yaga mwa pyɛ́ de Dagwi Darwey a ga ra a wot, na gbɔng nerat mɛ vɔk na lɔ̂ Israyɛl, yi na toshô reyɔm mɛ, na nepyak tsak tɛ̂ yey mɛ.

⁸Yaga a ye, “Mwin, yɛn a sé bemat hom, nèy de nê rów me wɛt, ko a ga tɛ́ ɛ wo sey ɛn,

⁹e mwâ reyɔm mɛn. A sé e tom hwak kɛ tom lagwi wɛt, ko e yɛ̀ pyɛ mɛ. E ji tɛ̂ yey mɛ na nemwishish mɛ, yɛ pyɛ mɛ a viri hɛn. A jut ɛn e rak o ko a kyè na yɛn mwa nepɔlɔ̂ raane.

¹⁰Ko yɛn a sogo a yɛ nehywɛ, yɛn a lashe yêy gabik mɛ hê jɛrɛ. Ano a tɛ́ ɛ wo repugu mɛn, yɛ pyɛ mɛ a tó como na yɛn.

¹¹Ano yɛn a bare na nepɔlɔ̂ raane, na Mose mwât fwom mɛ, yɛ womo de a sey belêk vyēl mɛ yi e gworep á wɛ? Yɛ womo de a tɛ̀ e ji mɛn gabik jɛrɛ mɛ mo á wɛ̀?

¹²Yɛ womo de a tɛ̀ vwɔ̂ gbɔng nerat mɛ, gwo kyè e vwɔ yegê Mose, yɛ de a gas nshi mo e nuyel mɛn, na a sɛ̀ a tó mɛ reza nesheneshey.

¹³A kyè na yɛn e gworep ciwil, sede dwa e hêy gbingiring, yɛn a tíi bol wɛt.

¹⁴Sede berɔndɔng de ba kyè vɔk e nɛk, gabîk Dagwi Darwey ha nɔng ɛn pɔngɔ. Ano hwà kyè na bemat mo, na hwo sɛ̀ a tó mo rezâ gbɔng nerat.”

¹⁵Bɛrɛng det yi e lagwi na hwo di, yi e kwɔ̂n sangal mo hê jɛrɛ, hê gbɔng nerat. Tɛ́ ngyɛ́k na gap mo ma hɛ ɛ? Símo tyɔng wɛt na toshô reyɔm mo ma hɛ ɛ? Hwo ye bam à hot wɛt,

¹⁶yaga hwà sé da mot. Mwa ano de Abraham a yâng tɔk ot wɛt, ko Israyɛl a yâng sey ot mwin wɛt. Hwo wɛ à Dagwi Darwey, da mot, wo viri hot yimo yi e raane à reza mo.

¹⁷Yaga sɛ́, à Dagwi Darwey, de hwó tɛ̀ wot a ye rɛng yi e begwong mo, ko hwo tɛ̀ neyey mot gbarak, yaga na wot a wok bengyip mo wɛt ɛ? Doyo yaga bemât fwom mo, yére de ya sé pyɛ̂ nedanelɔ mo.

¹⁸Bemat mo bá vɔk kwɔ̂n jɛrɛ mo jeng tyɔng, ko a remo vê repugu mot ba ga bɔrɔs hɛ.

¹⁹Wot a ga ros sede vemo de hwó re negwɔm e ra yɛn, kɛ vemo de be yila hɛn na reza mo wɛt.