Read berom Yɛshaya 9 Bible Online

Yɛshaya 9 - berom bible

Yɛshaya 9

¹Vemo de bá kana sè e ji reyɔm, bê to sangal e ji newangalang wɛt. Ba ga kana byɛs bavwêl Zɛbulun na Naftali sede pyɛ́ shɛl, ko e jeng o bê nɔ̂ng yɛnɛ̂ vwel o nerey — kwogôm Gworep Tē, vwêl gurâ Rɔt Yɔrdan, tanga vwêl Galili de yére dyuk ya sangal ɛ.

²Bemat de bá kyě kyè e ji lwil ba ga di gbɔng negbey. Vemo de ba sangal e lwil mwangalang, negbey na ga hwo e ra yɛn.

³Hwà ga gwɛ̌ nepyak yere mo, hwà ga gwɛ̌ a yɛ yey pyɛng. Yɛn a vɔk yey pyɛng na pyɛ de hwà ra, sede vemo de ba ga yɛt bwal, kɛ vemo de ba sé gas pyɛ̂ jugu.

⁴Yaga hwà ga pat nedirik e rafwɔ mɛn sede kwɔrɔ̂ swesêk vɔk berɔndɔng. Hwà ga re yere de ya kyě tak a bemat mo, tyɛng sede hwá re bemât comô Midyan.

⁵Bekpatâk bemat de ba vey hwo ot na como mwa na berugu mɛn de bà vɔk nemi tyɔng wɛt, kya hê re yɛ sede sɔng.

⁶Yaga ba ga tɔ a wot hwey, ba ga nɔng ot hwey wen! Ko yɛ ê re negwɔm. Bê yila hɛ à, “Mwât fwɔ̂ redu wo langat. Sugâ Dagwi, Dara Gbak-Gbak. Gwɔ̀m netyang.”

⁷Segwɔm mɛ sê gwɛ́sɛ hɛ. Netyâng vwel o nê nàra gbak-gbak. Yɛ ê re negwɔm e tô Gbɔng Gwɔ̀m Davit. Ê tɛ̀ retîs negwɔm mɛ e ra gâs badu e tē na necik. Yi e remo vɔk e nesheneshey. Dagwi Darwey, Dâ Jey Mwa a ga tɛ̀ e yey na a ra ano.

⁸Darwey a ga tomo na ha e ra BeIsrayɛl ko ha gaba e ra lɔ Yakɔp.

⁹Ko mwa bemat o ba tɔk hɛ — vemo de ba sangal e repomô Samariya, na BeIsrayɛl mwa — ko yɛn a tos bato mɛn, yɛn a kyɛ́ ɛn nà wok, yɛn e tē,

¹⁰“Bāgat bwos beduk mot ba ga gabsa, ko wot ê lɔk e tô vɛ na beta. Babîm regwi beduk mot ba ga kwɔrɔs hɛn, ko wot ê lɔk e tô vɛ na sida.”

¹¹Ano, Dagwi Darwey a ga tɔgɔs bemât repugu mɛn e ra yɛn, a tɛ̀ ɛn be hwo e ra yɛn.

¹²BeSirya e rwa rak na BeFilisti e rwa ta, ba ga wuma nenu mɛn na be re mɛ Israyɛl. Mwa ano, shôm Dagwi Darwey yê ye rɔ̀s wɛt, ko vwɔ mɛ gwô sè e nára na gwo tabak hɛn.

¹³BeIsrayɛl ba rɔngɔl sana tosho a Dagwi Darwey, Dâ Jey Mwa gabɔk, yɛn a ga ka doyo vey na yɛ de a ga tabak hɛn wɛt.

¹⁴E tuk hining zɔng Dagwi Darwey ê yɛnɛ na BeIsrayɛl mwa, sede a sé yɛt bato na bol tanga nelang tyet na sere,

¹⁵wɔgɔ, bemakuk na begbɔng bemat yɛn vɛ a bato mo, ko bol o vɛ à bezarap mɛ de be basa a bemat hâ bɔs!

¹⁶Vemo de be dura gwong ba ga buru, ko vemo de be raa gwong, a sé a yɛn kpɛɛ.

¹⁷Yaga ano, Darwey ê tik bebot o be hywit ɛn wɛt, ko ê wok nemwishish bekuma na nehyɛn wɛt arɔng, yaga bemat o mwa ba wok bengyip Dagwi wɛt, ko be ragas neves, yɛn e ha hâ netɔn zɔng. Mwa ano, shôm Dagwi Darwey yê ye rɔ̀s wɛt, ko vwɔ mɛ gwô sè e nára na gwo tabak hɛn.

¹⁸Neves o nê shara hɛ e vwel o sede kya de he re shik na serɔgɔ, kɛ sede kyâ rehwot de he paa rewûk sekyeng vɔk e rak o.

¹⁹Yaga ano shôm Dagwi Darwey, Dâ Jey Mwa ye shara hɛ sede kya, ko bemat o be tɛ́ ɛn sede sɔ̂ng kya, vit à hwak de a tik mumwɛ.

²⁰E kawɛ bak sevwel o, bemat be tow kayɛ yerê pyɛ́ de yɛn a tɔk sɛ̀ na be re, ko yɛn e tɔk sirik wɛt. Ko yɛn e re nèy-vɔ mɛn mwa!

²¹Bemât yerê Manase na vê yerê Ɛfrayim be ra yol na bemɛn, ko a remo yɛn a doyo e ra Yuda. Mwa ano, shôm Dagwi Darwey yê ye rɔ̀s wɛt, ko vwɔ mɛ gwô sè e nára na gwo tabak hɛn.