Read berom Bepiris 13 Bible Online

Bepiris 13 - berom bible

Bepiris 13

¹Dagwi Darwey a nɔ̂ng Mose na Aharon badu vemo ngan:

²Mwat de a vɔk e ra rehwô rebek mɛ, nedem pus kɛ gwonot kɛ bwatbwat, ko ya vɛ̌ tɛ́ ɛ vyes de yé tē dɔ, ko bē wɔ́ na mwat o na piris, yɛ kɛ hwak e ji nèy mɛ.

³Piris o ê masa dem de pyɛ mo ya nusu ɛ. Ka sede tôt dem o ha ga pɛngɛ, ko rām o ha ra ɛ̀ kas ɛ, ko a sé rɔ̂ hwô rebek ves, ko ê ha wɔgɔ, mwat o a ga tɛ́ ɛ ligis.

⁴Ko ka sede rām o ha pɛngɛ zɔng, ha kas ɛ wɛt, ko tôt dem o ha vɔk ɛ nepɛng wɛt, ko piris o ê kang mwat o nepɔlɔ netaama.

⁵A rɔda to masa hɛ e tuk hê taama mo, ko ka sede e di mɛ rām o ha sé tyɛng e dem o, ha ga gwɛ̌ hɛ wɛt, ko ê kang mwat o nepɔlɔ mo nehak netaama.

⁶A rɔda to gwɛ̌ masa hɛ e tuk hê taama mo, ko ka sede e di mɛ dem o ha râ sé, kɛ ha ga ye wàs, ha karak wɛt, ko ê ha wɔgɔ, mwat o a sé haalal; á sè e rām zɔng. Mwat o ê kus berugu mɛ, ko ê tɛ́ ɛ haalal.

⁷Ko ka sede rām o ha re nuyel na karak hɛ, e bama de piris a ga kana masa hɛ, ko a ga ye, a sé haalal, mwat o ê to dura to mɛ na yɛ.

⁸A rɔda to masa hɛ, ko ka sede ha ga karak, ko a sé e rɔ ves hê hwô rebek, ko ê ha a mwat o wɔgɔ, a sé ligis.

⁹Ka sede mwat hwak a kaba rɔ ves hê hwô rebek, ko bē wɔ́ na yɛ na piris,

¹⁰ko yɛ̀ ê masa hɛ. Ka sede a sɛ̀ dem o ha pu, ha pɛngɛ, ha ga tɛ̀ tot he pɛngɛ arɔng, dem o ha ga hwo tɛ̀ bweykanang,

¹¹ko ha sé rɔ ves de ha ga ros. A rɔda ha wɔgɔ, mwat o a sé ligis, ê kang ɛ wɛt, yaga ba ga tɔk tsɛng-tsɛng, a sé ligis.

¹²Ko ka sede rɔ̂ hwô rebek o ha ga karak hɛ, ha ga kyiri hɛ yi e rato wɔ̀ tà e bol,

¹³ko piris ê masa mwat o yɛɛlɛl. Ka sede ha ga kyiri rebek mɛ mwa, mwat o a ga tɛ́ ɛ haalal, ko piris o ê ha wɔgɔ, mwat o a sé haalal. Yaga hwô rebek o mwa ha ga pɛngɛ, ano a sé haalal.

¹⁴Ko ras de bweykanang wa nusu a mwat o, ko piris o ê to masa hɛ, ê ha wɔgɔ, mwat o a sé ligis. Bweykanang wa dura, a sé rɔ̂ hwô rebek ves.

¹⁵

¹⁶Ko jeng de bweykanang wa ga ye vit, hwó ha to tɛ́ ɛ pɛng, mwat o ê to wɔ́ na piris, womo de ê ha wɔgɔ, a sé haalal.

¹⁷

¹⁸Ka sede mwat hwak a vɔk gwonot de gwa ga vel,

¹⁹ko e bama mo dem pu mo ha tɛ́ ɛ pɛng, kɛ ha ragas ɛ nesinang tanga nepɛng, yɛ ê wɔ na piris,

²⁰womo de ê masa hɛ. Ka sede kwɔn o ha ra ɛ̀ kas ɛ, tôt dem o ha ga tɛ́ ɛ pɛng arɔng, ko piris o ê ha wɔgɔ, a sé ligis. A sé e rɔ hwô rebek ves de ha pɛrɛ yi e gwonot o.

²¹Ko ka sede a masa rɔ mo, a sɛ̀ tôt dem o ha ga tɛ́ ɛ pɛng wɛt, ko dem o ha ra ɛ̀ kas ɛ wɛt, ko ha ga pɛngɛ, ko ê kang ɛ nepɔlɔ netaama.

²²Sede kwɔn o ha karak hɛ, ko ê ha wɔgɔ, mwat o a sé ligis; a sé e rɔ̂ hwô rebek ves.

²³Ko ka dem o ha sé tyɛng e dem o, ha karak hɛ wɛt, a sé e rebisîk gwonot zɔng, ko piris o ê ha wɔgɔ, mwat o a sé haalal.

²⁴Ka sede kya ha rangas mwat hwak, ko râm dem o ha tɛ́ ɛ pɛng, kɛ ha ragas ɛ nesinang na nepɛng,

²⁵ko piris ê masa hɛ. Ka sede tôt dem rām o ha ga tɛ́ ɛ pɛng, ha ga ra ɛ kas ɛ, ko a sé e rɔ̂ hwô rebek ves de ha pɛrɛ yi e râm kya mo, ko piris o ê ha wɔgɔ, mwat o a sé ligis.

²⁶Ko ka sede tôt dem o ha ga tɛ́ ɛ pɛng wɛt, ko dem o ha ra ɛ kas ɛ wɛt, ko ha ga pɛngɛ, ko ê kang ɛ nepɔlɔ netaama.

²⁷A rɔda to masa hɛ e tuk hê taama mo. Ka sede rām o ha sé karak hɛ, ko a sé rɔ̂ hwô rebek ves, ko ê ha wɔgɔ, mwat o a sé ligis.

²⁸Ko ka sede dem rām o ha sé tyɛng e dem o, ha karak hɛ wɛt, ha ga pɛngɛ, ko a sé rɔ̂ hwô rebek ves o wɛt, a sé e rebisîk râm kya mo zɔng, ko piris o ê ha wɔgɔ, mwat o a sé haalal.

²⁹Sede rwas kɛ hwā a vɔk rām e rato kɛ e tô negyɛk,

³⁰ko piris ê masa rām o. Ka ha ra ɛ kas ɛ, ko tôt dem o ha ragas ɛ nesinang, ha sé laslas, ko a sé e rɔ̂ hwô rebek ves o. Piris o ê ha wɔgɔ, mwat o a sé ligis.

³¹Jeng de ê masa hɛ, ko ka rām o ha ra ɛ kas ɛ wɛt, ko mwa ano, tôt dem o ha siri wɛt, ko piris o ê kang ɛ nepɔlɔ netaama.

³²A rɔda to masa hɛ e tuk hê taama mo. Ka sede e di mɛ rām o ha sé tyɛng e dem o, ha ga karak hɛ wɛt, vit a tot de ha ragas ɛ nesinang, ha ra ɛ kas ɛ wɛt,

³³ko mwat o a hwon to mɛ, ko a tik dem rām o. Piris o ê kang ɛ nepɔlɔ mo nehak netaama.

³⁴E tuk hê taama mo, ê to masa rām o, ko ka sede e di mɛ rām o ha ga karak hɛ wɛt, ha ra ɛ kas ɛ arɔng wɛt, ko ê ha wɔgɔ, mwat o a sé haalal. Mwat o ê kus berugu mɛ, ko ê sè haalal.

³⁵Ko ka sede rām o ha re nuyel na karak, e bama de ba ga ha wɔgɔ, a sé haalal,

³⁶ko piris o ê to masa hɛ yɛɛlɛl. Ka sede rām o ha ga karak hɛ, ko a ka to jāma dî tot de ha ragas ɛ nesinang e ngyen wɛt; ba ga tɔk tsɛng-tsɛng mwat o a sé ligis.

³⁷Ko ka sede e dî piris o rām o ha ga karak hɛ wɛt, tôt dem o gyat, he ras, dem o ha ga ye vit, ko ê ha wɔgɔ, mwat o a sé haalal.

³⁸Ka sede rwas kɛ hwā a vɔk nebwat-bwat de na ragas ɛ nepɛng ne hwô rebek,

³⁹ko piris ê masa mwat o. Sede nebwat-bwat o na sé ninde na ragas ɛ nepururu, ko a sé e vît rebek zɔng; mwat o a sé haalal.

⁴⁰Ka sede tôt mwat hwak ha rɛng ɛ e pɛt, hemo hê tɛ̀ mwat o a sè ligis wɛt.

⁴¹

⁴²Ko ka sede repɔf o ra vɔk ɛ rām de ha ragas ɛ nesinang na nepɛng, ko a sé e rɔ̂ hwô rebek ves,

⁴³ko piris o ê masa hɛ. Ka rām o ha vɔk ɛ nesinang na nepɛng,

⁴⁴ko ê ha wɔgɔ, mwat o a sé ligis. Rɔ̂ hwô rebek de ha sé e rato mɛ ha sé ves o.

⁴⁵Mwa mwat de ba sɛ̀ ɛ na rɔ̂ hwô rebek ves, ê tɛ̀ cɛk rugu, ko ê hǎl to mɛ wɛt, ê bang rwa bayis mɛ wɔ̀ gyirik, ko ê mok, a tē, “Wo ligis, wo ligis!”

⁴⁶Mwat o ê nàra ligis mwa jeng de a vɔk rɔ mo, ko ê kyè a wɔ̀ sangal nju mɛ e jey na kwɔ̂n yê ngyɔk.

⁴⁷Ka sede ba sɛ̀ vúngu e ra rugu, kɛ gwo wuulu kɛ linen, kɛ e ra bahwo de ba rugut, kɛ e ra pyɛ́ de ba tolo na bahwo, ko vungu mo ha vɔk ɛ būm gwim-gwim de ha ragas ɛ nemang-mang kɛ nezwey, bê jut a sé yerê vungu de he vey na wey.[1] Tik na be wɔ́ na pyɛ mo na piris.

⁴⁸

⁴⁹

⁵⁰A rɔda masa pyɛ mo, ko a tik yɛ detu nepɔlɔ netaama.

⁵¹A rɔda to masa yɛ e tuk hê taama mo, ko ka sede vungu mo ha ga karak hɛ, ko a sé mwin, vungu mo ha sé yerê hê véy na wey. Pyɛ mo ya sé ligis.

⁵²A rɔda rangas yɛ, yaga a sé vungu hê té lap, de gbing-gbing be rangas na kya.

⁵³Ko ka sede piris o a di vungu mo ha ga karak hɛ e ra pyɛ mo wɛt,

⁵⁴ko ê nɔng nu, be kus yɛ, ê to tik yɛ detu nepɔlɔ mo nehak netaama.

⁵⁵E bama mo, ê masa pyɛ mo, ko ka sede vungu mo ha ga sege būm wɛt, ko pyɛ mo ya sé ligis, mwa ano de ha ga karak hɛ wɛt. Bē rangas yɛ, kɛ vungu mo ha sé hê ji mo kɛ hê bamâ pyɛ mo ow.

⁵⁶Ko ka sede piris o a di, vungu mo ha ga vuru hɛ, ko ê hamta yɛnɛ̂ kwɔn de vungu mo há sè e ra rugu mo, kɛ rehwo mo.

⁵⁷Ka sede, e bama mo, ha to nusu e bwang pyɛ́ mo, ha to sé karak hɛ, ko bē rangas yɛ.

⁵⁸Ko ka sede ba ga kana kus pyɛ de ya vungu, ko vungu mo ha ga vuru hɛ, bē to kus yɛ; ano pyɛ mo yê sè haalal.

⁵⁹Di, badu vemo e ra vungu hê rugu, kɛ gwo wuulu kɛ linen ayi, kɛ hê pyɛ́ de ba yong na rehwo. Gwong a gwomo de bê sɛlɛ hin, na yin a tɔk gas e tê pyɛ́ de ya sé ligis na yemo de ya sé haalal.