Read berom Yɛshaya 64 Bible Online

Yɛshaya 64 - berom bible

Yɛshaya 64

¹Káa, ka hwà yang hama lagwi na hwo gyirik, yaga na beraku be digis e bayis mo.

²Sede remo de kya ha hwo e ra nelang cɔgɔt, ko kya mo he tɛ̀ nshi ne tē puu, na he tɛ̀ vê repugu mo be tɔk reza mo, yaga na yére bemat jey ye vow e bayis mo.

³Jeng de hwá ra pyɛ̂ langat de wot á bare yê té wɛt, hwá gyirik, ko beraku bá digis e bayis mo.

⁴Yi e neshey de na kwey, vit à mwat de a ga wok, vit à fwong de gwa ga mùkta, vit a yis de ha ga di Dagwi hwak sede hwo, de e ra ano a vemo de ba tɛ̀ gap mɛn e ra yɛ.

⁵Hwó man na vê yey pyɛng de be ra necik, vemo de be bare na kyé e begwong de be pɛngɛ a hwo yey. Hwà tɛ̀ shom, ko wot a sǎ e de râ banɛn, wot a ga ros, sey ot!

⁶Mwa hot wot a ga tɛ́ ot ligis ko tomông necik mot mwa ba sé sede cɛ̌k rugu ligis. Mwa hot wot e tē zùt sede berang, ko neburu mot ne kyè na wot e jey sede gul.

⁷Vit à winde e yila e ra reza mo, kɛ a mara kába gwong mo, yaga hwà ga lɛrɛ bayis mo na wot, ko hwà ga nára hot e vwɔ̂ tomông neburu mot.

⁸Mwa ano, à Dagwi Darwey, hwà sé da mot, wot a sé secwem, ko hwo à mwât lɔk mot, mwa wot a sé fwôm vwɔ mo.

⁹Hwo kwon vo shom ding-ding na wot wɛt, à Dagwi Darwey, ko hwo bare buru nesheneshey wɛt. A remo bare wot a sé bemat mo mwa.

¹⁰Bapomô jɛrɛ mo ba ga tɛ́ ɛn hêy gbingiring, Siyɔn wa ga tɛ́ ɛ hêy gbingiring, Yɛrusalɛm wa ga tɛ́ ɛ barin hal.

¹¹Gbɔng Duk Re Fongol mot wo jɛrɛ wo gbɔng nerat kwɔn de bedabeda mot bá kyě somo hwo ɛ, ba ga dak kya e wɛ, ko mwa nekwɔn nerat mot na ga tɛ́ ɛn barin.

¹²À Dagwi Darwey, hwô dul tó mo bamâ pyɛ́ yemo mwa a? Hwô sǎ yuu, na hwo tabak hot ding-ding ano a?