Read berom Bepiris 15 Bible Online

Bepiris 15 - berom bible

Bepiris 15

¹Dagwi Darwey a ha a Mose na Aharon a yang ɛn,

²yɛn a ha a BeIsrayɛl badu vemo ngan: Kawɛ mwat de rɔ ha ga kaba pyɛ́ mɛ, ko ye yis na nshi rishish, ko nshi rishish o na sé ligis.

³Kɛ nshi mo na rɔɔ yis kɛ na ga ye gying ayi, ko mwat o ê nàra ligis.

⁴Yaga ano, kagwɛ gwat de e dyɛngɛs ɛ, na kayɛ pyɛ de e sangsal ɛ yê sè ligis.

⁵Ko kawɛ mwat de ê ra gwat o, kɛ ê sangal e ra kayɛ pyɛ de mwat o a ga sangal ɛ, ko mwat o ê kus berugu mɛ, a kus ɛ, ko ê nàra ligis vɔk e nawiri.

⁷Ko kawɛ mwat de a ra rebêk mwât rɔ mo, ê kus berugu mɛ, a kus ɛ, ko ê nára ligis vɔk e nawiri.

⁸Ko ka sede mwat de pyɛ́ mɛ ye yis na nshi rishish o a tulus betey e ra mwat hwak de a sé haalal, ko mwat o ê kus berugu mɛ, a kus ɛ, ko ê nára ligis vɔk e nawiri.

⁹Kayɛ pyɛ de be laga kɛ kwɔ̂n sangal de mwât rɔ mo a sangal ɛ, ya ga tɛ́ ɛ ligis.

¹⁰Ko kawɛ mwat de a ra pyɛ cak e ji pyɛ́ de mwat o a ga sangal ɛ, ê nára ligis vɔk e nawiri. Kawɛ mwat de a jut pyɛ cak de mwat o a ga sangal ɛ, ko ê kus berugu mɛ, a kus ɛ, ko ê nàra ligis vɔk e nawiri.

¹¹Ka sede mwât rɔ mo a ra mwat hwak na vɔ mɛ sana kus, ko mwat de a ra ɛ mo ê kus berugu mɛ, a kus ɛ, ko ê nára ligis vɔk e nawiri.

¹²Bē mɔrɔ kahɛ rwêy secwem de mwât rɔ mo a ra hɛ, ko kayɛ pyɛ de ba tsep na cɔ́gɔt, be kus yɛ.

¹³E bama de mwat de pyɛ́ mɛ ye yis na nshi rishish a ga tɛ̀ tyang, ko ê gyeng nepɔlɔ netaama, na a de kus berugu mɛ, a kus ɛ na nshî lwel, ko ê tɛ́ ɛ haalal.

¹⁴E tuk hê rwit, mwat o ê wɔ na bewǔtut beba kɛ bebɔp beba e nuyêl bûk sangâl Dagwi, ko a nɔ̂ng piris vɛ.

¹⁵Piris o ê nára gwining yaga nɔrɔ̂ fûng banɛn, ko gwohwak yaga nɔrɔ̂ burang. Gwong a gwomo de piris o ê ra, na a tɛ̀ mɛ mwat o haalal.

¹⁶Ka sede nshî jwat na yi e pyɛ̂ mwat o mòol zɔng, ko a kus rebek mɛ mwa, ko ê nàra ligis vɔk e nawiri.

¹⁷Bē kus kagwɛ gworugu na karɛ rehwo de nshi mo na ra, ko yê nàra ligis vɔk e nawiri.

¹⁸E bama de mwat a ga man bek na hwā, ko mwa hɛn bē kus ɛn, ko bê nàra ligis vɔk e nawiri.

¹⁹Jeng berang hwā, hwā mo ê nàra ligis nepɔlɔ netaama. Ko kawɛ de a ra rebek mɛ ê tɛ́ ɛ ligis arɔng vɔk e nawiri.

²⁰Kagwɛ gwat de e dyɛngɛs ɛ na kayɛ pyɛ de e sangsal ɛ e jeng berang mɛ yê tɛ́ ɛ ligis.

²¹Kawɛ mwat de a ra gwat mɛ, kɛ kayɛ pyɛ de a ga sangal ɛ, kɛ pyɛ́ de ya sé e ra rak nekwɔn o, ê kus berugu mɛ, a kus ɛ, ko ê nàra ligis vɔk e nawiri.

²⁴Ko ka sede mwat hwak a man bek na hwā, ko jeng berang mɛ ye pere hwo, a ga tɛ́ ɛ ligis tyɛng sede hwā mo, ko ê nàra ligis nepɔlɔ netaama. Kagwɛ gwat de ê dyɛng ɛ gwô tɛ́ ɛ ligis arɔng.

²⁵Ka sede berang o ba yi kpɛɛ kɛ ba re nuyel, ba kwey jeng o, ko ê sè ligis vɔk e jeng de ba yɛnɛ hɛ, tyɛng sede e jeng bɛrɛng berang mɛ.

²⁶Kagwɛ gwat de e dyɛngɛs ɛ, na kayɛ pyɛ de e sangsal ɛ e jeng o, yê sè ligis.

²⁷Kawɛ mwat de a ra pyɛ́ mo, ê kus berugu mɛ, a kus ɛ, ko ê nàra ligis vɔk e nawiri.

²⁸E bama de berang o ba ga tumal, ê gyeng nepɔlɔ netaama, na a de tɛ́ ɛ haalal.

²⁹E tuk hê rwit o, ê jut bewǔtut beba kɛ bebɔp beba, a wɔ́ mɛ na piris e nuyêl bûk sangâl Dagwi.

³⁰Piris o ê nára gwining yaga nɔrɔ̂ fûng banɛn, ko gwohwak yaga nɔrɔ burang. Gwong a gwomo de piris o ê ra, na a tɛ̀ mɛ hwā mo haalal.

³¹E yɛnɛ mo, Dagwi Darwey a ha na Mose tanga Aharon a ye, ha in a BeIsrayɛl gakgak, bē tē naka na rehâ tɛ́ ɛn ligis. Yaga jeng de bê vey e bûk sangal hom de gwa sé e tê kwɔ̂n ye ngyɔk mɛn, ka sede ba sé ligis, ko bê dal wɛt.

³²Badu ma vemo e ra mwat de pyɛ́ mɛ ye nunus na nshi rishish kɛ mwat de nshî jwat mɛ ne nusu mòol zɔng,

³³na hwā e jeng berang mɛ, kɛ mwat de a man bek na hwā e jeng de a sé ligis.