Read berom Bepiris 1 Bible Online

Bepiris 1 - berom bible

Bepiris 1

¹Dagwi Darwey a yila Mose, ko a hwo ha na yɛ yi e bûk sangal mɛ.

²A yang ɛ, a ha a BeIsrayɛl ngan: Jeng de mwat hwak e ji min a sé kyè wɔ̀ nára nɔrɔ̂ yas vɔk na Dagwi Darwey, tik na a jut yi e karâ berɔndɔng kɛ vyēl pyɛng kɛ vyēl shi ayi.

³Ka sede a sé kyè wɔ̀ nara nɔrɔ̂ yas burang, ko ha sé yi e ji berɔndɔng, ko tik na a jut mus de wa vɔk rām kɛ pyɛ cak vyes wɛt, yaga na Dagwi Darwey a bin sey wɛ. A rɔda vey na wɛ e rwi bûk sangâl Dagwi Darwey,

⁴ê tɛ̀ vwɔ mɛ e ra tô wɛ, ko Dagwi Darwey a rɔda sey wɛ e tô mwat o yaga talâ-nɛn.

⁵Yɛ mwat o a rɔda yɛrɛ ngyi mo e hwomo e nuyêl bûk sangâl Dagwi Darwey. Gwining e ji yére Aharon de a sé piris a rɔda jut nemi mo, ê nára a Dagwi, ko ê waram nɛ e mwa bebak gàgbang rangâs yas de wa sé e rwi buk o.

⁶Mwat o a rɔda wɔnɔ yas o, ko ê to yɛt yɛ bagap o bagap o.

⁷Ko piris o a rɔda pɛl kya e ra gàgbang rangas o, ko ê ngyɛrɛ cɔ́gɔt e ra hɛ.

⁸A rɔda ngyɛrɛ bagâp banama mo mwa na to mo na sebwep o e ra cɔ́gɔt o.

⁹Yɛ mwat o a ga kana kus pyɛ̂ jim o tanga bol bama mo, ko piris o ê rangas banama mo mwa e ra gàgbang rangas o. Nesang nɔrɔ̂ pyɛ̂ re yemo ne pɛngɛ a Dagwi Darwey yey.

¹⁰Ka sede nɔrɔ mɛ de ê nára mo ha sé yi e ji vyēl pyɛng kɛ vyēl shi ayi, ko tik na a jut turuk kɛ gam de wa vɔk rām kɛ pyɛ cak vyes wɛt.

¹¹A rɔda yɛrɛ wɛ e nuyêl bûk sangâl Dagwi Darwey e vwɔ yege gwo gàgbang rangâs yas o. Ko piris a rɔda waram nemi mo e mwa bebak kwɔn o.

¹²Yɛ mwat o ê yɛt banama mo bagap o bagap o. Ko piris o ê ngyɛrɛ vɛ tanga to mo, na sebwep o e ra cɔ́gɔt o.

¹³Yɛ piris o a ga kana kus pyɛ̂ jim o tanga bol bama mo, ko yɛ ê rangas banama mo mwa e ra gàgbang rangas o. Nesang nɔrɔ̂ pyɛ̂ re yemo ne pɛngɛ a Dagwi Darwey yey.

¹⁴Ka sede nɔrɔ mɛ mo de a sé kyè wɔ̀ nára a Dagwi Darwey ha sé yi e ji benon, ko tik na a jut wǔtut kɛ gwobɔp.

¹⁵Piris ê vey na gwonon o e gàgbang rangas o, ê tsipta fwɔ̂ gwɛ na a pat to mo, ko ê rangas gwɛ e ra kwɔn o. A rɔda tɛrɛ nemi mo e hagât gàgbang rangas o.

¹⁶A rɔda to pat rebu mo na pyɛ̂ re mo, ko ê bomo yɛ e bak rwa rak wo gàgbang rangas o, e kwɔn de be lusha ɛ nefongôl kya.

¹⁷A rɔda vugu gwɛ e tē yi e bafabak o sana gas gwɛ, ko a rangas e ra cɔ́gɔt de ya sé e ra gàgbang rangâs yas o. Nesang nɔrɔ̂ pyɛ̂ re yemo ne pɛngɛ a Dagwi Darwey yey.