Read berom Bepiris 21 Bible Online

Bepiris 21 - berom bible

Bepiris 21

¹Dagwi Darwey a yâng Mose, a ha a nèy Aharon bepiris, neha nemo ngan: Hwak e ji mɛn a kwon tɛ̀ tó mɛ ligis yaga revîn cang mɛ wɛt,

²sɛ̌ cang mɛ ye bagat sede neng mɛ, kɛ da mɛ, kɛ hwey mɛ wen kɛ hwong, tanga gwà mɛ wen wo jim mɛ.

³Ko yaga gwà mɛ hwong de a rɔngɔl sana sogo hɛ, ê tɔk tɛ̀ to mɛ ligis arɔng.

⁴Ko a tɛ̀ tó mɛ ligis e jeng rekû vemo de weneng ha man ɛ na yɛn wɛt.

⁵A kwon wula bak setôt rato mɛ, kɛ a tɛt negyɛk mɛ, kɛ a yɛt rebek mɛ wɛt, na a dura mɛ, ba ra reku.

⁶Tik na bepiris be sè jaram yaga me, Dagwi mɛn, be tɛ̀ a reza hom rekyen wɛt. E yɛn vɛ de be nása nenɔrɔ̂ pyɛ̂ re vey na me, yaga ano, yɛn a sè jɛrɛ.

⁷Hwak a kwon ra wenêng hwā de a ga lashe hɛ na râ nedeneves, kɛ hwā de rwas mɛ a ga gas ɛ na yɛ, yaga ba ga tik piris o jaram yaga me.

⁸Tik na BeIsrayɛl bē tē naka na bepiris hom, yaga ma tik ɛn jaram yaga me. E yɛn de be nása nenɔrɔ̂ pyɛ̂ re vey na me. Me, Dagwi Darwey, ma sé jɛrɛ, ko ma ga tik BeIsrayɛl jaram, na be sè bemat hom vê jɛrɛ.

⁹Ka sede hwey hwong hê piris ha tɛ̀ a tô hɛ rekyen na râ nedeneves, a sé e dâ hɛ de ha tɛ̀ a yɛ rekyen, ko be wey na hɛ na kya.

¹⁰Yɛ womo de ba ga tɛ̀ ɛ darwêy bepiris e ji begwa mɛ, e yɛ de ba ga shushu hɛ na něy, ko ba ga tik ɛ jaram, na a tɛ̀sɛ berugû darwêy bepiris. A tik setot mɛ jagam wɛt kɛ a hama berugu mɛ, na a dura mɛ, ba ra reku.

¹¹A wɔ́ bagat na revin wɛt, yaga ê tɛ̀ to mɛ ligis kɛ a ka sé revîn da mɛ kɛ neng mɛ ayi.

¹²Gbak de revin ra sé e ji lɔ mɛ, ko ê wɔ e lɔ wɛt. A rɔda nàra e kwɔ̂n re a me fongol, yaga na a tɛ̀ hɛ ligis wɛt, yaga ba ga shushu hɛ na něy shushu ne jɛrɛ. E me wɛ à Dagwi Darwey.

¹³Yɛ a ra wenêng hwong de a ga tɔk rwas wɛt. A kwon ra wenêng kuma, kɛ hwā de ba ga gas ɛn na rwas mɛ, kɛ hwā de a ga lashe hɛ na râ nedeneves. Ko ê ra wenêng hwong yi e yére bepiris zɔng.

¹⁵Ka ano wɛt, ko ê sɛ̀ nèy ligis e ji yere mɛ. E me wɛ à Dagwi Darwey, ko ma ga tik ɛ jaram, na a sè darwêy bepiris hom.

¹⁶Dagwi Darwey a yang Mose, a ha a Aharon neha nemo ngan: Hwak e ji yére mō de a sé yɛt wɛt a nára nɔrɔ̂ pyɛ̂ re vey na me wɛt. Hemo ha sé redu vɔk e bezamang min.

¹⁸Vit a mwat de a sé yɛt wɛt de ê nára nɔrɔ, kɛ a sé bwok, kɛ gbɛrɛk, kɛ a nusu mwasi mo yɛt wɛt, kɛ dem mɛ hak ha sé tyɛng wɛt,

¹⁹kɛ vwɔ kɛ bwol mɛ gwa sé cik wɛt, yaga a ga kana kwɔrɔ gwɛ,

²⁰kɛ a vɔk gûng ma, kɛ a sé bɔgɔ̂m mwat, kɛ a vɔk rɔ̂ bayis kɛ rɔ̂ rehwô rebek hak, kɛ a sé rɛmɛt.

²¹Mwa mwat de a sé e ji yére Aharon, piris hom, de a sé yɛt wɛt, ko a nára pyɛ̂ re vey na me, Dagwi wɛt.

²²Yerê mwat wane ê tɔk re pyɛ́ de ba nára nɔrɔ vey na me, pyɛ́ de ya sé jɛrɛ tanga yemo de ya dal na nejɛrɛ arɔng.

²³Ko yaga a sé yɛt wɛt, a yel e bûk sangâl Dagwi wɛt, kɛ a wɔ́ bagat na gàgbang rangâs yas arɔng wɛt. A tɛ̀ nekwɔn jɛrɛ nemo ligis wɛt. E me wɛ à Dagwi Darwey de ma ga tik bepiris jaram yaga me.

²⁴Ano de Mose a ha a Aharon na nèy mɛ tanga BeIsrayɛl mwa arɔng.