Read berom Bepiris 23 Bible Online

Bepiris 23 - berom bible

Bepiris 23

¹Dagwi Darwey a yâng Mose, a ha a BeIsrayɛl neha nemo ngan: Jeng a yemo de ma tɛ̀ yaga nzem detidetu, na yin tula hin yaga re a me fongol.

³Tuk hê taama ha sé Tuk Shábat, hɛ a tuk pɔngɔ, tuk jɛrɛ. Yin ra fwom nepɔlɔ netyiimin, ko Tuk Shábat o yin ra fwom wɛt, ko yin tula hin yaga rê fongol. Kagwa de yin e sangal ɛ, tuk o ha sé jaram yaga Dagwi Darwey.

⁴Bwang jeng nzem o nehak yaga tulâ re a Dagwi Darwey fongol a nemo ngan:

⁵Ragas hin Nzem Gyilsit Nelɔ BeIsrayɛl e tuk hê kuru na hɛ naas e pwɛ̂l susu shey, yin pɛrɛ nɛ nawiri.

⁶Ko e tuk de ha raa, yin hwo ra Nzem Kpam-tuk Sana Géy-sing. Yin re kpam-tuk de wà vɔk ɛ géy-sing wɛt nepɔlɔ netaama.

⁷E tuk hê mɛsɛng hê nepɔlɔ netaama mo, yin tula hin yaga rê fongol, yin ra tom de yin a ga tɔ́k in mɛ kahɛ tuk wɛt.

⁹Jeng de yin a pom e sevwel de Dagwi Darwey e kyè wɔ̀ nɔng in sɛ̀, ka yin a yɛt bwâl pyɛ̂ yeneng min yê baale, ko yin wɔ́ na rekús rê mɛsɛng o na piris hom.

¹¹E susû tuk de he raa Tuk Shábat, yɛ piris o ê ra mɛ na hɛ, sede a sé nára a Dagwi Darwey nɔrɔ yaga na a sey in mɛ.

¹²E tuk hining o, yin nára turuk wo shey hining de wa vɔk ram kɛ pyɛ cak vyes wɛt yaga nɔrɔ̂ yas burang.

¹³Wuna hin ɛ kilo beba vê nemuk nerat yaga nɔrɔ̂ nemuk de ba suk nɛ na něy pwat yaga nɔrɔ̂ pyɛ̂ re. Nesang nɔrɔ hemo ne pɛngɛ a Dagwi Darwey yey. Yin to wuna nɔrɔ̂ pyɛ̂ sɔ hê nshî anap de na wul fus gwining arɔng.

¹⁴Yin re pyɛ cak e ji pyɛ̂ yeneng pyas min wɛt, kɛ vyen o, kɛ yê rangas, kɛ be kyé mɛ kpam-tuk ayi, sɛ̌ yin a tanga wɔ na nenɔrɔ nemo vɔk na Dagwi min e ngyen. Hemo ha sé redu de yin ê gyeng vɔk e bezamang min e kagwa de yin ê sangal ɛ.

¹⁵Yi e nusû hwol e bamâ Tuk Shábat de yin a ga vey na rekús min rê mɛsɛng rê pyɛ̂ yeneng yaga nára a Dagwi Darwey mɛ nɔrɔ, yin bara besati betaama viisis.

¹⁶E tuk hê kuru batungun, hɛ a nusû hwol e bamâ Tuk Shábat hê taama, yin nára nɔrɔ mo hak hê pyɛ̂ yeneng pyas yê alkama.

¹⁷Kahɛ lɔ hê wɔ na bagat kpam-tuk baba, ko bē ra mɛ sede ba sé nára a Dagwi Darwey nɔrɔ. Bē yong karɛ regat kpam-tuk o na nemuk nerat neshǐ masa neba, ko be tɛ̀ géy-sing e nemuk o. Hemo ha sé nɔrɔ̂ pyɛ̂ mɛsɛng yê bwâl alkama.

¹⁸Mwa regyɛng BeIsrayɛl bē vɔk ɛ tyīmit tyaama de ya ga sila shey hining, na bwôt mus gwining, tanga beturuk beba, ko cak e ji yɛ̀ ye vɔk ram kɛ pyɛ cak vyes wɛt. Yin nára yɛ̄ nɔrɔ̂ yas burang vɔk na Dagwi Darwey, bē wuna na nɔrɔ̂ nemuk tanga hê nshî anap arɔng. Nesang nɔrɔ hemo ne pɛngɛ a Dagwi Darwey yey.

¹⁹Yin to nára gam gwining yaga nɔrɔ̂ fûng banɛn arɔng, tanga tyīmit bya de ya ga sila shey hining yaga nɔrɔ̂ wunâ nesa.

²⁰Piris hom a jut bagat kpam-tuk o tanga beturuk beba mo, a ra mɛ sede a sé nára nɔrɔ vɔk na Dagwi Darwey. Nenɔrɔ nemo na sé jɛrɛ, ko na sé numo hê bepiris hom.

²¹E tuk hane, yin ra tom de yin a ga tɔ́k in mɛ kahɛ tuk wɛt, ko yin tula hin yaga rê fongol. Hemo ha sé redu de yin ê gyeng vɔk e bezamang min e kagwa de yin ê sangal ɛ.

²²Jeng de yin a yɛt bwâl pyɛ̂ hiri min, yin yɛt yê batô hiri mo wɛt, yin to raa nemɔ pyɛ́ mo arɔng wɛt. Tík in nɛ yaga bepɛng tanga bemat beduk de ba sé sangal e ji min. E me wɛ à Dagwi Darwey, Dagwi min.

²³Tuk hê susu hê pwɛl gwô netaama ha sé tûk pɔngɔ de yin ê tula hin yaga rê fongol. Bē dak durum, ko jeng de Dagwi Darwey a wok fwɔ̂ durum o, ê re nuyel na bare na yin.

²⁵Yin ra tom de yin a ga tɔ́k in mɛ kahɛ tuk wɛt, ko yin nára nɔrɔ̂ pyɛ̂ re vɔk na Dagwi Darwey.

²⁶Tuk hê kuru hê pwɛl gwô netaama ha sé gbɔng tûk talâ-nɛn na hala a BeIsrayɛl banɛn mɛn. E tuk hane, bê re pyɛ́ wɛt, ko yin ê tula hin yaga rê fongol na narâ nɔrɔ̂ pyɛ̂ re vɔk na Dagwi Darwey.

²⁸Yin ra fwom tuk o ko tyɔng wɛt, yaga a sé tuk de darwêy bepiris hom ê ra fwôm talâ-nɛn min, yaga na Dagwi Darwey, Dagwi min a hàla a yin vɛ.

²⁹Kawɛ mwat de a re pyɛ́ tuk o, ko bē ro ɛ yi e ji BeIsrayɛl.

³⁰Ko kawɛ mwat de a ra fwom tuk o, Dagwi Darwey pyɛ mɛ ê wey na yɛ.

³¹Yin ra fwom wɛt. Hemo ha sé redu de yin ê gyeng vɔk e bezamang min e kagwa de yin ê sangal ɛ.

³²Gyeng in tuk o yi e nawiri tuk hê shanetat hê pwɛl o vɔk e nawiri tuk hê kuru. Be tik tuk o jaram yaga pɔngɔ zɔng, e jeng o bê rê pyɛ́ wɛt.

³³E tuk hê kuru na hɛ tungun e pwɛl gwô netaama mo, bē pɛrɛ Nzem Bǔk, na be nɔ̂ng Dagwi Darwey mɛ nerey, ko be re nuyel na nɛ nepɔlɔ netaama.

³⁵E tuk hê mɛsɛng o, yin tula hin yaga rê fongol, ko yin ra tom de yin a ga tɔ́k in mɛ kahɛ tuk wɛt.

³⁶E ji nepɔlɔ netaama mo, kahɛ tuk yin nása nenɔrɔ̂ pyɛ̂ re. E tuk hê rwit, yin to tula hin yaga rê fongol, ko yin nára nɔrɔ̂ pyɛ̂ re. A sé gbɔng tuk rê fongol, ko yin ra tom ve kahɛ tuk wɛt.

³⁷Nemo nɛ a nzem detidetu de ba ga tik jeng râ nɛ. Yaga nzem o, yin tula hin mwa, na yin nɔ̂ng Dagwi Darwey nerey e ji rê fongol, na yin nára nenɔrɔ min, nɛ a nɔrɔ̂ yas burang, na nɔrɔ̂ nemuk, na nɔrɔ̂ wunâ nesa tanga nɔrɔ̂ nshî anap, pyɛ de ya kaba kahɛ tuk.

³⁸Ba gwɛ̌ nzem nemo e ra negasî rê fongol ne kahɛ Tuk Shábat. Ba gwɛ̌ nenɔrɔ nemo arɔng e ra nenɔrɔ de be ragas kayɛ jeng, nɛ a nenɔrɔ̂ sira tanga ne yey pyɛng de yin e nɔngɔs Dagwi Darwey.

³⁹E ra Nzem Bǔk de yin e ra e tuk hê taama e bamâ yɛnɛ̂ bwal, mɛsɛng hin nɛ e tuk hê kuru na hɛ tungun hê pwɛl gwô taama. Tuk hê mɛsɛng o hê sè tûk pɔngɔ, ko yin to pɔng e tuk hê talâ nzem o arɔng.

⁴⁰E tuk hê susu mo, yin vɛ nèy cɔ́gɔt de na dal na nerat, na nelang tyet, na gyisâk berang cɔ́gɔt, na nelang babɔnɔng de be ras e vwarâ rɔt, ko yin ra mɛ nzem yey pyɛng nè nɔ̂ng Dagwi Darwey, Dagwi min nerey. Yin ê ra nzem nemo kahɛ shey e pwɛl gwô netaama yaga nepɔlɔ netaama. Hemo ha sé redu de yin ê gyeng vɔk e bezamang min.

⁴²BeIsrayɛl mwa bē sangal e ji buk yaga nepɔlɔ netaama,

⁴³yaga Dagwi Darwey a ga nɔng nu ngan: “Yin bare a yére min wɔgɔ, ma kana tɛ̀ in, yin á ka sangal e bǔk jeng de ma nusu na yin yi e sevwêl Misra. E me wɛ à Dagwi Darwey, Dagwi min.”

⁴⁴Gwong a gwomo de Mose a nɔ̂ng BeIsrayɛl badu vemo e ra gyeng nzem nɔngɔ̂s Dagwi Darwey nerey.