Read berom Bepiris 19 Bible Online

Bepiris 19 - berom bible

Bepiris 19

¹Dagwi Darwey a yâng Mose, a ha a regyɛng BeIsrayɛl mwa neha nemo ngan: Tík in bato min jaram, na yin sè jɛrɛ, yaga me Dagwi Darwey, Dagwi min, ma sé jɛrɛ.

³Kawɛ min a nɔ̂ng neng mɛ na da mɛ nerey, ko yin gyeng Tuk Shábat arɔng. E me wɛ à Dagwi Darwey, Dagwi min.

⁴Yin wuba me na yin re a pyɛ̂ sekwit fongol wɛt, yin yong bedagwî dyam, na yin re a vɛ fongol arɔng wɛt. E me wɛ à Dagwi Darwey, Dagwi min.

⁵Ka sede yin a nára nɔrɔ̂ wunâ nesa vey na me, nára hin hɛ e gwong gwinde mê sey in mɛ.

⁶Banamâ nɔrɔ mo, yin re vɛ tuk o kɛ nusu hwol ayi. Ko bwang pyɛ de ya tɛt ɛ vɔk e tuk hê netat, yin rangas hywiri,

⁷yaga ha ga tɛ́ ɛ pyɛ byɛm-byɛm; ko mê sey nɔrɔ mo wɛt.

⁸Ko mwat de a re banama mo e tuk hê netat o, a ga ra renɛn, yaga a ga tɛ̀ pyɛ de ba tik jaram yaga me sede pyɛ zɔng-reng. A ga row neken mɛ, ko bê ró ɛ yi e ji bemat hom.

⁹Jeng de yin a yɛt bwâl pyɛ̂ hiri min, yin yɛt yê batô hiri mo wɛt, yin to raa nemɔ pyɛ́ mo arɔng wɛt.

¹⁰Yin to vos nèy anap de na hywit a yin, kɛ yin hashe nemo de na ga kana gabsa e vwel arɔng wɛt. Tik in nɛ yaga bepɛng tanga bemat beduk de ba sé sangal e ji min. E me wɛ à Dagwi Darwey, Dagwi min.

¹¹Hwo shigi, kɛ hwo mɔt mwat, kɛ hwo ra bɔs wɛt.

¹²Yin sira hin na bɔs e ra reza hom wɛt; hemo hê tɛ̀ be byɛs reza hom. E me wɛ à Dagwi Darwey.

¹³Yin mɔt mwât vwara min kɛ yin sey ɛ pyɛ mɛ wɛt. Ka sede mwat hwak a ra a yin fwôm wosho, ko tala hɛ dyām mɛ tyɛng jeng sogo, yɛ pɔl wɛt.

¹⁴Hwo mok a kpey gawey wɛt, kɛ hwo gana pyɛ de yê tɛ̀ bwók a gaba; wok bengyip hom, e me wɛ à Dagwi Darwey, Dagwi min.

¹⁵Há in pyɛ́ de ya sé tsak o, na yemo de ya sé cik, e ji ra shɔt, de yin dura simô reto yaga pwɛng wɛt, kɛ yin raa bamâ darwey zɔng wɛt.

¹⁶Yin kyě bɛrɛ hâ bɔs e ra mwat hwak wɛt, ka sede mwat hwak a sê shɔt na a sey mɛ neken mɛ, ko nusu wɛshɛrɛk na hwo nɔng nuha de hê sɛlɛ hɛ. E me wɛ à Dagwi Darwey.

¹⁷Hwak a vɔ̀k mumwɛ e yey wɛt, ko yin gang-nshi e ra pyɛ de ya gas tē min, yaga hwo kwon ra renɛn yi na yɛ.

¹⁸Hwo tala mwat pyɛ́ vyes na pyɛ́ vyes kɛ hwo bɛrɛng hɛ fus wɛt, ko tɛ̀ yey na mwât vwara mō sede hwà tɛ̀ yey na tó mo. E me wɛ à Dagwi Darwey.

¹⁹Gyéng in badu hom, yin wunsa yas yére detidetu na yɛ turus e ra bemɛn wɛt, yin tus yére pyɛ́ zap ba e hwiri gwining o wɛt, ko yin tɛ rugu de ba lɔk na shwey zap ba wɛt arɔng.

²⁰Ka sede mwat hwak a dyɛng na hwā de a sé sam, de mwat hwak e hwono hɛ, ko ba ga kana viri hwā mo na a sè washak wɛt, ko be ngyɛgɛt hɛn, be mɔrɔ hɛn wɛt, yaga hwā mo a rɔngɔl sam.

²¹Ko mwat o ê wɔ na tùruk e nuyêl bûk sangal hom yaga nɔrɔ̂ talâ banɛn vey na me.

²²Ko piris hom ê raa begwong de ba ga tɔ́k ɛn mɛ na nása nɔrɔ̂ talâ-nɛn yaga mwat o, ko Dagwi ê hàla a yɛ banɛn mɛ.

²³Jeng de yin a wul e sevwêl Kanaan, yin a rɔda tus kayiyɛ yére cɔ́gɔt re. Ko nèy cɔ́gɔt o nê sè a yin ligis neshey netat yi e jeng de na hwo mara. E ji neshey netat nane mo, yin ê re nèy cɔ́gɔt o wɛt.

²⁴E shey hê nenaas, bê tik mwa nèy cɔ́gɔt o jaram yaga nára mɛ̀ nɔrɔ̂ yey pyɛng vey na me, Dagwi Darwey.

²⁵Ko e shey hê netungun, yin ê hwo re nèy cɔ́gɔt o. Ka sede yin a ra ano, ko cɔ́gɔt min o yê gwɛ̌ mara nèy pyak. E me wɛ à Dagwi Darwey, Dagwi min.

²⁶Yin ka re namâ pyɛ sana shushu nemi mo wɛt; yin ragas vyoshon kɛ yin masa tô bes arɔng wɛt.

²⁷Yin hwon setôt ranang min, kɛ yin shɛrɛk negyɛk min,

²⁸kɛ yin yɛt babek min yaga vemo de ba ga kushu wɛt. Yin jɛk a bato min jɔ̄t wɛt. E me wɛ à Dagwi Darwey.

²⁹Yin tɛ̀ be byɛs behwóng min wɛt, yi na tɛ́ ɛn be tɛ́ ɛn bedebeves. Ka yin a ra ano, yin ê doyo e raà sekwit, ko vwel o hê sila na ragas neves.

³⁰Gyeng in Tuk Shábat, nɔng in kwɔ̂n re a me fongol nerey. E me wɛ à Dagwi Darwey.

³¹Yin dɛrɛ bevuvwel kɛ yin wɔ́ na bemat de be wuna to na bevuvwel arɔng wɛt. Ka yin a ra ano, ko yin ê tɛ́ in ligis. E me wɛ à Dagwi Darwey, Dagwi min.

³²Nɔng in bemakuk min nerey, yin jut neha hom na jɔgɔ wɛt. E me wɛ a Dagwi Darwey.

³³Yin tak a bemat beduk de ba sé sangal e sevwel min wɛt.

³⁴Ra in a yɛn tyɛng sede begwa min nèy vwel o, ko yin tɛ̀ yey na yɛn, sede yin a tɛ̀ yey na bato min. Bare hin, yin á kana sè bemat beduk e sevwêl Misra. E me wɛ à Dagwi Darwey, Dagwi min.

³⁵Yin mɔt mwat hwak na pyɛ̂ masa yê bɔs wɛt, kɛ yê masâ nelis na nedirik na nepyak ayi.

³⁶Ra in fwom na pyɛ̂ masa yê mwin o. E me wɛ à Dagwi Darwey, Dagwi min; ma nusu na yin yi e sevwêl Misra.

³⁷Gyeng in mwa badu hom na neha de ma ga basa a yin e ra vɛ. E me wɛ à Dagwi Darwey.