Read berom Bepiris 10 Bible Online

Bepiris 10 - berom bible

Bepiris 10

¹Nadap na Abihu, nèy neba e ji nèy Aharon, kawɛ mɛn a jut repey, ba tɛ̀ rɛ kya, ba tɛ̀ rɛ pyɛ̂ nesang hyɔɔlɔl, ba sè nára yɛ nɔrɔ vɔk na Dagwi Darwey. Ko kya mo ha sé hemo de a ga nɔng ɛn nu, be nára mɛ nɔrɔ wɛt.

²Ko kya ha vɛ̌ yi na Dagwi Darwey, ha wey na yɛn e hwomo e nuyel mɛ.

³Mose a yâng Aharon, “Di, pyɛ ma yemo de Dagwi Darwey a ha, jeng de a ye, ‘Mwa vemo de be vey bagat na me, gbing-gbing be nɔng me nerey, yaga ma sé jɛrɛ; bemat hom mwa arɔng be nɔng me nerey.’ ” Ko Aharon a ka tùt nu wɛt.

⁴Mose a yila Mishayɛl na Ɛlzafan, nèy Uziyɛl gwa dâ Aharon, ko a yâng ɛn, “Vey in e ngamo, na yin hashe bavîn begwa min yi e kwɔ̂n jɛrɛ vɔk e mâ jêy kwɔ̂n ye ngyɔk.”

⁵Ano de yɛn a vey, ba kaba berugu mɛn, ko ba hashe bavin mɛn o, sede remo de Mose a ga nɔng nu.

⁶E bama mo, Mose a yâng Aharon na nèy mɛ Ɛlɛyazar tanga Itamar, “Yin tik setot rato min jagam wɛt, kɛ yin hama berugu min, na yin dura mɛ lashê yey wɛt. Ka yin a ra ano, yin ê kushu, ko Dagwi Darwey ê ra shom na BeIsrayɛl mwa. Ko begwa min BeIsrayɛl mwa bē tosho, yaga bemat vemo de Dagwi Darwey a wey mɛ na kya.

⁷Yin hala rwi buk o wɛt, ka ano wɛt yin ê kushu, yaga ba ga tɛ̀ in jaram na něy shushu ne jɛrɛ nɛ Dagwi Darwey.” Ano de yɛn a ra tyɛng na hâ Mose.

⁸Ko Dagwi Darwey a ha na Aharon, a ye,

⁹“Di, hwo na nèy mō, yin sɔ nshî anap kɛ kanɛ nshi de ne tɛ̀ sefeng jeng de yin ê yel e bûk sangal hom wɛt; ka yin a ra ano, ko yin ê kushu. Hemo ha sé redu de yin ê raa e bezamang min.

¹⁰A sé gbing-gbing yin gas e tê pyɛ́ de ya sé yê Dagwi na yemo de ya sé yê zɔng-reng, na e tê yemo de ya sé haalal na yinde ya sé ligis arɔng.

¹¹Yin basa a BeIsrayɛl badu hom mwa, vemo de me ma ga nɔng vɛ e vwɔ̂ Mose.”

¹²Ko Mose a yâng Aharon na Ɛlɛyazar tanga Itamar, nèy mɛ neba de na tɛt ɛ, “Jut in nɔrɔ̂ nemuk de na tɛt ɛ yi e nenɔrɔ̂ pyɛ̂ re ne Dagwi Darwey, yong in mɛ kpam-tuk sana géy-sing, yin re wɛ e hagât gàgbang rangas. Yaga wa sé pyɛ de ya dal mwa na nejɛrɛ,

¹³re in yɛ e kwɔ̂n jɛrɛ. A sé numo mo, à Aharon, tanga nèy mō hê pyɛ́ de ba nára nɔrɔ vɔk na Dagwi Darwey. Pyɛ ma yemo de a ga kana nɔng me nu.

¹⁴Ko cɔ̌ na fwa mo de ba ga ra mɛ, sede ba sé nára a Dagwi Darwey mɛ nɔrɔ, hwo na nèy mō bewen o tanga behwong o yin re yɛ̄ e kwɔ̂n haalal. Ya sé numo min à hane hê pyɛ́ de BeIsrayɛl ba nása mɛ nenɔrɔ̂ wunâ nesa.

¹⁵Tik na yɛn a vey na fwa mo na cɔ̌ mo tanga cûng sebwep de ba rɔda rangas yɛ, na be ra mɛ, sede ba sé nára mɛ nɔrɔ vɔk na Dagwi Darwey. Cɔ̌ mo na fwa mo yê sè myo na nèy mo e bezamang min, sede remo de Dagwi Darwey a ga kana nɔng nu.”

¹⁶Mose a rangal rehâ gam de wá gà sè yaga nɔrɔ̂ fûng banɛ̂n BeIsrayɛl, ko a sɛ̀ ba ga kana rangas banama mo, ko a wok shom e ra Ɛlɛyazar na Itamar, a yâng ɛn,

¹⁷“Yaga sɛ́ de yin a ra ano ɛ? Yin a yâng re pyɛ̂ nɔrɔ̂ fûng banɛn e lalâ kwɔ̂n jɛrɛ wɛt a? Ya sé pyɛ de ya dal mwa na nejɛrɛ, ko Dagwi Darwey a ga nɔng in yɛ, na yin hala a BeIsrayɛl mɛ banɛn mɛn.

¹⁸Di, ba wɔ́ na nemî yas o e kwɔ̂n jɛrɛ wɛt. Yaga ano, yin a yâng re yɛ e lalâ kwɔn o, sede remo de ma ga kana nɔng in nu.”

¹⁹Ko Aharon a toyo a Mose, a yang ɛ, “A sé mwin de yunung nèy hom na ga nára nɔrɔ̂ fûng banɛn mɛn tanga nɔrɔ̂ yas burang mɛn vɔk na Dagwi Darwey, ko di, yére pyɛ̂ gawey yemo ye sɛsɛm me! Ka ma ga kana re namâ nɔrɔ̂ fûng banɛn yunung, ka a yâng sè e nuyel Dagwi Darwey pyɛ pɛngɛ a yɛ yey bɛ?”

²⁰Sede Mose a wok ano, ko yey mɛ ya dyɛng.