Read berom Bepiris 18 Bible Online

Bepiris 18 - berom bible

Bepiris 18

¹Dagwi Darwey a ha a Mose, a yang ɛ,

²a ha a BeIsrayɛl neha nemo ngan: E me wɛ a Dagwi Darwey, Dagwi min.

³Yin raa negwɔn sevwêl Misra wɛt, kwɔn de yin a kana sangal ɛ, kɛ ne yére sevwêl Kanaan, de ma sé kyè wɔ ɛ na yin.

⁴Gyeng in neha hom, ra in pyɛ́ de ma nɔng in nu. Me wɛ a Dagwi Darwey, Dagwi min.

⁵Mwat de e gyeng badu na neha de ma nɔng in, a raa vɛ, ko ê nàra kwen. E me wɛ à Dagwi Darwey!

⁶Hwak e ji min a dyɛng na hwā cang mɛ wɛt. E me wɛ a Dagwi Darwey.

⁷Hwo tɛ̀ a da mō rekyen yi na dyɛng na de mō wɛt. Yi ano, hwô tɛ̀ a dê tɔ mō rekyen.

⁸Hwo tɛ̀ a da mo rekyen yi na dyɛng na beha mɛ behak arɔng wɛt.

⁹Hwo dyɛng na gwà mō hwong o wɛt, kɛ ba tɔs in e lɔ hining kɛ e nelɔ detu ow. Hwo dyɛng na hwông sɔ mō kɛ hwông hwóng mō wɛt, hwô tɛ̀ a to mō rekyen.

¹²Hwo dyɛng na gwà da mō kɛ de mō hwā mo wɛt.

¹⁴Hwo dyɛng na hwâ gwà da mō wɛt, yaga yɛ a sé a hwo de arɔng.

¹⁵Hwo dyɛng na hwâ sɔ mo wɛt, yaga yɛ a sé gwel mo.

¹⁶Hwo dyɛng na shin mō wɛt. Hwô tɛ̀ a gwà mō rekyen.

¹⁷Hwo dyɛng na hwêy hwong hê hwā wɛt, sede hwà ga kana vɔk neng mɛ, kɛ na hwêy hwông sɔ mɛ, kɛ hwêy hwông hwóng mɛ, yaga yɛn a sé nemi mō. A sé kyiri.

¹⁸Gbak de hwā mō a sé na neken, hwo ra wenêng gwà mɛ, na a se e ji bepwi mɛ wɛt.

¹⁹Hwo dyɛng na hwā e jeng de a vɔk berang wɛt, yaga a sé ligis.

²⁰Hwo dyɛng na hwâ cang mō wɛt; hane hê tɛ̀ o ligis.

²¹Hwo nɔng hak e ji nèy mō na be nára yaga re a dagwi Molek fongol wɛt, yaga hê tɛ̀ be byɛs rezâ Dagwi mō. E me wɛ à Dagwi Darwey!

²²Hwo dyɛng na mumwo rwas, na hwo vɛ mɛ hwā wɛt; a sé pyɛ byɛm-byɛm.

²³Rwas kɛ hwā a kwon man bek na yas wɛt; ra ano hê tɛ̀ mwat a sè kís, ko a tɛ́ ɛ ligis.

²⁴Yin tɛ̀ bato min ligis yi na râ begwong vemo wɛt, sede remo de yére dyuk ya ragas, yemo de ma sé ro yi e nuyel min.

²⁵Tomong mɛn o ba tɛ̀ vwel o ha ga tɛ́ ɛ ligis, yaga ano, ma sé tabak hɛ̄, ko ha sé kyɛ́ ɛ bemât hɛ.

²⁶Ko yin, gyeng in badu hom na neha hom, kɛ hwà sé hwêy vwel o, kɛ yere dyuk de ya sé sangal e ji min. Yin ra pyɛ̂ byɛm-byɛm yemo wɛt,

²⁷sede yére de yá kana sè sangal e ji sevwel o ya ragas, ko vwel o ha vɛ̌ tɛ́ ɛ ligis.

²⁸Ka ano wɛt, ko vwel o hê kyɛ́ ɛ hin arɔng, sede remo de há kyɛ́ ɛ bemat de bá kana sangal ɛ gyam yin.

²⁹Kawɛ de a ra cak e ji pyɛ̂ byɛm-byɛm yemo, a ga row neken mɛ, ko bê ro ɛ yi e ji bemat hom.

³⁰Yaga ano, gyeng in pyɛ́ de ma nɔng in nu, yin masa negwɔn de ma kyɛ́ me zakzak ne bemat de ba kana sangal e kwɔn o gyam yin wɛt. Yin tɛ̀ bato min ligis na râ pyɛ cak e ji yemo mo wɛt. E me wɛ à Dagwi Darwey, Dagwi min!