Read berom Bepiris 16 Bible Online

Bepiris 16 - berom bible

Bepiris 16

¹E bamâ rekû nèy Aharon nemo de na mɔrɔ jeng de na nára nɔrɔ vɔk na Dagwi Darwey na kya de ha sé e ji redu wɛt,

²Dagwi Darwey a yâng Mose ngan: “Há a gwà mō Aharon, a yeles e Kwɔn Jɛrɛ Hê Jɛrɛ de ba gas hɛ na gworugû dul e jeng de ba tik ɛ̀ zɔng. Ka sede a làl, ko ê dal wɛt, yaga e kwɔn o de mê dura to hom e ji rele e ra pyɛ bang ye dyam shinang de ya sé e ra Kundung Wuna-na-Sira.

³“Gyam na Aharon a yel e Kwɔn Jɛrɛ Hê Jɛrɛ, a vey na bwot mus yaga nɔrɔ̂ fûng banɛn tanga turuk yaga nɔrɔ̂ yas burang.

⁴A rɔda kus ɛ, ko a tɛ̀ berugû fwôm piris, vɛ a pyɛ̂ linen: gworugû ji mo gwolwis o, na tacuru byit, na gyindi, tanga torô kpin.

⁵A rɔda sey begam beba yaga nɔrɔ̂ fûng banɛn tanga turuk yaga nɔrɔ̂ yas burang yi na regyɛng BeIsrayɛl mwa.

⁶“Aharon ê nára bwôt mus o yaga nɔrɔ̂ fûng banɛn bemɛ na vê belɔ mɛ.

⁷E bama mo, ê jut begam beba mo wɔ e rwi bûk sangâl Dagwi Darwey.

⁸A rɔda tɛ̀, be ra begbɛrɛng e ra begam o, na be pat ɛ gwining de wô sè wo Dagwi Darwey, ko gwining de wô sè yaga Azazel.

⁹A rɔda jut womo de kasa ha gaba e ra wɛ yaga Dagwi, ko a nára wɛ nɔrɔ̂ halâ banɛn vê BeIsrayɛl.

¹⁰Ko gam de kasa ha gaba e ra wɛ yaga Azazel, bê nára wɛ e nuyêl Dagwi Darwey kwen, bê gang a wɛ banɛ̂n BeIsrayɛl, na a sè pyɛ talâ-nɛn mɛn, ko be ro wɛ wo kyè vɔk e hey vɔk na Azazel.

¹¹“Gwong a gwomo de Aharon ê ra na nenɔrɔ nemo mo: A rɔda tanga vey na bwot mus yaga talâ-nɛn mɛ na vê belɔ mɛ. A rɔda yɛrɛ wɛ,

¹²a jut repey, a sila rɛ na cila kya yê gàgbang rangas yas, a vɛ pyɛ̂ nesang hyɔɔlɔl de ba ga hwongo e vwɔ pyak zang ba, a wɔ́ mɛ mwa e ji Kwɔn Jɛrɛ Hê Jɛrɛ.

¹³A rɔda rangas pyɛ̂ nesang hyɔɔlɔl o e nuyêl Dagwi Darwey, yaga na sekyeng o se mugus, se kyiri pyɛ bâng Kundung Wuna-na-Sira. Ano Aharon ê tɔk di pyɛ bang o wɛt, ko ê ku wɛt.

¹⁴A rɔda wɔ̀ vɛ nemî mus o, a gyira ɛ kwen vwɔ mɛ, ko a zagta zang hining e ra pyɛ bang o e bak nuyel mɛ, a to zagat nɛ̀ zang taama e retîn kundung o.

¹⁵“E bama mo, ê yɛrɛ gam de wa sé yaga halâ banɛ̂n BeIsrayɛl, ko a wɔ́ na nemi mo e Kwɔn Jɛrɛ Hê Jɛrɛ, a zagat nɛ̀ e ra pyɛ bâng Kundung Wuna-na-Sira na e retîn kundung o arɔng, sede remo de a ga kana ra na nemî mus.

¹⁶Gwong a gwomo de ê tɛ̀ Kwɔn Jɛrɛ Hê Jɛrɛ de ha ga tɛ́ ɛ ligis yi na banɛ̂n BeIsrayɛl haalal. E bama mo, ê tɛ̀ mwa buk o haalal, yaga gwa sé e tê kwɔ̂n ye ngyɔk BeIsrayɛl de ha sé ligis yaga banɛn mɛn.

¹⁷Be simo na mwat hwak a se e ji buk o wɛt, jeng de Aharon ê yel e Kwɔn Jɛrɛ Hê Jɛrɛ, na a ra fwôm talâ-nɛn, sɛ̌ a nusu e ngyen. Jeng de a ga yɛnɛ fwôm talâ-nɛn o yaga yɛ na belɔ mɛ, tanga BeIsrayɛl mwa,

¹⁸ê kyè wɔ̄ e gàgbang rangâs yas de wa sé e nuyêl buk o, na a tɛ̀ wɛ haalal. A rɔda vɛ nemî mus na nɛ̀ gam o, ko a tɛ̀ nɛ e ra pyɛ́ de ya sé sede badúk e bakwɔng banaas vê kwɔn o.

¹⁹A rɔda zagat nemi mo e ra rak gàgbang rangas o na kwen vwɔ mɛ zang taama. Gwong a gwomo de ê tɛ̀ mɛ gàgbang rangas o haalal yi e banɛ̂n BeIsrayɛl.

²⁰“E jeng de Aharon a ga yɛnɛ fwôm tɛ̂ Kwɔn Jɛrɛ Hê Jɛrɛ na nejɛrɛ, na buk o, na gàgbang rangâs yas o haalal, ko ê vey na gam kwen wane mo.

²¹A rɔda tɛ̀ vɔ mɛ mwa ba e ra tô wɛ, a kulu mwa pyɛ́ vyes, na negbarak, na banɛn de BeIsrayɛl ba ga ra e ra wɛ, ano de bê gang a gam o vɛ. Ano, mwat de a ga kana yong ɛ ê ro wɛ vɔk e hey.

²²Gam o wô jut mwa pyɛ́ vyes mɛn o vɔk e bak vwel de wa sé hal.

²³“Aharon kwong ê wɔ̀ yel e buk o, a pat berugû linen de a ga tɛ̀, gyam na a yel e ji Kwɔn Jɛrɛ Hê Jɛrɛ, ko a tik vɛ e hwomo.

²⁴A rɔda kus ɛ e kwɔn jɛrɛ, ko a tɛ̀ berugû fwom mɛ de a ga tɔ́k ɛ mɛ. Ano, ê nusu a wɔ̀ nára beturuk beba nɔrɔ burang, yaga talâ-nɛn mɛ na vê BeIsrayɛl.

²⁵Ko ê rangas sebwêp yas de ya sé yaga nenɔrɔ̂ fûng banɛn e ra kwɔn rangas o arɔng.

²⁶“Ko yɛ mwat de a ga ro gam wo Azazel vɔk e hey ê kus berugu mɛ, a kus ɛ, gyam na a toyo e kwɔ̂n ye ngyɔk.

²⁷Bê wɔ na bwang pyɛ́ de ya tɛt ɛ e mus o na gam o, de ba ga wɔ na nemi mo e ji Kwɔn Jɛrɛ Hê Jɛrɛ yaga tɛ̂ hɛ haalal, e bamâ kwɔ̂n ye ngyɔk; bê rangas bahwo mo, na banama mo, na mwa pyɛ̂ ji mo.

²⁸Mwat winde a rangas o ê kus berugu mɛ, a kus ɛ, gyam na a toyo e kwɔ̂n ye ngyɔk.

²⁹“Yin ê gyeng badu vemo nesheneshey: E pwɛl gwô netaama na pɔlɔ kuru, yin ê tik rê pyɛ́, yin ê ra fwom hwak wɛt, kɛ hwey vwel o kɛ yere dyuk de a sé sangal e ji min.

³⁰Tuk hane, bê ra talâ-nɛn min, bê tɛ̀ in haalal yi e banɛn min mwa, ko yin ê to tɔk vey na Dagwi.

³¹Hê sè a yin tûk zɛtzɛt, yin ê ra fwom hwak ko tyɔng wɛt, ko yin ê tik rê pyɛ́ arɔng. Yin ê gyeng badu vemo nesheneshey.

³²“Ano kwong, darwêy piris de ba ga shushu na něy, ba ga tik ɛ jaram, na a jut fwôm da mɛ, ê ra fwôm talâ-nɛn. A rɔda tɛ̀ berugû linen de ba tik jaram yaga fwom o,

³³ko ê tɛ̀ Kwɔn Jɛrɛ Hê Jɛrɛ, na bwang buk o, na gàgbang rangâs yas o haalal, ko ê ra talâ-nɛ̂n bepiris tanga BeIsrayɛl mwa.

³⁴Bê ra ano kahɛ shey zang hining nesheneshey, na be tala mwa banɛ̂n BeIsrayɛl de ba ga kana kyě ragas.” Ano de Aharon a ra tyɛng sede remo de Dagwi Darwey a ga kana nɔng nu.