Read berom Bepiris 17 Bible Online

Bepiris 17 - berom bible

Bepiris 17

¹Dagwi Darwey a ha a Mose, a ha a Aharon na nèy mɛ tanga regyɛng BeIsrayɛl mwa badu vemo ngan:

³Ka sede hwak e ji BeIsrayɛl a simo yɛrɛ rɔndɔng, kɛ vyel pyɛng kɛ shi yaga re, a yɛrɛ yɛ e kwɔ̂n ye ngyɔk kɛ e majêy kwɔ̂n ye ngyɔk wɛt,

⁴ko a wɔ́ mɛ e nuyel bûk sangâl Dagwi, na a nára nɔrɔ̂ yɛ. Yɛ de a yɛrɛ e kwɔn hak a ga ra renɛn sede hê shushu nemi mwat. A ga row neken mɛ, bê ro ɛ yi e ji bemat mɛ.

⁵Nɔ̂ng nu hemo ha sé yaga na BeIsrayɛl be vɛ̀sɛ a Dagwi Darwey na nenɔrɔ de ba kana kyě yɛt e hey kpɛɛ. Bē vɛ̀sɛ a piris mɛ e nuyel bûk sangâl Dagwi, na be yɛt yɛ e hwomo, yaga nɔrɔ̂ wunâ nesa.

⁶Piris o ê waram nemi mo e ra bakwɔ̂ng gàgbang rangâs yas e nuyel bûk sangâl Dagwi, ê rangas ɛ sebwep o, ko nesang o ne pɛngɛ a Dagwi yey.

⁷BeIsrayɛl be to re nuyel na narâ nenɔrɔ mɛn vɔk na cī de ya sé sede begam wɛt. Yi ano yɛn a kyɛ́ ɛn Dagwi Darwey de a tɛ̀ yey na yɛn. Hemo ha sé redu hê nesheneshey.

⁸To gwɛ ha a yɛn gbāk wɔgɔ, ka sede WoIsrayɛl kɛ yere dyuk de a sé sangal e ji min a nára nɔrɔ̂ yas burang kɛ kahɛ nɔrɔ ayi,

⁹ko a wɔ́ mɛ e nuyel bûk sangâl Dagwi na a nára hɛ wɛt, a ga row neken mɛ, ko bê ro ɛ yi e ji bemat hom.

¹⁰Ka sede WoIsrayɛl hwak kɛ yere dyuk e ji min a re nemi, ko me pyɛ hom mê nɔng ɛ mā, a ga row neken, ko mê ro ɛ yi e ji bemat mɛ.

¹¹Yaga nekên kayɛ pyɛ cen na sé e ji nemi. Ma ga nɔng nu, be shushu mwa nemi e ra gàgbang rangâs yas yaga talâ-nɛn. Nemi nɛ a neken, yaga ano de be tala mɛ banɛ̂n mwat de a ga ye waa yaga banɛn mɛ.

¹²Yaga ano ma ga ha a yin BeIsrayɛl wɔgɔ, yin kɛ yere dyuk e ji min, yin a re nemi wɛt.

¹³Ka sede WoIsrayɛl hwak, kɛ yere dyuk e ji min a vo ngyama kɛ gwonon de ba sé ve re, a shushu nemi mo e vwel, ko a bang na fongol.

¹⁴Yaga neken kayɛ pyɛ cen na sé e ji nemi; ano de ma ga ha a yin, yin re nemi pyɛ cen cak ko tyɔng wɛt; mwat de a re, a ga row neken, ko bê ro ɛ yi e ji bemat mɛ.

¹⁵Ko kawɛ mwat, hwêy vwel kɛ yere dyuk de a re revîn pyɛ de ya ku, kɛ ngyama ya mɔrɔ yɛ, ko ê kus berugu mɛ, a kus ɛ, ko ê nàra ligis vɔk e nawiri.

¹⁶Ko ka sede a kus berugu mo na rebek mɛ wɛt, ê jut nedirîk gyili redu mo.