Read berom Yɛshaya 7 Bible Online

Yɛshaya 7 - berom bible

Yɛshaya 7

¹Jeng de Gbɔng Gwɔ̀m Ahas Yɔtam Uziya a sè re negwɔm e Yuda, ko Rezin, gbɔng gwɔ̀m Sirya, na Pɛka Remaliya, gbɔng gwɔ̀m Israyɛl ba hwo Yɛrusalɛm na como, ko ba tɔk re wɛ wɛt.

²Jeng de gbɔng gwɔ̀m Yuda de a re negwɔm Davit a wok, BeSirya ba ga wuna hɛn na BeIsrayɛl, yɛ na belɔ mɛ ba vo bengyip tyɔng wɛt, ko yɛn a vow sede cɔ́gɔt de gul gwo pɛsɛl yɛ.

³Dagwi Darwey a hwo yâng Yɛshaya, “Jut hwey mo Sheyar Yashup[1] na yin wɔ̀ man na Gbɔng Gwɔ̀m Ahas. Yin ê sɛ̀ ɛ́ e gwông kwɔ̂n bemât yông shwêy berugu, e bak yɛnɛ̂ rekang de re vɛ̀sɛ na nshi yi e dideng wo rak o.

⁴Yang ɛ a bɛrɛng nekanang, ko a sǎ yaang, a vo bengyip kɛ a tik pyɛ mo ye bɔrɔk hɛ wɛt. Yaga shôm Gbɔng Gwɔ̀m Rezin na BeSirya mɛ tanga yê Gbɔng Gwɔ̀m Pɛka Remaliya ya vɔk neves de na dal ne sekyeng de sé tugus yi e bekpàrák beba wɛt.

⁵BeSirya tanga BeIsrayɛl na gbɔng gwɔ̀m Israyɛl ba ga yong gwong vwes de yɛn ê ra a hwo.

⁶Yɛn a vɔk e yey mɛn na be hwo Yuda, be wey na wɛ, na be tɛ̀ hwêy Tabeel e ra gwofwa negwɔm Yuda.”

⁷Darwey Dagwi Darwey, a ye ngan, “Pyɛ yemo yê sang té wɛt.

⁸Yaga gâp Sirya mwa hɛ à Damaskus ko gâp Damaskus mwa hɛ à Rezin. Ko di Israyɛl e ji neshey kuru batyiimin na nɛ netungun (65) bê shara hɛn vit.

⁹Gâp Israyɛl mwa hɛ à Samariya, ko gâp Samariya mwa hɛ à Pɛka Remaliya. Ka sede yin a tɛ̀ gap e ra me wɛt ko yin ê vɔk gap wɛt.”

¹⁰Dagwi Darwey a to tomo a Ahas na ha mo hak, a ye,

¹¹“Rangâl Dagwi Darwey, Dagwi mo na a nɔng o pyɛ dura. Yê tɔk sè yi e kwɔn hak — e nɛ̂n vwêl bevuvwel, kɛ e rak o e lagwi ayi.”

¹²Ahas a toyo a yɛ, a ye, “Mê rangal pyɛ dura wɛt. Mê mara Dagwi Darwey wɛt.”

¹³Ko Yɛshaya a toyo mɛ̀, a yɛ, “À yin yerê Gbɔng Gwɔ̀m Davit, wok in. A ga vey ano de yin e cɔgɔs bemat wɛt arɛt? Yin ê cɔgɔs Dagwi hom arɔng a?

¹⁴Yaga ano, Darwey ê nɔng in pyɛ dura: Hwong hwak a vɔk jim ko ê tɔ hwey wen, ko hwo vo a hɛ rezâ Imanuwɛl.[2]

¹⁵Jeng de a ga ras, na a tɔk kasa pyɛ ryat, na a kyɛ́ ɛ pyɛ vyes, pyɛ̂ re mɛ yê sè nevasal pɔgɔdɔk na shok.

¹⁶E jeng o, bavwêl begwɔ̀m vemo de bá kyě tɛ̀sɛ a hwo bengyip bê tɛ́ ɛn hal.

¹⁷“Dagwi Darwey ê vey a hwo na nepɔlɔ̂ reyɔm, hwo na bemat mo, na mwa yerê lɔ gwɔ̀m mo; reyɔm o rê dal rê yimo jeng de segwɔm Israyɛl sa gas ɛ yi e sê Yuda. Dagwi Darwey ê vey a hwo na Da vwel Asirya.

¹⁸“E jeng o, Dagwi Darwey ê ra sepwɛmɛl na a yila mɛ BeMisra yi e nû Gwɔrɔt Nil na yɛn a vey pyak sede cíng, tanga BeAsirya na yɛn a vey pyak sede shok.

¹⁹Yɛn ê ye ship a bèkwɔbɔrɔ̂ng benɛk, na tara beta, ko yɛn a bang karɛ retîn rɔgɔ tanga kahɛ hêy bedwa.

²⁰“E jeng o, Darwey ê yila Da vwel Asirya yi e gurâ Gwɔrɔ̂t Ɛifaratɛs na a hwon negyɛk min, na setôt rato min, tanga hê rebek min mwa.

²¹“E jeng o, ka mwât cap a ka tɛ́t ɛ̀ shep rɔndɔng jining, na vyēl bya,

²²ko yê nɔng nevasal sizɔng nemo de nê vey a yɛ. Ey, bwang bemat tyɔng de ba dal e vwel o bê re nevasal pɔgɔdɔk na shok de nê vey a yɛn.

²³“E jeng o, bě anap rat, de kagwɛ gwa vɔk batîn anap gu rining (1,000), ko kagwɛ gwa sé e nû cɛ̂k dyam pyɛng gu rining (1,000), shik na serɔgɔ bê vos vɛ̀.

²⁴Bemat bê kyese jàma na begbang na ket e hwomo, yaga vwel o mwa hê sila na shik na serɔgɔ,

²⁵ko bê sila — berahwol de bá kana tus ɛ pyɛ́ raane, ko vit à mwat de ê kyɛm a to wɔ̀ yel e ji vɛ. Bê sè kwɔ̂n gyengês berɔndɔng na tyīmit zɔng.”