Read berom Bepiris 22 Bible Online

Bepiris 22 - berom bible

Bepiris 22

¹Dagwi Darwey a yang Mose, a ha na Aharon tanga nèy mɛ e ra jeng de bê sè yikyik yi na pyɛ̂ nɔrɔ̂ rangas yê jɛrɛ yemo de BeIsrayɛl ba ga tik jaram yaga me. Ano ba rɔda vey a reza hom rê jɛrɛ na rekyen wɛt. E me wɛ à Dagwi Darwey.

³Jeng a yet: Ka sede hwak yi e yerê bepiris hom a sé ligis, ko a vey bagat na pyɛ́ de BeIsrayɛl ba ga tik jaram yaga me, ko bê ró ɛ yi e fwôm bepiris o. Hemo ha sé redu vɔk e bezamang mɛn. E me wɛ à Dagwi Darwey.

⁴E ji yerê bepiris hom de a vɔk rɔ̂ hwô rebek ves, kɛ pyɛ́ mɛ ye nunus na nshi, ê re pyɛ́ cak yê nɔrɔ̂ rangas de ba ga tik yɛ jaram wɛt, sɛ̌ jeng de ba ga tɛ̀ ɛ haalal. Ano arɔng na womo de a ra kayɛ pyɛ de ya sé ligis yi na râ revîn mwat, kɛ womo de nshî jwat mɛ na yi mòol zɔng,

⁵kɛ womo de a ga ra ngyama kɛ mwasi de a sé ligis.

⁶Kawɛ piris hom de a ra pyɛ́ cak e ji yane ê nàra ligis vɔk e nawiri, ko ê tɔk re pyɛ́ yê jɛrɛ wɛt, sɛ̌ a kus ɛ e ngyen.

⁷E bama de gwi gwa ga gaba, a ga tɛ́ ɛ haalal, ko ê tɔk re pyɛ́ yê jɛrɛ yaga yerê pyɛ́ mo ya sé myɛ.

⁸A re namâ yas de ya ku kɛ ngyama ya cɛgɛt yɛ wɛt; yê tɛ̀ ɛ a tɛ́ ɛ ligis. E me wɛ à Dagwi Darwey.

⁹Gbing-gbing bepiris hom be raa badu vemo de ma ga nɔng ɛn. Ka ano wɛt, ko yɛn a ga ra renɛn, yaga ba byɛs badu mó, ko bê kushu. E me wɛ à Dagwi Darwey de ma ga tik ɛn jaram yaga me.

¹⁰A sé belɔ piris hom zɔng de be tɔk re pyɛ́ yê jɛrɛ, mwat zɔng ê tɔk re yɛ wɛt, kɛ kwɛnɛt mɛ, kɛ mwat de ba jut ɛ na a ra a yɛ fwom ayi.

¹¹Ko sam mɛ de a sey na dyām kɛ ba tɔ̀ ɛ e ji lɔ mɛ, ê tɔk re pyɛ́ mo.

¹²Ka sede hwông piris hom a ra weneng na mwat de a sé e ji yerê bepiris hom wɛt, ê to tɔk re pyɛ́ yê jɛrɛ mo wɛt.

¹³Ko ka sede hwóng mɛ mo a sé kuma, kɛ ba ga gas weneng, vit a hɛ na hwey arɔng, ko a ga toyo hɛ e lɔ da mɛ tyɛng sede remo de a sè e ji nehwong mɛ, ê tɔk re pyɛ̂ da mɛ. A sé belɔ piris hom zɔng de be tɔk re pyɛ́ mo.

¹⁴Ka sede mwat hwak zɔng a re pyɛ́ yê jɛrɛ sana tɔk, ko a to toyo a piris hom na pyɛ́ mo mwa, ko ê gwɛ̌ ɛ pyɛ jining e ji pyɛ́ tyungun.

¹⁵Bepiris hom be teshe na pyɛ̂ jɛrɛ yemo de BeIsrayɛl be nása a Dagwi Darwey wɛt.

¹⁶Ka sede ba simo a mwat zɔng a re yɛ̄, hemo he tɛ̀ mwat o a buru, ko a rɔda nára nɔrɔ̂ talâ banɛn arɔng. E me wɛ a Dagwi Darwey de ma ga tik bepiris hom jaram yaga me.

¹⁷Dagwi Darwey a yang Mose, a ha a Aharon na nèy mɛ tanga BeIsrayɛl mwa neha nemo ngan: Jeng de hwak e ji nèy vwel o kɛ mwat duk de a sé sangal e sevwel o a vey na nenɔrɔ̂ rangas, kɛ yaga sila mɛ̀ sira, kɛ yaga nɔrɔ̂ yey pyɛng ayi, ko yas o yè sè yemo de ya vɔk ram kɛ pyɛ cak vyes wɛt.

¹⁹Na me sey nɔrɔ mo, yas o yè sè turuk kɛ gam kɛ mus de ya sé gyat.

²⁰Ka sede yin a nɔng yinde ya vɔk ram kɛ pyɛ cak vyes o, ko mê sey yɛ wɛt.

²¹Ano arɔng, ka sede mwat ê nára turuk, kɛ gam, kɛ mus nɔrɔ̂ wunâ nesa vɔk na Dagwi Darwey, kɛ yaga sila mɛ̀ sira, kɛ yaga nɔrɔ̂ yey pyɛng ayi, ko yas o ye vɔk ram kɛ pyɛ cak vyes wɛt, yaga na me sey nɔrɔ mo.

²²Yin nɔng me yas de ya sé vit a bayis, kɛ ye yɔmɔng, kɛ dem hak vit, kɛ ya vɔk ram de he yis na sebunung, kɛ ya vɔk wá, kɛ benot ba ga re rehwô rebek o. Yin nára cak e ji yerê yane mo e ra gàgbang rangas o sede nɔrɔ̂ pyɛ̂ re wɛt.

²³Ko yaga nɔrɔ̂ yey pyɛng, yin e tɔk nára nɔrɔ̂ yas de ya sé bɔgɔm o, kɛ dem hak ha sé tyɛng wɛt, ko mê sey yɛ yaga nɔrɔ̂ silâ sira wɛt.

²⁴Yin nára a me nɔrɔ̂ yas de ba ga dak kɛ forok yɛ wɛt. Yin ra pyɛ yerê yemo jeng de yin ê sè e ji sevwel min wɛt.

²⁵Ko yin sey yas de ba dak kɛ forok yɛ yi na mwat duk arɔng wɛt, na yin nára a me yɛ, me Dagwi min nɔrɔ. Dák na forok o ha sé tyɛng na pyɛ́ de yê tɛ̀ yas ye sè gyat wɛt, ko yas yemo mê sey yɛ wɛt.

²⁶Ka sede ba tɔ̀ kekwey rɔndɔng kɛ vyel pyɛng kɛ vyel shi, ko yin gas kɛ na neng o wɛt sɛ̌ bamâ pɔlɔ taama. E bama mo, mê sey kɛ yaga narâ nɔrɔ̂ pyɛ̂ re.

²⁸Ko yin nára yaga nɔrɔ̂ rangas, neng o tanga hwey o tuk hining wɛt.

²⁹Jeng de yin a sé nára nɔrɔ̂ yey pyɛng vey na me, Dagwi Darwey, raa hin badu mo, ko ano, ma rɔda sey in mɛ.

³⁰Re in banama mo tuk o, yin tɛt ɛ bwang o vɔk e hwol wɛt. E me wɛ à Dagwi Darwey.

³¹Gyeng in badu hom, na yin raa vɛ. E me wɛ à Dagwi Darwey.

³²Yin tɛ̀ a reza hom rê jɛrɛ rekyen wɛt. BeIsrayɛl mwa bē tɔk, ma sé jɛrɛ. E me wɛ à Dagwi Darwey, ko ma ga tik in jaram, na yin sè bemat hom vê jɛrɛ, me tɛ̀ yin sè jɛrɛ.

³³Ma ga nusu na yin yi e sevwêl Misra na me tɛ́ me Dagwi min. E me wɛ à Dagwi Darwey.