Read berom Yɛshaya 8 Bible Online

Yɛshaya 8 - berom bible

Yɛshaya 8

¹Dagwi Darwey a yang me, “Jut pyɛ jɛk ryey o, ko hwo jɛk e ra yɛ na batîn jɛk begbɔng o ngan, ‘Pyɛ̂ jugu bɛs, hashe ziri’.[3]

²Jama Uriya piris na Zɛkarya Yɛbɛrɛkya na be sè bemât nuha.”

³E bamâ jeng, ma yel na hwā hom, a hwo sey jim, ko a tɔ hwey wen. Ko Dagwi Darwey a yang me, “Vo a yɛ rezâ, ‘Pyɛ̂ jugu bɛs, hashe ziri.’

⁴Gyam na hwey o he wul jeng yila ‘Dara’ na ‘Dere’, ko Da vwel Asirya ê hashe mwa pyɛ̂ nedanerêy Damaskus na mwa pyɛ̂ jugû Samariya.”

⁵Dagwi Darwey a to ha a me.

⁶A ye, “Remo de bemat vemo ba kyɛ́ ɛn nshi de ne tele yuuyuu e Rɔt Shilowa, ko be vow rebek e nuyêl Gbɔng Gwɔ̀m Rezin na Gbɔng Gwɔ̀m Pɛka Remaliya.

⁷Me Darwey mê vey na Da vwel Asirya na bemât como mɛ mwa na be hwo e ra Yuda sede tɛmɛ-nshi Gwɔrɔ̂t Ɛifaratɛs de na bang bakwogom o.

⁸Yɛn ê pe rung vwêl Yuda sede tɛmɛ-nshi de na wɔ̀ vo fwɔ̂ mwat. “Ko Dagwi a sé na wot![4] A wuma bafabak mɛ na a gyep mɛ vwel o.

⁹“Tula hin na bengyip, à yin yére bemât jey! Wet in betong, à yin bemat jey vê yikyik! Yong in yaga yol, ko yin gaba! Yong in yaga yol, ko yin gaba!

¹⁰Yong in badu, ko bê sè yapyi. Há in ha min, ko yê sang tē wɛt, yaga Dagwi a sé na wot.”[5]

¹¹Jeng cak gbɔng retô Dagwi Darwey ra sé e ra me, ko a tusa me, a ye, “Hwo kyè e gwong bemât yere yemo wɛt.

¹²Hwo dopse bare e ra bemat de be wuna to e ra bemat hom wɛt! Hwo vɔk bengyip pyɛ́ de yɛn e tele hɛn yɛ wɛt!

¹³Ko bare, Dagwi Darwey, Dâ Jey Mwa, yɛ de hwô ye a sé jɛrɛ, yɛ de hwô wok bengyip mɛ, yɛ de hwô tele hwo hɛ.

¹⁴Yaga gbɔng nejɛrɛ mɛ, yɛ a sé sede gwofwa de bemat be tiris bol e ra gwɛ. A sé sede segun de sê vos bemât segwɔm Yuda na Israyɛl tanga bemât Yɛrusalɛm arɔng.

¹⁵Bemat pyak bê tiris bol, be gabsa, ko be kwɔrɔs hɛn. Bê vos ɛn na segun.”

¹⁶Gyeng nuha hom gak, lɛrɛ basa mo e neyey bemât masâ fwom hom.

¹⁷Dagwi Darwey a ga lɛrɛ bayis mɛ yi na BeIsrayɛl, ko mê sɛt yey hom e ra yɛ.

¹⁸Me à womo na nèy de Dagwi Darwey a ga nɔng me. Dagwi Darwey, Dâ Jey Mwa, de gwofwa negwɔm mɛ gwa sé e ra Raku Siyɔn, a ga tomo hot na wot a sè pyɛ dura na pyɛ langat vɔk na BeIsrayɛl.

¹⁹Ko ka bemat ba yang in yin rangal neha detidetu yi na bemât hâ pyɛ́ de ye kyè ba té, na vê ha na bevuvwel, yɛn e kùnus sede cóngot ko be ha show-show. Yɛn ê ye, “A sé naka bemat be rangsal neha yi na bedagwi mɛn, ko wot vê neken wot rangsal yi na vê reku.”

²⁰Yin ê toyo a yɛn ngan: “Wet in betong na yin a wok basa na nuha Dagwi Darwey!” Tik na vemo de be ha ano be to pɔl wɛt!

²¹Bemat o bê kyě gǎ e ji vwel o, ê sè a yɛn gbɛrɛk, yɛn ê vɔk vyong arɔng. E ji vyong de yɛn ê wok, na e ji shom de yɛn ê wok arɔng, yɛn ê dùsa gbɔng gwɔ̀m na bedagwi mɛn. Yɛn ê lolo bayis e lagwi,

²²kɛ e vwel, ko yɛn ê di pyɛ cak wɛt sɛ̌ reyɔm zɔng na nemwangalang.