Read berom Yɛshaya 65 Bible Online

Yɛshaya 65 - berom bible

Yɛshaya 65

¹Dagwi Darwey a ye: “Ma dura tó hom na vemo de ba jama me wɛt. Ma ye, ‘Me à womo, me à womo’, na yerê bemat jey de ya yila e ra reza hom wɛt.

²Kahɛ tuk ma nára vɔ hom vɔk na yere ye sogô nehywɛ, yemo de ye kyè e gwong de gwa jam wɛt, ye raa pyɛ́ de ya yong pyɛ yɛ̄.

³Bemat de be sǎ e de cɔgɔs me, na nása nɔrɔ̂ pyɛ̂ rangas e bě, na nása pyɛ̂ nesang hyɔɔlɔl e ra gàgbang rangas wo bagàt bwos.

⁴Yɛn e sangsal e ji besak, ko be pɔlɔs e nekwɔn lɛrɛ. Yɛn e re banamâ zà, na lêng pyɛ̂ byɛm-byɛm e neshǐ mɛn.

⁵Yɛn e tē, ‘Sangal hin e jey, yin vey bagat na me wɛt, yaga ma sé jaram e ra yin.’ Bemat o ba sé sede sekyeng e bawol hom, sede kya de he lolo kayɛ jeng.

⁶Di, ba jɛk yɛrɛ̂ shɔt mɛn ngan: Mê sǎ yuu wɛt, ko mê tala hɛn. Mwin, mê tala hɛn e ra bol mɛn,

⁷banɛn mɛn na vê bedabeda mɛn mwa. Hâ Dagwi Darwey à hemo. A remo de yɛn a rangas pyɛ̂ nesang hyɔɔlɔl e ra beraku, ko ba dùsa me e berahwol. Mê mara e ra bol mɛn pyɛ̂ tala mwa yaga tom mɛn.

⁸Dagwi Darwey a ye: Sede remo de be sɛ̀ vwɔ̂ nèy anap de nshi mo na rɔngɔl e ji mo, ko bemat bé ye, ‘Hwo kwon wey na gwɛ wɛt, yaga pyɛ ryat ya se e ji mo.’ Mê ra ano yaga nerât bemât fwom hom, ko mê wey na yɛn mwa wɛt.

⁹Mê yi na yere yi e Yakɔp ko yi na Yuda, bemât rê nedanelɔ beraku hom. Vemo de ma kasa bê re nedanelɔ yɛ̄, ko bemât fwom hom bê sangal e hwomo.

¹⁰Nɛk Sharon wô sè kwɔ̂n sehwêy vyēl, ko Nɛk Akɔr kwɔ̂n dyɛngɛ̂ berɔndɔng, yaga bemat hom de ba jama me.

¹¹Ko yin de yin a ye waa à Dagwi Darwey, yin a ye bam à raku hom wo jɛrɛ, yin a yong kwɔ̂n rê pyɛ́ yaga Gat, ko yin a sila nekyɔ̂k nshi anap de ba ga puru yaga Meni, ci min.

¹²Mê tɛ̀ yɛnɛ min he sè na wal, ko mwa yin yin ê ye ngyuk na be yɛt in, yaga jeng de ma yila ko yin á toyo a mɛ wɛt, jeng de ma ha, yin á wet betong wɛt, ko yin á ra pyɛ de ya sé vyes e bayis hom, ko yin á kasa pyɛ de ma vɔk yey pyɛng na yɛ wɛt.

¹³Yaga ano Darwey Dagwi Darwey a ye: Bemât fwom hom bê re, ko yin ê wok vyong, bemât fwom hom bê sɔ, ko yin ê vɔk yêy hwɔshɔ, bemât fwom hom bê vɔk yey pyɛng, ko yin ê sɔ rekyen.

¹⁴Bemât fwom hom bê ra lwɛlɛ na yey pyɛng, ko yin ê tosho na nepêp yey, ko yin ê dak sekun na lashê gabik.

¹⁵Yin ê tik zá min sede pyɛ dúsa na vemo de ma kasa, ko Darwey Dagwi Darwey ê mɔbɔs hin, ko na bemât fwom mɛ ê nɔng ɛn reza detu.

¹⁶Kawɛ de a jama nerât tó mɛ e vwel o, ê jama nɛ yi na rezâ Dagwi wo tsak o, Kawɛ de a sira e vwel o ê sira na rezâ Dagwi wo tsak o. Yaga ba ga ye bam à yɔ́m hê raane, ko ha sé e lɛrɛ na me.”

¹⁷Di, ma sé kyè wɔ̀ yong lagwi pwas na jey pyas arɔng. Pyɛ̂ raane bê to bare na yɛ, kɛ yê to vey e yey wɛt.

¹⁸Ko vɔk yey pyɛng na hwo shɛgɛsh gbak-gbak, e ra pyɛ́ de ma sé yong, yaga ma sé kyè wɔ̀ yong Yɛrusalɛm na wo sè pyɛ yey pyɛng, na bemat o be sè pyɛ nerat.

¹⁹Mê vɔk yey pyɛng e Yɛrusalɛm, ko mê di nerât bemat hom, Bê to wok lwɛ́lɛ sesin e ji mo ko tyɔng wɛt, kɛ sesîn lashê yey ayi.

²⁰Bê sang to sɛ̀ hwey e ji mo de hê sè ken nepɔlɔ tyɔng zɔng wɛt, kɛ mwakuk de a wul jeng kwopa mɛ wɛt, yaga womo de ê ku na neshey naga bê di ɛ sede wen, ko womo de a radɛ neshey naga bê di ɛ sede wò gawey.

²¹Yɛn ê lɔk nelɔ be sangal e nɛ, yɛn ê tus bě anap ko be re nèy o.

²²Yɛn ê lɔk nelɔ, ko behak be sangal ɛ wɛt, yɛn ê tus pyɛ́ ko behak be re wɛt, yaga sede nepɔlɔ̂ cɔgɔt ano nepɔlɔ̂ bemat hom nê sè, ko vemo de ma kasa bê ros e de wôk netâ fwom vɔ mɛn.

²³Bê pɛngɛ hɛ̂n fwom e nɔrɔ wɛt, kɛ bê tɔs nèy de ba yong a nɛ gawey, yaga yɛn ê sè yerê vê nerât Dagwi Darwey ko nèy mɛn nê sè ano arɔng.

²⁴Gyam na yɛn a yila mê toyo mɛ, yɛn a sè rɔ̌ ha mê wok.

²⁵Gbɔng bwá na byot tyimit bê re pyɛ́ jining o, gukum wô re hwéy sede hywàrak, ko gàbak, pyɛ̂ re gwɛ yê sè búm! Yɛn ê mǎ, kɛ be wey na pyɛ e ra mwa raku hom wo jɛrɛ wɛt. Hâ Dagwi Darwey à hemo.