Read berom Bepiris 24 Bible Online

Bepiris 24 - berom bible

Bepiris 24

¹Dagwi Darwey a yâng Mose,

²Nɔ̂ng BeIsrayɛl nu, bē vɛ̀sɛ na něy pwat de na dal na nerat, na be tɛsɛ mɛ kya e bekywa-kya bûk sangal hom kanɛ nawiri.

³Aharon ê tɛ̀ kya e bekywa-kya mo e nuyêl gworugû dûl Kundung Wuna-na-Sira. E hwomo, e nuyel hom, bê lolo yi e nawiri vɔk e nagasi. Hemo ha sé redu na yére min vɔk e bezamang min.

⁴Aharon ê bɛrɛng bekywa-kya mo e ra pyɛ tikis vɛ ye celes dyam shinang, na a di ba sé lolo kanɛ nabwalak e hwomo e nuyel hom.

⁵Hwo vɛ nemuk nerat, na be yong mɛ bagat kpam-tuk kuru na vɛ baba, bē yong karɛ regat o na nemuk de nedirik o na sé shî masa hining.

⁶Ngyɛrɛ bagat kpam-tuk o be tē lap e ra bemɛn e rǎng bà, betyiimin e kagwɛ rwang e ra rak tebut de ba dak wɛ na celes dyam shinang.

⁷Ko tɛ̀ zɔgɔ̂ pyɛ̂ nesang hyɔɔlɔl e kagwɛ rwang. Ba rɔda rangas yɛ e tô kpam-tuk o. Hemo hé dura, bagat kpam-tuk o ba sé vê Dagwi Darwey.

⁸Kahɛ Tuk Shábat yi a remo vɔk e nuyel, bē tik kpam-tuk yere womo e nuyêl Dagwi Darwey. Gwomo gwɛ a fwom de a sé gbing-gbing BeIsrayɛl be ra neshey gbak-gbak.

⁹Kpam-tuk de ba ga kana jut, wa sé yaga Aharon na yere mɛ. Yɛn ê re wɛ e kwɔn de ha sé jɛrɛ, yaga wa sé pyɛ̂ re de ya dal mwa na nejɛrɛ. Numo mɛn a hane gbak-gbak hê nenɔrɔ de be nása vɔk na Dagwi Darwey.

¹⁰Mwat hwak á sè e ji BeIsrayɛl de da mɛ á sè WoMisra ko neng mɛ WoIsrayɛl bá tang ɛ a Shelomit Dibri wo yerê Dan. Tuhak, repugu rá hwo e tē mɛ na hwêy vwel o e hwomo e kwɔ̂n ye ngyɔk, ko mwat o a haras e ra rezâ Dagwi Darwey. Yaga ano, bá wɔ́ na yɛ na Mose.

¹²Mose á tɛ̀ be bang ɛ, na be gyeng pyɛ de Dagwi Darwey ê simo be ra na yɛ.

¹³Ko Dagwi Darwey a yâng Mose,

¹⁴“Nusu na mwat de a haras o yi e kwɔ̂n ye ngyɔk, ko mwa vemo de ba wok a sè haras o, kawɛ a tɛ̀ vɔ mɛ e ra tɛ̂t to mɛ, nuha a hane wɔgɔ, a ga ra renɛn. E bama mo, regyɛng BeIsrayɛl mwa be tó ɛ na beta sɛ̌ a ku.

¹⁵“Ko ha a BeIsrayɛl, kawɛ mwat de a haras a Dagwi, a rɔda sɔ reyɔm o.

¹⁶Kawɛ de a ha ha ves e ra rezâ Dagwi Darwey, kɛ a sé hwêy vwel o, kɛ mwat duk de a sé sangal e ji BeIsrayɛl ayi, bē tó ɛ na beta sɛ̌ a ku.

¹⁷“Kawɛ de a mɔrɔ mwat, bē mɔrɔ hɛ arɔng,

¹⁸ko mwat de a mɔrɔ yas de ya sé ye mwat hwak, a tɛ̀ tô yɛ. Badu ma vemo: Neken e tô neken.

¹⁹“Ka sede mwat a mǎ mwat hwak, bē ra a yɛ tyɛng pyɛ de a ra a mwat wane mo:

²⁰Ka a kwɔrɔ a mumwɛ kup, ko bē kwɔrɔ a yɛ kup arɔng, ka a pat a yɛ yis, bē pat a yɛ yis, ka a pat a yɛ hwin, bē pat a yɛ hwin. Kahɛ yerê mǎ de a mǎ hɛ, bē ra a yɛ tyɛng ano arɔng.

²¹Mwat de a mɔrɔ yas, a tɛ̀ tô yɛ, ko mwat de a mɔrɔ mwat, bē mɔrɔ hɛ arɔng.

²²Shɔt e ra pyɛ́ yemo, yê se jining o na hwêy vwel o tanga mwat duk de a sé sangal e ji min. E me wɛ à Dagwi Darwey, Dagwi min.”

²³E bama de Mose a ha a BeIsrayɛl neha mo, yɛn a vey a yɛ na mwat de a ha ha ves o e jey na kwɔ̂n ye ngyɔk, ko ba tó ɛ na beta sɛ̌ a ku. Gwong a gwomo de BeIsrayɛl ba ra pyɛ de Dagwi Darwey a kana nɔ̂ng Mose nu.