Read berom Bepiris 14 Bible Online

Bepiris 14 - berom bible

Bepiris 14

¹Dagwi Darwey a nɔ̂ng Mose badu vemo e ra gwông tɛ̂ mwat de a kana vɔk rɔ̂ hwô rebek hak ves o haalal: E tuk de bê ha wɔgɔ, mwat o a sé haalal, bê wɔ na yɛ na piris,

³womo de ê nusu na yɛ e jey yi e kwɔ̂n ye ngyɔk, na a masa hɛ. Ka sede mwat o a ga tɛ̀ tyang,

⁴ko piris o ê nɔng nu, bē vey na benon beba de ba sé kyiri wɛt, na cɛk cɔgɔt sida, na shwey de ha sé zwey, tanga kelang hísɔ̀p.

⁵A rɔda nɔng nu, be yɛrɛ gwining e ji benon o e ra repey de ra vɔk ɛ nshî lwel.

⁶E bama mo, ê to jut gwonon o gworo, ko a gyira gwɛ mwa na cɛk cɔgɔt sida, na shwey o, tanga kelang hísɔ̀p o e ji nemî gwonon de ba ga yɛrɛ.

⁷A rɔda zagat nemi mo zang taama e ra mwat de a ga tɛ̀ tyang o, ko a ye, a sé haalal. Ano arɔng, ê hala gwonon gwokwen o gwo kyè vɔk e hey.

⁸Mwat o ê kus berugu mɛ, a hwon mwa tot mɛ, a kus ɛ, ko ê tɛ́ ɛ haalal. A remo ê tɔk toyo e kwɔ̂n ye ngyɔk, ko ê yel e buk mɛ wɛt, sɛ̌ bamâ pɔlɔ taama.

⁹E tuk hê taama mo, ê to wula to mɛ, a hwon negyɛk mɛ, na tôt bagyîng bayis mɛ, tanga mwa tôt rebek mɛ; ê kus berugu mɛ, ko a kus ɛ. Ano de ê tɛ́ ɛ haalal.

¹⁰E tuk hê rwit, mwat o ê wɔ na bebôt beturuk beba tanga shep vyel ye shey hining de vit a yɛ na rām kɛ pyɛ cak vyes, ê vɔk ɛ nemuk alkama nerat neshǐ masa netat de ba ga suk nɛ na něy pwat, tanga něy pwat sede rebit shǐ masa.

¹¹Piris ê kyè na mwat o na mwa pyɛ́ mo wɔ e rwi bûk sangâl Dagwi.

¹²A rɔda jut gwining e ji bebôt beturuk o tanga něy pwat de na sé sede rebit shǐ masa, a nára yɛ nɔrɔ̂ yông burû gawey, ko ê ra mɛ, sede ba sé nára a Dagwi Darwey nɔrɔ̂ yɛ̄.

¹³A rɔda yɛrɛ bwôt turuk o e nuyêl bûk sangâl Dagwi e kwɔn de be yɛt ɛ yas yaga nɔrɔ̂ fûng banɛn na nɔrɔ̂ yas burang. Yaga nɔrɔ̂ yông burû gawey ha sé hê piris tyɛng na nɔrɔ̂ fûng banɛn. A sé pyɛ de ya dal na nejɛrɛ.

¹⁴Piris o ê vɛ nemi mo, ko a tɛ̀ a mwat de be kyè wɔ tɛ̀ ɛ haalal o nɛ e kwɔ̂ng fwông vwɔ yege mɛ, na e ra kwɛn vwɔ mɛ rwey gwo yege, tanga e ra kwɛn bwol mɛ rwey gwo yege arɔng.

¹⁵Ano kwong, ê vɛ něy pwat o, a shushu nɛ e tas vwɔ mwɛlɛng mɛ.

¹⁶A rɔda gyira kwɛn vwɔ yege mɛ e ji nɛ, ko a zagat nɛ zang taama e nuyêl bûk sangâl Dagwi.

¹⁷A rɔda to tɛ̀ a mwat de be kyè wɔ̀ tɛ̀ ɛ haalal bwang něy de na sé e tas vwɔ mɛ na nemî turuk o e kwɔ̂ng fwông vwɔ yege mɛ, na e ra kwɛn vwɔ mɛ rwey gwo yege, tanga e ra kwɛn bwol mɛ rwey gwo yege arɔng.

¹⁸Bwang něy de na tɛt ɛ e tas vwɔ mɛ mo ê shushu a mwat o nɛ e rato. Gwong a gwomo de ê ra na a yong ɛ̀ pyɛ de ya kana sé e tê mwat o na Dagwi Darwey.

¹⁹E bama mo, piris o ê nára shep vyel ye nɔrɔ̂ fûng banɛn. Ano de ê to ra fwôm pat ɛ yi e sangal ligis. Ko ê yɛrɛ turuk wo neba mo de wa sé yaga nɔrɔ̂ yas burang.

²⁰A rɔda nára wɛ, tanga nɔrɔ̂ nemuk e ra gàgbang rangas o. Ko yɛnɛ̂ râ fwôm tɛ́sɛ hɛn haalal a hemo. Ano de mwat o ê tɛ́ ɛ haalal.

²¹Ka sede mwat o a sé pwɛng, a tɔk sɛ̀ pyɛ́ yemo wɛt, yɛ ê wɔ na bwôt turuk gwining zɔng yaga nɔrɔ̂ yông burû gawey, bê ra mɛ sede ba sé nára a Dagwi Darwey nɔrɔ̂ wɛ. A rɔda vɔk ɛ nemuk nerat neshǐ masa neba zɔng, de ba ga suk nɛ na něy pwat, tanga něy pwat sede rebit shǐ masa arɔng.

²²A rɔda to vɔk ɛ bewǔtut beba kɛ bebɔp beba ayi, gwining yaga nɔrɔ de be nára yaga halâ banɛn, ko gwining o arɔng yaga nɔrɔ burang.

²³E tuk hê rwit ê wɔ́ a piris o na pyɛ́ mo e nuyêl bûk sangâl Dagwi yaga fwôm tɛ́ ɛ mɛ haalal.

²⁴Piris o ê jut bwôt turuk o, na něy pwat o, ko a ra mɛ, sede ba sé nára a Dagwi Darwey nɔrɔ̂ yɛ.

²⁵A rɔda yɛrɛ bwôt turuk o, a vɛ nemi mo, ko a tɛ̀ a mwat de be kyè wɔ̀ tɛ̀ ɛ haalal nɛ e kwɔ̂ng fwông vwɔ yege mɛ, na e ra kwɛn vwɔ mɛ rwey gwo yege, tanga e ra kwɛn bwol mɛ rwey gwo yege arɔng.

²⁶Ano arɔng, piris o ê vɛ něy pwat o, a shushu nɛ e tas vwɔ mwɛlɛng mɛ.

²⁷A rɔda gyira kwɛn vwɔ yege mɛ e ji nɛ, ko a zagat nɛ zang taama e nuyêl bûk sangâl Dagwi.

²⁸A rɔda to tɛ̀ a mwat de be kyè wɔ̀ tɛ̀ ɛ haalal bwang něy de na sé e tas vwɔ mɛ na nemî turuk o e kwɔ̂ng fwông vwɔ yege mɛ, na e ra kwɛn vwɔ mɛ rwey gwo yege, tanga e ra kwɛn bwol mɛ rwey gwo yege arɔng.

²⁹Bwang něy de na tɛt ɛ e tas vwɔ mɛ ê shushu a mwat o nɛ e rato. Gwong a gwomo de ê ra, na a yong ɛ̀ pyɛ de yá kana sè e tê mwat o na Dagwi Darwey.

³⁰Ko ê nára nɔrɔ̂ gwining e ji bewǔtut kɛ bebɔp,

³¹yaga nɔrɔ̂ fûng banɛn, ê to nára gwining o yaga nɔrɔ burang de ba wuna na nɔrɔ̂ nemuk arɔng. Gwong a gwomo de piris ê ra fwôm tɛ́ ɛ mɛ haalal.

³²Di, redu remo ra sé yaga mwat de a vɔk rɔ̂ hwô rebek ves, womo de a sɛ̀ yerê pyɛ́ de be simo yaga narâ nɔrɔ mo wɛt.

³³Dagwi Darwey a ha a Mose na Aharon a ye:

³⁴Jeng de yin a yel e ji vwêl Kanaan de me kyè wɔ̀ nɔng in, na he sè min, ko mê tɛ̀ lɔ hak he kaba mbùl.

³⁵Tik na dalɔ mo a wɔ̀ ha a piris wɔgɔ, pyɛ cak sede mbùl ya ga kaba lɔ mɛ.

³⁶Piris o ê nɔng nu, be paa pyɛ́ mwa de ya sé e ji lɔ mo, gyam na a de kyè wɔ̀ masa pyɛ mo. Ka ano wɛt, ka bê ye, pyɛ́ mo mwa ya sé ligis. Ano, piris o ê wɔ,

³⁷ko ê masa kwɔn o. Ka sede a di e vwarâ duk o kwɔn de ha ragas ɛ negwim-gwim kɛ nesinang, ko ha ga re vwara mo,

³⁸ê nusu yi e lɔ mo, ko a bang hɛ na makwili pɔlɔ taama.

³⁹E tuk hê taama, ê to wɔ̀ masa hɛ. Ka sede a sɛ̀ mbùl o na ga karak,

⁴⁰ko ê nɔng nu, bē paa beta de ba vɔk mbùl o, bē wɔ̀ barak vɛ e kwɔ̂n ligis e mâ repomo.

⁴¹Ko ê tɛ̀, be kara hê varâ duk ji mo mwa, ko bē wɔ̀ losho e kwɔ̂n ligis o.

⁴²Ko bē vey na beta mo behak, bē lɔk mɛ e tô vere de ba ga kana paa, ko bē to lolom varâ duk o.

⁴³Ka sede mbùl o na to tulu gbak e lɔ mo, e bama de ba ga kana paa beta mo, ko ba ga to lolom hɛ,

⁴⁴ko piris o ê to wɔ̀ masa hɛ. Ka sede nà ga karak, ko hemo ha dura, a sé yerê mbùl de ne vey na wey, ko lɔ mo ha sé ligis.

⁴⁵Gbing-gbing be gangas hɛ, bē hashe beta mo, na cɔ́gɔt o, na mwa sebwos lolom o, bē wɔ̀ losho mwa e kwɔn ligis.

⁴⁶Kawɛ mwat de a yel e ji lɔ mo, e jeng de ha sé e banga, ê tɛ́ ɛ ligis vɔk e nawiri.

⁴⁷Ano arɔng, kawɛ mwat de a dyɛng ɛ, kɛ a re ɛ pyɛ́ e ji hɛ, ko ê kus berugu mɛ.

⁴⁸Ko ka sede piris o a wɔ̀ masa hɛ, ko a di mbùl o na ga to tulu wɛt, e bama de ba ga to lolom varâ duk ji mo, ko ê ha wɔgɔ, lɔ mo ha sé haalal, yaga mbùl o na ga tala hɛ.

⁴⁹Yaga tɛ̂ lɔ mo haalal, ê jut benon beba, na cɛk cɔgɔt sida, na shwey de ha sé zwey, tanga kelang hísɔ̀p.

⁵⁰A rɔda yɛrɛ gwonon o gwining e ra repey de ra vɔk ɛ nshî lwel.

⁵¹E bama mo, ê jut cɛk cɔgɔt sida, na kelang hísɔ̀p, na shwey sinang o tanga gwonon gwining o, ko a gyira yɛ̄ e ji nemi de na ga kyɛrɛ hɛn na nshî lwel, ko ê zagat nemi mo e lɔ mo zang taama.

⁵²Gwong a gwomo de ê ra fwom na nemî gwonon o, na nshî lwel, na gwonon gwokwen o, na cɔgɔt sida, na kelang hísɔ̀p, tanga shwey sinang o na a tɛ̀ mɛ lɔ mo haalal.

⁵³E bama de a ga ra ano, ko ê hala gwonon gwokwen o gwo kyè vɔk e hey. Gwong a gwomo de ê ra fwôm tɛ̂ lɔ mo haalal.

⁵⁴Badu ma vemo de ba sé yaga nerɔ hwô rebek neves,

⁵⁵na nedem pus, kɛ benot, kɛ nebwat-bwat; ba to sé yaga yerê vungu na mbùl de be vey na wey e ra berugu na nelɔ arɔng.

⁵⁶

⁵⁷Badu vemo bê sɛlɛ hin, na yin a tɔk gas e tê mwat de a sé ligis, na womo de a sé haalal, na yin a to gas e tê pyɛ de ya sé ligis na yinde ya sé haalal arɔng.