Read berom Bepiris 20 Bible Online

Bepiris 20 - berom bible

Bepiris 20

¹Dagwi Darwey a ha a Mose, a ha a regyɛng BeIsrayɛl neha nemo ngan: Ka sede hwak min kɛ hwak e ji bemat beduk de ba sé sangal e ji min a nɔng hining e ji nèy mɛ na be nára hɛ a Molek, ko bē mɔrɔ hɛ. Regyɛng BeIsrayɛl bê tó ɛ na beta sɛ̌ a ku,

³yaga me pyɛ hom ma ga nɔng ɛ mā. Mê ró ɛ yi e ji bemat mɛ yaga a nɔng hining e ji nèy mɛ vɔk na Molek. Yi ano, a ga tɛ̀ kwɔ̂n re a me fongol ligis, a ga byɛs reza hom rê jɛrɛ.

⁴Ko ka sede BeIsrayɛl ba ra pyɛ cak e ra pyɛ vyes de mwat wane mo a ra, na be mɔrɔ hɛ wɛt,

⁵ko me pyɛ hom mê nɔ̂ng mwat o mā, yɛ na belɔ mɛ. Mê ro ɛ tanga mwa vemo de ba raa bama mɛ e re a Molek fongol yi e ji bemat mɛn.

⁶Ka sede hwak a wɔ̀ dɛrɛ bevuvwel kɛ a wɔ́ na bemat de be wuna to na bevuvwel, a ga wuba me, ko mê nɔng ɛ mā. Mê ro ɛ yi e ji bemat mɛ.

⁷Tík in bato min jaram, na yin sè jɛrɛ, na yin sangal e gwong de me simo, yaga e me wɛ à Dagwi Darwey, Dagwi min.

⁸Gyeng in badu hom, raa hin vɛ. E me wɛ a Dagwi Darwey, ko ma ga tik in jaram na yin sè bemat hom vê jɛrɛ.

⁹Ka sede mwat a byɛs da mɛ kɛ neng mɛ, bē mɔrɔ hɛ, ko nemi mɛ nê sǎ e ra yɛ.

¹⁰Ka sede mwat a ra nejwang na hwâ mwat hwak, bē mɔrɔ mwat o tanga hwā mo.

¹¹Mwat de a dyɛng na gwining e ji behâ da mɛ, a ga tɛ̀ a da mɛ rekyen; bē mɔrɔ hɛn, yɛ na hwā mo, ko nemi mɛn nê sǎ e ra yɛn.

¹²Ka sede mwat a dyɛng na gwel mɛ, bē mɔrɔ hɛn mwa hɛn beba, yaga ba ra pyɛ de ya sé kís, ko nemi mɛn nê sǎ e ra yɛn.

¹³Ka sede mwat a dyɛng na mumwɛ rwas, na a vɛ mɛ hwā, yɛn a ga ra pyɛ de ya sé byɛm-byɛm; bē mɔrɔ hɛn, ko nemi mɛn nê sǎ e ra yɛn.

¹⁴Ka sede mwat a ra wenêng hwong, ko a to ra wenêng nêng hwā mɛ mo, ko a sé kyiri; bē wey na mwa hɛn betat na kya, yaga na pyɛ́ vyes ye kwon sè e tē min wɛt.

¹⁵Ka sede mwat a man bek na yas, bē mɔrɔ hɛ, ko be wey na yas o.

¹⁶Ka sede hwā arɔng a man bek na yas, bē mɔrɔ hwā mo, ko bē wey na yas o. Nemî hwā mo na ne yas o nê sǎ e ra kawɛ mɛn.

¹⁷Ka sede mwat a ra wenêng gwà mɛ hwong o, wò da kɛ neng mɛ ayi, be lɛ̄lɛ̄ hɛn, ko be ró ɛn yi e ji bemat mɛn. A ga tɛ̀ a gwà mɛ hwong o rekyen, yaga ano, ê sɔ reyɔ̂m pyɛ de a ra.

¹⁸Ka sede mwat a dyɛng na hwā de a vɔk berang, mwa yɛn beba be ró ɛn yi e ji bemat, yaga ba ga gyili badu e ra pyɛ́ de ye tɛ̀ mwat ligis.

¹⁹Ka sede mwat a dyɛng na gwa da mɛ kɛ gwa neng mɛ, a ra pyɛ de ya sé kís, ko mwa hɛn beba bê sɔ reyɔ̂m pyɛ de ba ra.

²⁰Ka sede mwat a dyɛng na hwâ gwa da mɛ, a ga tɛ̀ a da mɛ rekyen. Mwa hɛn beba bê sɔ reyɔ̂m pyɛ de ba ra, ko bê kushu vit a tɔs nèy.

²¹Ka sede mwat a ra wenêng hwâ gwa mɛ, a ga ra pyɛ de ya sé kís, yaga a ga tɛ̀ a gwa mɛ rekyen, ko yɛn ê tɔs nèy wɛt.

²²Gyeng in mwa badu hom na neha de ma ga basa a yin e ra vɛ. Ka yin a raa vɛ wɛt, ko mê ró in yi e sevwêl Kanaan de ma sé kyè wɔ ɛ na yin.

²³Yin raa negwɔn yére bemat yemo de ma sé ro ɛn e nuyel min wɛt. Yaga yɛn a ragas neves nemo mo mwa, ko ma kyɛ́ me hɛn vitvit.

²⁴Ko ma ga yang in, mê nɔng in vwel o na he sè min, vwel de ha siri, he nɔngɔs pyɛ́ shɛrɛk. E me wɛ à Dagwi Darwey, Dagwi min, ma ga tik in jaram yi e yére dyuk.

²⁵Yaga ano, gas in e tê ngyāma ryat na yemo de ya sé kyiri, ko ra in ano na benon arɔng. Yin kwon re banamâ ngyāma kɛ benon kɛ pyɛ̂ gabaga de ya sé kyiri. Ma ga ha, ya sé kyiri, ko rê yɛ̄ hê tɛ̀ in ligis.

²⁶Yin sè jɛrɛ, na yin sè jaram yaga me, yaga me Dagwi Darwey ma sé jɛrɛ. Ma gas in na yére dyuk, na yin sè bemat hom.

²⁷Rwas kɛ hwā ayi de e dɛrɛ bevuvwel, kɛ e wuna to na bevuvwel, bē mɔrɔ hɛ, ko be tó ɛ na beta sɛ̌ a ku, ko nemi mɛ nê sǎ e ra yɛ.