Read berom Yɛshaya 66 Bible Online

Yɛshaya 66 - berom bible

Yɛshaya 66

¹Dagwi Darwey a ye: Lagwi wa sé gwofwa negwɔm hom, ko jey ya sé kwɔ̂n tîk bol hom. E yerê hɛ̌ lɔ de yin ê lɔk a me, ko e yerê hɛ̌ kwɔn de mê pɔng ɛ ɛ?

²Mwa pyɛ́ yemo, e vwɔ hom de gwa yong, yaga ano, mwa ye ya sé nyang. Hâ Dagwi Darwey à hemo. Ko bayis hom ba sé e ra mwat de a dyɛng to mɛ, ko a vɔk gabîk tosho gabɔk, womo de e sap ha hom.

³Bemat behak be yɛrɛ mus ko behak be yɛrɛ mwasi, behak be nára nɔrɔ̂ byot tyimit, ko behak be kwɔrɔ fwɔ̂ vu, behak be nára nɔrɔ̂ pyɛ̂ yeneng, ko behak, nɔrɔ̂ nemi zà, behak be nɔng pyɛ̂ bare yê nesang hyɔɔlɔl, ko behak be tɛ̀ a ci nerat. Mwa bemat vemo ba ga kasa begwong o bemɛn, ko yɛn e wok netâ râ pyɛ̂ byɛm-byɛm.

⁴Me arɔng me wok netâ tabak hɛn, na me vey a yɛn na pyɛ de yɛn e tele hɛn yɛ. Yaga ma ga yila ko vit a winde a toyo a mɛ, jeng de ma hanat, yɛn a wet betong wɛt. Ko yɛn a ra pyɛ de ya sé vyes e bayis hom, yɛn a kasa pyɛ de ya dyɛng a me yey wɛt.

⁵Wet in betong na hâ Dagwi Darwey, yin de yin e vow e ra ha mɛ. Begwa min de ba ye zak a hin, ko yɛn a kyɛ́ ɛn hin yaga reza hom, ba ye, “Tik na Dagwi Darwey a dura gbɔng nerat, yaga na wot a di yey pyɛng min.” Ko e yɛn de bê tɛ̀ a yɛn rekyen.

⁶Wet in betong! Lwɛ́lɛ yi e gbɔng repomo! Fwɔ yi e Gbɔng Duk Re Fongol! Fwɔ̂ Dagwi Darwey! A vey na tabâk vê repugu mɛ!

⁷Gyam na Siyɔn a wok royô jîm tɔ, ko a ga tɔ, gyam na jîm tɔ ye firik hɛ, a ga tɔ hwey wen.

⁸Wà a ga wok pyɛ yemo ɛ? Wà a ga di pyɛ yerê yemo ɛ? Bê tɔ vwel tuk hining a? Bê tɔ yerê bemat jey e kejeng a? Mwa ano, ras de Siyɔn a hwo ririm na jîm tɔ, a ga tɔs nèy mɛ.

⁹Mê vey na hwo e jeng tɔ, ko mê tik hwo tɔ wɛt a? Hâ Dagwi Darwey à hemo. Mê vey na tɔ, ko mê bang jim o a? Hâ Dagwi min à hemo.

¹⁰Shɛgɛsh hin na Yɛrusalɛm, na yin a vɔk yey pyɛng yaga yɛ, mwa yin de yin a tɛ̀ yey na yɛ, shɛgɛsh hin na yɛ na yey pyɛng mwa yin de yin a tosho hɛ!

¹¹Yaga na yin a ngas, yin a sirik, yi e vasâl Siyɔn de he wɔrɔk hin, yaga na yin a sɔ pyak na yêy dyɛngɛ, yi e vasâl gbɔng nerat mɛ.

¹²Yaga Dagwi Darwey a ye: Di, mê tɛ̀ sangal tyang e ra yɛ sede rɔt, na gbɔng nerât yére bemat jey ne dɔ́ng e ra yɛ sede nshî rɔt. Yin ê ngas ko Siyɔn ê vɔk in e vɔ mɛ, na yin a ra jɔgɔ e ra bol mɛ.

¹³Sede neng e wɔrɔk hwey mɛ, ano de mê wɔrɔk hin e Yɛrusalɛm.

¹⁴Yin ê di ko yey min yê pɛngɛ, bagap min bê ras naka sede sɔng, ko bê tɔk, vwɔ̂ Dagwi Darwey gwa sé na bemât fwom mɛ, ko shom mɛ ya sé e ra vê repugu mɛ.

¹⁵Di in, Dagwi Darwey ê vey e ji kya ko bekyɛkyɛ̂ bedwa mɛ sede wúla, na a tala shom mɛ dey-dey, na gyong mɛ e balêm kya.

¹⁶Yaga a sé na kya de Dagwi Darwey ê yɛrɛ shɔt mɛ, ko e rá na wal mɛ e ra bemasi mwa, ko vemo de Dagwi Darwey ê mɔbɔs bê sè pyak.

¹⁷Vemo de ba fung bato mɛn ko ba tɛ̀ bato mɛn jaram na be yel e bě mo, be raa womo de a sé e tê vemo de be re banamâ bazà, na ngyāma rê banama, tanga cū bê wey mwa. Hâ Dagwi Darwey à hemo.

¹⁸Yaga ma tɔk tomong na bare mɛn, ko ma sé kyè vey tula mwa yére bemat jey na balem mwa, ko yɛn ê vey, bê di gbɔng nerat hom.

¹⁹Ko mê tɛ̀ pyɛ dura e tē mɛn. Yi na yɛn mê tomo bwang o vɔk na yére bemat jey, vɔk e Tarshish, na Libya tanga Lut — de be tabas na begbang — na Tubal, tanga Giris, vɔk na bemât bakwogom mwa yikyik de ba ga wok rehâ reza hom, kɛ ba di gbɔng nerat hom wɛt. Ko yɛn ê shara gbɔng nerat hom e ji yére bemat jey.

²⁰Yɛn ê vey na mwa cáng min yi e mwa yére bemât jey sede pyɛ̂ nɔrɔ vɔk na Dagwi Darwey, e ra bedwa, na e ra bekyɛkyɛ̂ bedwa, na e bewágùn de ba bang, na e ra bedwa-madung, tanga e ra bemaryat vey e Yɛrusalɛm rakû jɛrɛ hom, tyɛng sede BeIsrayɛl be vey na nɔrɔ̂ pyɛ̂ yeneng e neshǐ jɛk jɛk vey e lɔ Dagwi Darwey.

²¹Ko ma rɔda jut behak e ji mɛn sede bepiris tanga BeLevi. Hâ Dagwi Darwey à hemo.

²²Sede remo lagwi pwas na jey pyas de mê yong, yê nàra e nuyel hom, ano de yére mō na reza mō bê nára. Hâ Dagwi Darwey à hemo.

²³Yi e pwɛl pwas vɔk e pwɛl pwas, na yi e Shábat vɔk e Shábat, mwa bemasi bê vey re fongol e nuyel hom. Hâ Dagwi Darwey à hemo.

²⁴Yɛn ê nusu e jey ko be bɛrɛng bavîn bemat de ba ga sogo a me nehywɛ, yaga bekǔt rê babek mɛn bê ku wɛt, bê rimi kya mɛn o arɔng wɛt, ko yɛn ê sè pyɛ̂ byɛm-byɛm na mwa bemasi.